1 ज़ैस साल यहूदा प्रदेशेरे राज़े उज्जियाहेरी मौत भोइ जेई, मीं प्रभु बड़े उच्‍चे तखते पुड़ बिशोरो लाव; ते तैसेरे चोगेरे महिमा सेइं भवन भेरोई जेवं।✝ 2 तैसेरे आसे पासे एरे प्राणी* खड़े थिये; ज़ैन केरां शा-शा फंघां थियां; दूई फंघेइं सेइं तैनेईं अपना तुत्तर ढकोरां थियां ते दूईयन सेइं तैनेईं अपने पव ढकोरे थिये ते दूई फंघेइं सेइं तैना उडरते थिये। 3 ते तैना एक्‍की होरि सेइं उच्‍ची आवाज़ी मां ज़ोते थिये: "सेना केरो यहोवा पवित्र, पवित्र, पवित्रे; सैरी धेरती पुड़ तैसेरी महिमा भरपूरे।"✝ 4 ते तैन केरि आवाज़ी सेइं भवनेरी बुनियादां हिल्‍ली जेई, ते भवन तूएँ सेइं भेरोई जेव। 5 तैखन अवं चिन्डां मैरतां ज़ोने लगो, "अफ़सोस! अफ़सोस! अवं नाश भोइ जेव। किजोकि अवं अशुद्ध ओठन बालो मैन्हु आईं; ते अशुद्ध ओठन बाले मैन्हु केरे दरमियान रहताईं; किजोकि मीं सेना केरो परमेशर यहोवा महाराज़ो एपनी एछ़्छ़ेईं सेइं लाहोरोए!"

6 तैखन अक प्राणी हथ्थे मां अक मूरोवं, ज़ैन तैनी चिमटे सेइं वेदी पुड़ेरां ट्लेइतां आनोरू थियूं, उडरतां मीं कां अव। 7 तैनी तैन मूरोवं मेरे ऐशी सेइं हुरेइतां ज़ोवं, "हेर, एन तेरे ओठन सेइं हुरेवरूए, एल्हेरेलेइ तेरो अधर्म दूर भोइ जेव ते तेरे पाप माफ़ भोइ जे।" 8 तैखन मीं प्रभुएरू एन वचन शुनू, "अवं कैस भेज़ी, ते इश्शी तरफां कौन गालो?" तैखन मीं जुवाब दित्तो, "अवं हाज़र आईं! मीं भेज़।" 9 तैखन प्रभुए ज़ोवं, "गा, ते इस्राएली लोकन सेइं ज़ो, ‘तुस शुन्ने त शुनेले पन समझ़ेले नईं; तुस तकने त तकेले न बुझ़ी न बटेले।’ 10 तैखन तैनी मीं सेइं ज़ोवं, ‘तू एन लोकां केरे मन सखत केर ते एन केरे कन टोंवने केर ते एन केरि एछ़्छ़ी बन्द केर; एरू न भोए एना एछ़्छ़न सेइं लांन, ते कन्नेईं सेइं शुन्न, ते मने सेइं बुझ़न, ते मन फिरान ते बेझ़ोन।’"✝ 11 तैखन मीं पुछ़ू, "हे प्रभु केइस तगर?" तैनी जुवाब दित्तो, "ज़ांतगर दुश्मन नगरे न उज़ाड़न ते तैन मां कोई बाकी न राए, ते घरन मां भी कोई मैन्हु न राए, मुल्ख उज़ड़ी गाए ते तै सुनसान भोए, 12 ते यहोवा मैन्हन तैस मरां दूर केरि दे, ते मुल्खेरी बेड़ी ठारां मैन्हन सेइं खाली भोन। 13 चाहे तैसेरे रानेबालां केरो दशोवं हिस्सो कि न रेई गाए, फिरी भी तैना नाश किये गाले, ज़ेन्च़रे निकड़े या बड्डे बंज़ेरे बुट केटतां भी तैसेरू ढिक बाकी रहते, तेन्च़रे पवित्र वंश तैसेरू ढिक ठहरेलू।"