Êxodo 15

मूसेरू ज़ींतरू गीत

1 मिस्रेरे लोक समुन्दरे मां डुबनेरां बाद मूसे ते इस्राएली लोकेईं यहोवारे लेई इन गीत ज़ोवं। तैनेईं ज़ोवं,

"अवं यहोवारू गीत ज़ोइलो, किजोकि तै महाप्रतापी भोवरोए;

घोड़न सने सुवार तैनी समुन्दरे मां छ़डोरेन।

2 यहोवा मेरी ताकत ते मेरू भजने,

ते तैए मीं मुक्ति देनेबालो भी भोव;

ते तैए मेरो परमेशरे, अवं तैसेरी बडीयाई केरेलो,

(अवं तैसेरे लेई रानेरी ठार बनेइलो) मेरे बुज़ुर्गां केरो परमेशर तैए आहे,

अवं तैसेरी तारीफ़ केरेलो।

3 यहोवा जंग केरनेबालोए

तैसेरू नवं यहोवाए।

4 फ़िरौनेरे रथां ते सेना तैने लाल समुन्दरे मां छ़डी;

ते तैसेरे रोड़े करां रोड़े रथ च़लानेबाले लाल समुद्रे मां डुब्बी जे।

5 डुग्घे पैने तैना छ़ुपेई छ़डे;

तैना घोड़ेरे ज़ेरे डुग्घे ठारी मां डुब्बी जे।

6 हे यहोवा, तेरो देइनो हथ शेक्ति मां महाप्रतापी भोव, हे यहोवा,

तेरो देइनो हथ दुश्मन्न चकनाचूर केरते।

7 तू अपनि खलाफत केरनेबालन अपने महाप्रतापे सेइं बिछ़ोड़तस:

तू अपनि सरक भड़कातस, ते तैना भूंसेरे ज़ेरे भस्म भोइ गातन।

8 तेरे नक्‍केरे सांसे सेइं पानी अकोट्ठू भोवं,

पैनेरी गड्डां ढेरेरी ज़ेरि रुकी जेई;

समुद्रेरे मझ़ाटे डुग्घू पानी ज़ेम्मी जेवं।

9 दुश्मने ज़ोवरू थियूं,

अवं पीछो केरेलो, अवं गेइतां नाश केरेलो,

अवं लुटोरो माल बन्टेलो,

तैन सेइं मेरो दिल भेरोई गानोए।

अवं अपनि तलवार खिचतां अपने हथ्थे सेइं तैन नाश केरेलो।

10 तीं अपने सांसेरो बात च़लाव,

तैखन समुद्रे तैना ढेक्‍की छ़डे;

तैना समुद्रे मां सीसा धातरे ज़ेरे डुब्बी जे।

11 हे यहोवा, देबतन मां तेरे बराबर कौने?

तू त पवित्र भोनेरे वजाई सेइं महाप्रतापीस,

ते अपनि बडीयाई केरनेबालां केरे लेई डरेरे काबल आस,

ते चमत्कार केरने बालोस।

12 तीं अपनो देइनो हथ अग्रोवं कियो,

ते ज़मीनां दुश्मन निगली छ़डे।

13 अपनि दयाई सेइं तीं अपने छुटेवरे लोकां केरि अगवाई कियोरीए,

अपने ताकती सेइं तू तैस अपने पवित्र रानेरी ठारी जो च़लोरोस।

14 मुल्खे-मुल्खेरे लोक शुन्तां थरकेले;

पलिश्ती लोकां केरी जान प्राणन पुड़ एवरी।

15 एदोमेरे प्रधान बेदिल भोल्हे;

मोआबेरे अगुवे थरकने लगे;

सब कनानेरे रानेबालां केरो दिल गेली गानोए।

16 तैन डर ते घबराहट भोनीए;

तेरे हथ्थेरे ताकती सेइं तैना घोड़ेरे ज़ेरे बेजान भोनेन,

ज़ांतगर, हे यहोवा, तेरी प्रजारे लोक निस्सन न,

ज़ांतगर तेरी प्रजारे लोक ज़ैना तीं घिन्नोरेन।

17 तू तैन पुज़ेइतां अपने हिस्सेरे पहाड़े पुड़ बसालो,

ई तैए ठारे

हे यहोवा ज़ै तीं अपने रानेरे लेई बनेवरीए,

ते तैए पवित्र ठारे ज़ै,

हे प्रभु, तीं एप्पु कायम कियोरीए।

18 यहोवा हमेशा राज़ केरतो रालो।"

19 इन गीत ज़ोनेरी वजाई ई आए, कि फ़िरौनेरे घोड़े रथ्थन ते सुवारन समेत समुद्रे मां च़लोरे थिये, ते यहोवा तैन पुड़ समुन्दरेरू पानी छ़डेरूए; पन इस्राएली समुद्रेरे मझ़ाटे शुकोरे ज़मीनी पुड़मेइं च़ले जे।

मिर्यामरू गीत

20 तैखन हारूनेरी बेइन मिर्याम नव्वेंरी नबिया, अपने हथ्थे मां डफली घिन्तां अई, ते सब कौन्शां डफली ट्लेइतां नेच़तां तैस पत्ती च़ेलि। 21 ते मिर्याम तैन साथी एन गीत ज़ोने लगी कि:

"यहोवारे लेई गीत ज़ोथ, किजोकि तै महाप्रतापी भोवरोए;

घोड़न सने सुवार तैनी समुद्रे मां डोबोरेन।"

ट्लिठू पानी मिट्ठू बनानू

22 तैखन मूसे इस्राएली लोक लाल समुन्दरे करां अग्रोवं निये, ते तैना शूर नंव्वेरे जंगले मां आए; ते जंगले मां च़लते-च़लते तैन पैनेरो नाग न मैल्हो। 23 फिरी मारा नव्वेंरे ठारी पुड़ पुज़्ज़े, तैट्ठेरू पानी ट्लिठू थियूं, तैस तैना पी न बटे, एस वजाई सेइं तैस ठारारू नवं मारा *15:23 मारा मतलब ट्लिठूपेवं। 24 तैखन तैना इन ज़ोइतां मूसेरे खलाफ गल्‍लां केरने लगे, "अस कुन पीम?" 25 तैखन मूसा यहोवा कां फरियाद की, ते यहोवा तैस एक्‍की बूटेरे बारे मां ज़ोवं, ज़ैखन तैनी तै बूटो पैनी मां छ़डो त तैखन पानी मिट्ठू भोइ जेवं। तैड़ी यहोवा तैन केरे लेई अक विधि ते कानून बनाव, ते तैड़ी तैने इन ज़ोइतां तैन केरि अज़मैइश की, 26 "अगर तू अपने परमेशर यहोवारू वचन तने मने सेइं शुनस, ते ज़ैन तैसेरी नज़री मां ठीके तैन्ने केरस ते तैसेरे हुक्मन पुड़ कन लास ते तैसेरे सब विधन मन्नस, त ज़ेत्रे रोग मीं मिस्रन पुड़ भेज़ोरेन तैन मरां अक भी तीं पुड़ न भेज़ेलो किजोकि अवं तुश्शो बझ़ाने बालो यहोवा आईं।"

27 तैखन तैना एलीमे*15:27 एलीमे एलीम अक जगाह थी। जो आए, ज़ैड़ी पैनेरे 12 चशमे ते खजूरेरे 70 बुट थिये ते तैड़ी तैनेईं पैनेरे नेड़े अपने डेरे लाए।