1 थोड़े वक्तेरां बाद बलदानेरू मट्ठू मरोदक बलदान, ज़ै बाबेलेरो राज़ो थियो, तैनी हिजकिय्याहेरे बिमार भोने ते ठीक भोनेरी चर्चा शुन्तां तैस कांजो चिट्ठी ते तोफे भेज़े। 2 तैन सेइं हिजकिय्याह खुशी भोइतां तैनी अपनि कीमती चीज़ां केरे गुदाम ते सोन्नू, चाँदी ते खुशबूदार चीज़ां, कीमती तेल ते कीमती चीज़ां केरे गुदामन मां ज़ैना चीज़ां थी, तैना सब तैन हेरेई। हिजकिय्याहेरे मेहले मां पूरे मुल्खे मां कोई एरी चीज़ न राई ज़ै तैन्न न भोए हिरेवरी। 3 तैखन यशायाह नेबे हिजकिय्याह राज़े कां गेइतां पुछ़ू, "तैन लोकेईं कुन ज़ोवं, ते तैना कोट्ठां तीं कां एवरे थिये?" हिजकिय्याहे ज़ोवं, "तैना त दूर मुल्खेरां मतलब बाबेले मरां मीं कां एवरे थिये।" 4 फिरी यशायाह पुछ़ू, "तेरे मेहले मां तैनेईं कुन-कुन हेरू?" हिजकिय्याहे ज़ोवं, "ज़ैन किछ मेरे मेहले मां आहे, तैन सब लाहोरूए, मेरे गुदामन मां कोई एरी चीज़ नईं ज़ै तैनेईं न भोए लाहोरी।"

5 तैखन यशायाह नेबे हिजकिय्याह राज़े सेइं ज़ोवं, "सेना केरे यहोवारू इन वचन शुन; 6 एरे दिहाड़े एजने बालेन, कि ज़ैन किछ तेरे मेहले मांए ते तेरे दादे-पड़दादेईं अज़ तगर तेरे गुदामन मां जम्हां केरतां रखेरूए, तैन सब बाबेले जो नेइतां गाले, कोई चीज़ बाकी न राहेली ज़ैनी न नही गाली, यहोवा एन ज़ोते। 7 इसेरे अलावा ज़ैना मट्ठां तेरे खानदाने मां ज़र्मन, तैन मरां तैना काही गुलाम बनेइतां नही गाले; ते तैना खोजे बेनतां बाबेलेरे राज़ेरे मेहले मां कम केरेले।" 8 हिजकिय्याह राज़े यशायाह नेबी सेइं ज़ोवं, "यहोवारू एन वचन ज़ैन तीं ज़ोवरूए तैन ठीके।" फिरी तैनी ज़ोवं, "मेरे दिहाड़न मां शान्ति ते सच़्च़ाई बनोरी राली।"