1 अफ़सोस तैन पुड़ ज़ैना मद्दतरे लेई मिस्रे जो गातन ते घोड़न पुड़ भरोसो केरतन। ते ज़ैना रथ्थन पुड़ भरोसो रखतन किजोकि तैना बड़े आन, ते सुवारन पुड़, किजोकि तैना बड़े ताकतबरन, पन इस्राएलेरे पवित्र यहोवा पुड़ नज़र न केरन ते न यहोवारी तलाश केरन! 2 पन तै भी अक्लमन्दे तै दुख देलो, ते तै अपनु ज़ोवरू न टालेलो, बल्के उठतां बुराई केरनेबालां केरे घराने पुड़ ते अनर्थ केरनेबालां केरि मद्दत केरनेबालां केरे खलाफ खड़ो भोल्हो। 3 मिस्रेरे लोक परमेशर नईं; मैन्हु ही आन; ते तैन केरे घोड़े आत्मा नईं, मास ही आन। एल्हेरेलेइ ज़ैखन यहोवा अपनो हथ खड़ो केरेलो, तैखन मद्दत केरनेबाले ते मद्दत चानेबाले दूईये ठोकर खेइतां बिछ़ड़ी गाले, ते तैना सब अकोट्ठे नाश भोइ गाले।

4 फिरी यहोवा मीं सेइं एन ज़ोवं, "ज़ैस किसमे शेर या जुवान शेर ज़ैखन अपने शिकारे पुड़ गरज़तो भोए, ते पुहाल अकोट्ठे भोइतां तैसेरे खलाफ खड़े भोल्हे, फिरी भी तै तैन केरि आवाज़ी करां न डरेलो ते न तैन केरि शौरी करां डेरतां च़ुप केरेलो, तैस्से किसमे सेना केरो यहोवा, सिय्योन पहाड़े पुड़ ते यरूशलेमेरे पहाड़े पुड़ जंग केरनेरे लेई उतरेलो। 5 फंघां खिलैरतां च़ुड़ोलवेरो ज़ेरो सेना केरो यहोवा यरूशलेमेरी हिफाज़त केरेलो; तै तैन केरि हिफाज़त केरतां बच़ालो, तै तैन दुश्मन्न करां बच़ालो।"

6 हे इस्राएली लोकव, ज़ेसेरे खलाफ तुसेईं बड़ी बगावत कियोरीए, तैस्सेरे पासे फिरा। 7 ज़ैखन तुस तैसेरे पासे फिरेले तैस मौके तुसां लोक सोन्नेरी ते चैंदरी एपनी-एपनी मूरतन करां ज़ैना तुसेईं बनेइतां पापी भोवरेथ नफरत केरेले। 8 तैखन अश्शूर तैस तलवारी सेइं हाराव गालो, ज़ै तलवार मैन्हेरी बनोरी नईं, तैए तलवार ज़ै मैन्हेरी नईं तैन नाश केरतां छ़डेली, ते तैना तलवारी करां नश्शेले, ते तैसेरे जुवान गुलाम बनाए गाले। 9 तैन केरो राज़ो डरके मारे अपने खूबसूरत मेहले मरां नशेलो, ते तैसेरे अधिकारी डेरतां झण्डे शैरतां नश्शेले, यहोवारी अग सिय्योने मां ते भट्ठी यरूशलेम नगरे मांए, यहोवारू एन ज़ोनूए।