1 हे कौमां-कौमां केरे लोकव, शुन्नेरे लेई नेड़े एज्जा, ते रियासतां-रियासतां केरे लोकव ध्याने सेइं शुना! धरती ते ज़ैन किछ तैस मांए, दुनिया ते ज़ैन किछ तैस मां पैदा भोते, सब शुना। 2 यहोवा सब कौमन पुड़ क्रोध केरि राहोरोए, ते तैन केरि सैरी सेना पुड़ अपनो क्रोध भड़कोरोए, तैनी तैना सत्यानाश भोने, ते मरनेरे लेई दुश्मनेरे हथ्थे छ़डोरेन। 3 तैन केरे मर्रोरे शारे गाले, ते तैन केरि लाशां केरी मुशक च़लेली; पहाड़ तैन केरे खूने सेइं भेरोई गालू। 4 अम्बरेरे सारे तारे गेली गाले ते आसमान काकलेरू ज़ेरू पलैट्टू गालू। ते ज़ेन्च़रे दाछ़रां ते फैगेरे बुट्टेरां पट्लां शुकतां बिछ़ड़ी गातन, तेन्च़रे अम्बरेरे सारे तारे आंधरे भोइतां खतम भोइ गाले।*

5 किजोकि मेरी तलवार आसमाने मां खून पीतां रज़ोरीए; हेरा न्याय केरनेरे लेई तै एदोमे* पुड़, ते ज़ैन पुड़ मेरी लानते तैन पुड़ पेली। 6 इन तेन्च़रे भोल्हु कि ज़ेन्च़रे यहोवारी तलवार खूने सेइं भेरोरीए; तै चेर्भी सेइं ते गबड़ां ते थाव्वां केरे खूने सेइं, ते हुड़ां केरे गुर्दां केरि चेर्भी सेइं रज़ोरीए। किजोकि बोस्रा नगरे मां यहोवारू अक बलिदान ते एदोम मुल्खे मां बड़ी खून रेज़्ज़ी कियोरीए। 7 ते तैस सेइं साथी जंगली दांत ते बछ़ड़ां ते दांत तैन सेइं साथी मरेले, ते तैन केरो मुल्ख खूने सेइं भेरोई गालो ते तैट्ठेरी मित्ती चेर्भी सेइं ढेकोई गाली।

8 किजोकि बदलो घिन्नेरे लेई यहोवारी अक दिहाड़ी ते सिय्योनेरो मुकदमो लड़नेरे लेई अक साल च़ुनोरोए। 9 ते एदोमेरे दरिया राली सेइं ते तैसेरी मित्ती गन्धके मां बेदली गाली; तैसेरी ज़मीन ज़लती राल बेनि गाली। 10 तै रात दिहैड़ी न हिश्शेली; तैसेरो तू हमेशा च़लतो रालो। जुगे-जुगे तगर तै धरती उज़ाड़ पेवरीए राली। कोई तैस मरां भोइतां✝ 11 तैस मां धनेश ते शेइलां रालां ते बुल्‍लू ते कंव्वां आले बनाले ते यहोवा एदोमे पुड़ उलझनरू सूत ते बेरान भोनेरी साहल छ़डेलो।✝ 12 तैड़ी न रईस भोल्हे ते न कोई एरहो भोल्हो ज़ै हुकूमत केरनेरे लेई टिकी बटे; तैसेरे सारे हाकिम खतम भोइ गाले।✝

13 तैसेरे मेहलन मां कंटन बाले बुट, ते क़िलन मां शाढ्लह ते झ़ैल्‍लां लग्गेलां। तै गिद्दां केरि रानेरी ठार ते शुतुर्मुर्गां केरि ठार भोल्ही। 14 तैड़ी बेरान मुल्खेरे जीप गिद्दन सेइं साथी मिलतां बस्सेले ते बालन बाले जीप एक्‍की होरि कुजाले; तैड़ी लीलत नंव्वेरे जीप रानेरी ठार मैलतां आरामे सेइं राले।✝

15 तैड़ी मादा बुल्‍लू आले बनाली। ते तैड़ी ठूल देइतां ज़ाऊ देली, ते बच्‍चे कढेली ते अपने बच्‍चन अपने फंघन हैठ तैन केरि हिफाज़त केरेली। तैड़ी इल्‍ल भी एपनी मादा सेइं साथी जम्हां भोल्हे। 16 यहोवारी किताबी मां तोपतां पढ़ा, तैस मरां अक गल भी बिना पूरी भोवरे न राली, कोई बिना जोड़े न राली। किजोकि मीं एप्पु ऐह हुक्म दित्तोरोए ते तैसेरी आत्मा तैना अकोट्ठे कियोरेन। 17 यहोवा तैन केरे लेई चिट्ठी छ़डोरीए, तैन्नी अपने हथ्थे सेइं डोरी लेइतां तै मुल्ख तैन केरे लेई बेंटतां छ़डोरोए; तै हमेशा तैन्ना केरो रालो ते तैना पीढ़ी-पीढ़ी तगर तैस मां बस्सोरे राले।