यशायाह 7

आहाज राज़ेरे लेई सन्देश

1 यहूदा प्रदेशेरो राज़ो आहाज ज़ैन योतामेरू मट्ठू ते उज्जियाहेरू पोट्लड़ू थियूं, तैसेरे राज़ केरनेरे दौरान मां अराम मुल्खेरे राज़े रसीने ते इस्राएलेरे राज़े रमल्याहेरे मट्ठे पेकह यरूशलेम नगरे पुड़ हमलो कियो, पन तैना तैस मां कामयाब न भोइसखे। 2 ज़ैखन दाऊद राज़ेरे घराने ऐह पतो लगो कि अरामी लोकेईं एप्रैमी लोकन सेइं समझोतो कियोरोए, तैखन आहाज राज़ो ते तैसेरे लोक डरे सेइं एन्च़रे थरकने लगे, ज़ेन्च़रे जंगली बुट बाते सेइं हिलतन। 3 तैखन यहोवा मीं सेइं ज़ोवं, "अपने मट्ठे शार्याशूबे*7:3 शार्याशूबे शार्याशूबेरो मतलबे बच़ोरे लोक वापस एज्जेले। नेइतां धोबी केरि उडारेरे सड़करे बेइयें पासेरे पैनेरे नालेरे च़ोटी पुड़ आहाजे सेइं मिलनेरे लेई गा, 4 ते तैस सेइं ज़ो, ‘खबरदार ते शान्त भो; ते तैन दूईये तू निस्सोरे मोछ़ू मतलब रसीन ते अरामी केरे भड़कोरे क्रोधे सेइं, ते रमल्याहेरे मट्ठे करां न डेरां, ते तेरो मन परेशान न भोए। 5 किजोकि अरामी लोकेईं ते रमल्याहेरे मट्ठे समेत एप्रैमी लोकेईं एन ज़ोइतां तेरे खलाफ साज़िश कियोरीए कि एज्जा, 6 असां यहूदा प्रदेशे पुड़ हमलो केरतां तैस डराम, ते तैस अपने कब्ज़े मां केरतां ताबेलेरू मट्ठू यहूदारो राज़ो बनाम। 7 पन प्रभु यहोवाए एन ज़ोवरूए कि ई साज़िश न त कामयाब भोल्ही ते न पूरी भोल्ही। 8 किजोकि अरामेरी क्रोड़ी दमिश्क, ते दमिश्केरी क्रोड़ी रसीने। फिरी एप्रैमेरी क्रोड़ी सामरिया ते सामरियारी क्रोड़ी रमल्याहेरू मट्ठूए। 65 सालां केरे अन्तर एप्रैमेरी ताकत एत्री ट्लुटी गाली कि तै कौम बरबाद भोल्ही। 9 अगर तुस लोक एस गल्‍ली पुड़ विश्वास न केरेले; त तुस मज़बूती सेइं खड़े न रेइ बटेले।’"

इम्मानुएलेरो निशान

10 एक्‍की बार फिरी यहोवाए आहाज राज़े जो ई सन्देश देनेरे लेई मीं ज़ोवं, 11 "अपने परमेशर यहोवाए करां कोई निशान मग; चाहे तै पातालेरो ज़ेरो डुग्घो भोए, या चाहे बह अम्बरेरे ज़ेरो उच्‍चो भोए।" 12 पन आहाजे ई सन्देश शुन्तां ज़ोवं, "अवं कोई निशान न मेग्गी, ते अवं यहोवारी अज़मैइश न केरि।" 13 तैखन मीं ज़ोवं, "हे दाऊदेरे घराना शुन! कुन तुसां मैन्हु थकान्नो निकड़ी गल बुझ़तां हुनी मेरे परमेशरे भी थकाले? 14 एल्हेरेलेइ यहोवा एप्पु तुसन अक निशान देलो। शुना, अक कुवारी कुई दोज़ींती भोल्ही ते मट्ठू ज़ाली, ते तै तैस मट्ठेरू नवं इम्‍मानुएल रखेली, ज़ेसेरो मतलब परमेशर असन सेइं साथी आहे।✝7:14 मत. 1:23;लूक. 1:31. 15 ज़ैखन तैन मट्ठू बड्डू भोइ गाए ते तैस भले ते बुरेरू ज्ञान भोने लगे तैखन तैन मक्खन ते माछ़ी खालू। 16 ज़ैखन करां तैन मट्ठू भले ते बुरे पिशान्ने लग्गेलू, तै मुल्ख ज़ेसेरे दूईये राज़न करां तू डरने लगोरोस तै मुल्ख सुनसान भोइ गालो। 17 यहोवा तीं पुड़, ते तेरे लोकन पुड़ ते तेरे बाजी केरे घराने पुड़ एरे दिहाड़े आन्ने बालोए कि ज़ैखन करां एप्रैम प्रदेश यहूदा प्रदेशे करां अलग भोव, तैखन करां तेरहे दिहाड़े कधे नईं एवरे मतलब अश्शूरेरे राज़ेरे दिहाड़े।"

18 तैस वक्ते यहोवा तैस मैछ़न सेइं ज़ैना मिस्र मुल्खेरे दरियान पुड़ रैतिन, ते तैस गणे सेइं ज़ै अश्शूर मुल्खे मां रहते, हुक्म देइतां कुजालो। 19 ते तैना सब एइतां इस मुल्खेरे पहाड़ी नालन मां, ते चट्टानां केरे दरज़न मां, ते सेभी कंटन बाले झ़ैल्‍लन पुड़ ते घास च़रनेरे ड्लबड़न पुड़ बिश्शी गैली।

20 तैस्से मौके प्रभु फरात दरियाएरे पार अश्शूरेरे राज़े करां किरैइये पुड़ आनोरे उस्तरे सेइं तुश्शे दोग ते पव्वां केरे बाल ते एड़ी तगर कि तुश्शी दाढ़ी भी कटालो।

21 तैस मौके एरू भोल्हु कि मैन्हु सिर्फ अक बछ़ी ते दूई भैड्डां-छ़ेल्‍ली पालेलो; 22 ते तैना एत्रू दुद्ध देली कि तै मक्खन खातो रालो; किजोकि ज़ेत्रे एस मुल्खे मां रेई गाले तैना सब मक्खन ते माछ़ी खाएले।

23 तैस मौके ज़ैस-ज़ैस ठैरी मां हज़ार टुक्ड़े*7:23 हज़ार टुक्ड़े अक टुक्ड़ो (शेकेल) चाँदी एक्‍की दिहाड़ेरी मज़दूरी। लगभग 110 किल्‍लो चाँदी। चैंदरी हज़ार दाछ़री बागन, तैन सब ठैरन मां कंटन बाले बुट भोल्हे। 24 तीर ते धनुष नेइतां लोक तैड़ी गाते राले, किजोकि सारे मुल्खे मां कंटन बाले बुट भोइ गाले; 25 ते ज़ेत्रां पहाड़ां बेंगोड़न सेइं घड़ां गातन, तैन सेभन पुड़ कंटन बाले बुट्टां केरे डरके मारे कोई न गालो, तैना गोरू गब्बां केरे च़रनेरे लेई भोल्ही।