यशायाह 24

परमेशरेरी तरफां ज़मीनरी बरबादी

1 शुना, यहोवा परमेशर ज़मीनी बेरान केरतां नाश केरनेबालोए, तै तैसेरे रानेबालन तितर-बितर केरेलो। 2 फिरी सेभी केरो हाल अक्‍कां ज़ेरो भोल्हो; याजकेरो हाल आम मैन्हु केरो ज़ेरो ते मालिकेरो हाल नौकरेरो ज़ेरो ते मालकिनरो हाल नौकरेनरो ज़ेरो; ते ज़ेरो बेच़ने बालेरो हाल घिन्ने बालेरो ज़ेरो, ते ज़ेरो ओधार नेने बालेरो तेरहो ओधार देनेबालेरो, ते ज़ेरो हाल सूत नेने बालेरो ते तेरहो सूत देनेबालेरो हाल भोल्हो। 3 धरती बिलकुल खाली ते सत्यानाश भोइ गाली; किजोकि यहोवा एन ज़ोवरूए। 4 धरती मातम केरेली ते शुक्‍की गाली, दुनियारी फसल बरबाद ते शुक्‍की गाली; दुनियारे महान लोक भी बरबाद भोइ जे। 5 धरती अपने रानेबालां केरे ज़िरिये अशुद्ध भोइ गाली, किजोकि तैनेईं कानूनेरे बगावत कियोरीए, ते विधि बेदली, ते सनातन करार ट्लोड़ी छ़डो। 6 एल्हेरेलेइ ज़मीनी लानत निगलेली ते तैस मां रानेबाले दोषी ठहरेले, ते एल्हेरेलेइ ज़मीनरे लोक भस्म भोइ गाले, ते थोड़े ज़ेरे लोक बाकी राले, ते थोड़े लोक रेइ गाले। 7 नंव्वो दाछ़रो रस भी शुकतां खतम भोइ गालो, ते दाछ़रो डाल भी शुक्‍की गालो, ते ज़ेत्रे मने मां आनन्द केरतन तैना सब ओशा छ़डेले। 8 ढेपलरी आनन्देरी आवाज़ बन्द भोइ गाली, खुश भोनेबालां केरि शोर च़ली गाली सुख देनेबाली सितारारी आवाज़ च़ुप भोइ गाली।✝24:8 यहे. 26:13;प्रका. 18:22. 9 तैना गीतां ज़ोंते बार दाछ़रो रस न पीले, ते पीने बालन शराब ट्लिठी लग्गेली। 10 गड़बड़ी केरनेबालू नगर नाश भोइ गालू, ते तैसेरू हर अक घर एन्च़रे बन्द कियूं गालू कि कोई अन्तर गेइ न सकेलो। 11 सड़कन मां लोक दाछ़रे रसेरे लेई चिन्डां मारेले, ते आनन्द खतम भोइ गालो, मुल्खेरी हर खुशी बन्द भोइ गाली। 12 नगर उज़ड़ोरू रालू, ते तैसेरे फाटक ट्लोड़तां नाश किये गाले। 13 किजोकि ज़मीनी पुड़ मुल्खे-मुल्खेरे लोकन मां एरू भोल्हु ज़ेन्च़रे कि ज़ैतूनेरे फल बिछ़ड़नेरे वक्ते, या ट्लोड़नेरे बाद कोई-कोई फल च़लो गाते।

14 तैना बच़ोरे लोक उच्‍ची आवाज़ी सेइं जयजयकार केरेले, ते यहोवारी महिमा हेरतां समुन्दरेरे आसे पासे रानेबाले लोक नहरे देले। 15 एल्हेरेलेइ पूर्वे मां रानेबाले लोकव यहोवारी तारीफ़ केरा, ते समुन्दरेरे जज़ीरन मां परमेशर यहोवा इस्राएलेरे नंव्वेरी तारीफ़ केरा।✝24:15 मला. 1:11;यशा. 42:10. 16 धेरतरे एक्‍की पासेरां असन इन गीत शुनोते, कि धेर्मेरी महिमा ते तारीफ़ भोए। पन मीं ज़ोवं, "अफ़सोस, अफ़सोस! अवं नाश भोइ जेव, नाश! किजोकि धोखेबाज़ धोखो केरतन, तैना बड़ो धोखो केरतन।"

17 हे दुनियारे राने बालाव तुश्शे लेई डर ते खड्डो ते फंदोए!✝24:17 लूक. 21:35. 18 ज़ै कोई डरेरी आवाज़ शुन्तां नेश्शी गालो, तै खड्डे मां बिछ़ड़ी गालो, ते ज़ै कोई खड्डे मरां निस्सी गालो, तै फंदे मां फेसी गालो, किजोकि अम्बरेरी दैरी खुल्‍ली गैली, ते धेरतरी बुनियादां हिलेइ गैली। 19 ज़मीन फेटतां टुक्ड़े-टुक्ड़े भोइ गाली ते ज़मीन बड़ी कम्बने लगोरीए।✝24:19 नहू. 1:5. 20 धरती शराबी मैन्हेरी ज़ेरि बड़ी थरकेली ते छपरेरी ज़ेरि हिल्‍लेली; तै अपने पापेरे भारे सेइं देबोइतां बिछ़ड़ेली ते फिरी न खड़ी भोल्ही।

21 तैस मौके एरू भोल्हु कि यहोवा अम्बरेरी सेना अम्बरे मां ते धेरतरे राज़न धेरती पुड़ सज़ाह देलो। 22 तैना कैदी केरे ज़ेरे खड्डे मां अकोट्ठे किये गाले ते कैदखाने मां बन्द किये गाले; ते बड़े दिहाड़ां केरे बाद तैन केरि सज़ाह दित्ती गाली। 23 तैखन चाँदनी आंधरी भोल्ही ते दिहाड़ेरी लौ घेटी गाली; किजोकि सेना केरो यहोवा सिय्योन पहाड़े पुड़ ते यरूशलेम नगरे मां अपने लोकां केरे बुज़ुर्गां केरे सामने प्रतापे सेइं साथी राज़ केरेलो।