निर्गमन 13

ज़ेठां केरू अर्पण

1 फिरी यहोवाए मूसे सेइं ज़ोवं, 2 "तुसन इस्राएलन मरां हर अम्मरे ज़ेठे बच्‍चे मेरेन, चाहे तैना मैन्हु केरे भोन चाहे तैना जानबरां केरे भोन तैना मेरे लेई पवित्र मेन्नथ।"

3 फिरी मूसे लोकन सेइं ज़ोवं, "ई दिहाड़ी याद रखा, ज़ैस मां तुस लोक गुलैमरे मुल्ख यानी मिस्र मुल्खे मरां निस्तां एवरेथ; यहोवा त तुस तैट्ठां अपने हथ्थेरे ताकती सेइं केढतां आनोरेथ, एसमां खमीरी रोट्टी न खेइयथ। 4 अबीब महीने मां अज़्ज़ेरे दिहाड़े तुस निसोरेथ। 5 एल्हेरेलेइ ज़ैखन यहोवा तुसन कनानी, हित्ती, एमोरी, हिब्बी ते यबूसी लोकां केरे मुल्खे मां पुज़ालो, ज़ैस देनेरी तैनी तुश्शे सियानन सेइं कसम खेवरी थी, ते ज़ैस मां दुद्ध ते मैछ़ेरी गड्डां*13:5 दुद्ध ते मैछ़ेरी गड्डां फलदार ज़मीन बेगचन, तैखन तुस इस्से महीने मां ई गल याद केरतां एन तिहार मनेइयथ। 6 सत दिहाड़न तगर अखमीरी रोट्टी खेइयथ, फिरी सत्तोवं दिहाड़े यहोवारे आदर केरनेरे लेई तिहार मनेइयथ। 7 एन सत्ते दिहाड़न मां अखमीरी रोट्टी खाइ गाए, बल्के तुश्शे मुल्खे मां न खमीरी रोट्टी ते न खमीर तुसन कां लेइहोरू लोड़े। 8 ते तैस दिहाड़े तुस अपने-अपने बच्‍चन इन ज़ोइतां समझ़ेइयथ, कि एन त अस तैस्से कम्मेरे वजाई सेइं केरतम कि, ज़ैन यहोवा इश्शे मिस्र मुल्खे मरां कढनेरे मौके इश्शे लेई कियोरू थियूं। 9 ते इन तिहार मनानू तुश्शे लेई तुश्शे हथ्थे मां बन्धोरो अक निशान भोनोए, ते तुश्शे कुपाए पुड़ बन्धोरो यहोवारो कानून तुश्शे ज़बानी पुड़ राए, किजोकि यहोवा तुस अपने शेक्तिबाले हथ्थे सेइं मिस्र मुल्खेरां आनोरेथ। 10 एस वजाई सेइं तुस इस विधि हर साल ठीक वक्ते पुड़ मनेइयथ।

ज़ेठां केरो नियम

11 "फिरी ज़ैखन यहोवा तैस कसमरे मुताबिक ज़ै तैनी तुश्शे बुज़ुर्गन सेइं ते तुसन सेइं खेवरीए, तुसन कनानी लोकां केरे मुल्खे मां पुज़ेइतां तुसन तै देलो। 12 तैखन तुसन मरां ज़ेत्रे अपने-अपने अम्मरे ज़ेठे भोल्हे तैन्न, ते तुश्शे जानबरन मां ज़ैना भोल्हे तैन्न भी यहोवारे लेई अर्पण केरथ, सब नर बच्‍चे त यहोवारे आन। 13 ते गधेरे सब ज़ेठे केरे बदले*13:13 गधेरे सब ज़ेठे केरे बदले छुटानेरे लेई गबड़ेरू बलिदान कबूले पन गधेरी बलि परमेशरेरे लेई कबूल नईं। गबड़ू देइतां तैन छुटेइयथ, फिरी अगर तुस तैस छुटाने न चाथ त मुन्डू बड़ देइतां मैरी छ़ेडथ। पन अपना सब पैलोठां मट्ठां केरो बदलो देइतां छुटेइयथ। 14 ते एजने बाले दिहाड़न मां ज़ैखन तुश्शां मट्ठां तुसन पुछ़न, इन एरू किजो आए। त तैन सेइं ज़ोइयथ, यहोवा अस लोक गुलैमरे घरे मरां मतलब मिस्र मुल्खे मरां अपने ताकती बाले हथ्थे सेइं केढतां आनोरेम। 15 तैस मौके ज़ैखन फ़िरौने सखत भोइतां अस गाने न दित्ते, तैखन यहोवाए मिस्र मुल्खे मां मैन्हु करां जानबरन तगर सेब्भी केरे ज़ेठे नर मैरी छ़डे। एस वजाई सेइं जानबरन मरां ज़ेत्रे अपने-अपने अम्मा केरे ज़ेठे नर आन, तैन अस यहोवारे लेई बलि केरतम, पन अपने सब ज़ेठे मट्ठां केरो असां जानबरेरो नर बच्‍चो बदलो देइतां छुटातम। 16 ई तुश्शे हथ्थन पुड़ ते तुश्शे कुपाए पुड़ अक बन्धोरो निशान भोल्हो, किजोकि यहोवाए असां लोक मिस्र मुल्खे मरां अपने हथ्थां केरे ताकती सेइं केढतां आनोरेम।"

जंगलेरी बत

17 ज़ैखन फ़िरौने लोकन गानेरो हुक्म दित्तोरो थियो, तैखन परमेशरे तैना पलिश्ती लोकां केरे मुल्खे मांमेइं गाने बैली बत्ती मां ज़ै निकड़ी बत थी, तैस बत्तां न ने, किजोकि परमेशरे ज़ोवं कि कोन्च एरू न भोए, कि ज़ैखन एना लोक लड़ाई हेरन तैखन पशतेइतां मिस्र मुल्खे जो वापस गान। 18 एल्हेरेलेइ यहोवा तैना घुमेइतां लाल समुन्दरेरे सुनसान ठारारी बत्तां च़लाए, ते इस्राएली मझ़ बेन्धतां मिस्र मुल्खे मरां सेनारे ज़ेरे निस्सी जे।*13:18 सेनारे ज़ेरे निस्सी जे इस्राएली लोक सेना दलेरे ज़ेरे निस्से ते अपने-अपने कुले जो जे। 19 ते मूसे यूसुफेरी हेड्डी भी साथी नेही, किजोकि यूसुफे इस्राएली लोकन कसम खुवेइतां एन ज़ोवरू थियूं, यहोवा ज़रूर तुश्शी मद्दत केरेलो, ते ज़ैखन तै तुश्शी मद्दत केरेलो तैखन तुस मेरी हेड्डी भी इट्ठां साथी नेइयथ। 20 फिरी तैनेईं सुक्‍कोते मरां निस्तां सुनसान ठारारे पासे एताम नंव्वेरे जगाई डेरे लाए।

बिदलारारो खम्भो ते अग्गरो खम्भो

21 ते यहोवा तैन दीसां बत हिरानेरे लेई बिदलारारे खम्भे मां ते राती लौ देनेरे लेई अग्गरे खम्भे मां भोइतां तैन अग्री-अग्री च़लतो थियो ताके तैना राती भी ते दीसां भी च़ेलि बटन। 22 एन्च़रे सेइं यहोवा न त बिदलारारो खम्भो दीसां ते न अग्गरो खम्भो राती लोकां केरे सामनेरां दूर कियो।