निर्गमन 5

फ़िरौनेरे सामने मूसा ते हारून

1 तैसेरे बाद मूसा ते हारूने गेइतां फ़िरौने सेइं ज़ोवं, "इस्राएलेरो परमेशर यहोवा एन ज़ोते, ‘मेरे लोकन गाने दे; ताके तैना बियाबाने मां मेरे लेई तिहार मनान।’" 2 फ़िरौने ज़ोवं, "यहोवा कौने कि अवं तैसेरी गल मेनतां इस्राएली लोकन गाने देईं? अवं यहोवा न ज़ैनी एल्हेरेलेइ अवं इस्राएली लोकन गाने न देइलो।" 3 तैखन मूसा ते हारूने ऐह जुवाब दित्तो, "इब्रानी केरे परमेशरेरी असन सेइं मुलाकात भोवरीए; एल्हेरेलेइ असन ट्लेइ दिहाड़ां केरू पैदल सफर केरतां सुनसान ठारी मां गेइतां यहोवारे लेई बलिदान केरने लेई गाने दे; एरू न भोए कि तै असन पुड़ महामारी भेज़े या तलवारी सेइं मैरतां सज़ाह दे।" 4 तैखन मिस्रेरे राज़े तैन सेइं ज़ोवं, "हे मूसा ते हारून, तुस किजो एन लोकन कम्मे करां छुटाने लगोरेथ? तुस गेइतां तैन कम केरा ज़ैन तुसन दित्तोरूए।" 5 फिरी फ़िरौने एन भी ज़ोवं, "कि हेरा एना लोक इस मुल्खे मां हछ्छे भेवरेन। ते तुस एन केरे भारी कम्मे करां आराम करानो चातथ!"

फ़िरौन लोकन सज़ाह देते

6 फ़िरौने तैस्से दिहाड़े निगरानी रखनेबाले प्रधान्न हुक्म दित्तो; ज़ैना तैन लोकन पुड़ रखोरे थिये, 7 "कि हुनी तुस एन लोकन इट्टां बनानेरे लेई भूंस न देइयथ; ज़ेन्च़रे अज़ तगर देते राए, तैना एप्पु गेइतां एप्पु जेई भूंस अकोट्ठो केरन। 8 ते तैन करां तेत्री इट्टां बनावेइयथ, ज़ेत्री तैना पेइले बनाते एवरेन, तुस तैन मरां किछ न घटेइयथ, किजोकि तैना बड़े आलसी आन; एल्हेरेलेइ तैना चिन्डां मैरतां ज़ोतन कि असन गाने देथ, कि असां अपने परमेशरेरे लेई बलिदान केरम। 9 तैन लोकन करां जादे सखत सेवा कराई गाए, ताके एना झूठी गल्‍लन पुड़ ध्यान न देन ते मेहनत केरते रान।"

10 तैखन निगरानी केरने बालेईं ज़ैना लोकन पुड़ प्रधान थिये; गेइतां तैन सेइं ज़ोवं, "कि फ़िरौने ज़ोवरूए, ‘अग्रोवं जो अवं तुसन भूंस न देईं। 11 तुस एप्पु गाथ ते ज़ैड़ी कोन्च तुसन भूंस मैलते तैट्ठां आनां; पन तुश्शू कोई भी कम न घटेलू।’" 12 एल्हेरेलेइ तैना लोक सारे मिस्र मुल्खे मां फिरने लगे कि तैना भूंस जम्हां केरन। 13 निगरानी रखनेबाले एन ज़ोइतां दबाव बनाने लगोरे थिये, कि तुस अपनु रोज़ेरू कम ज़ेत्रू भूंस मैलतां केरते थिये, हुनी भी तेन्च़रे केरा। 14 ते इस्राएली लोकन मरां ज़ैना निगरानी केरनेबाले फ़िरौनेरे प्रधान रखोरे थिये; तैन बड़ी मार बज़्ज़ी ते तैन पुछ़ू, "तुसेईं पेइलेरी ज़ेरि हीज ते अज़ पूरी-पूरी इट्टां कि नईं बनावेई?"

15 तैखन इस्राएली प्रधान फ़िरौने कां गेइतां मिन्नत केरतां ज़ोने लगे, "तू अपने सेवकन सेइं एरहो ज़ेरो बर्ताव किजो केरने लगोरोस। 16 तेरे सेवकन त भूंस नईं लेवरो दित्तो गाने, ते तैना असन सेइं ज़ोंते रहतन कि इट्टां बनाथ, एन्च़रे ज़ोइतां तेरे सेवकन मार भी देतन। हेरू गाए त कसूर तेरे लोकां केरोए।" 17 पन फ़िरौने जुवाब दित्तो, "तुस आलसी आथ; एल्हेरेलेइ तुस लोक ज़ोते रहतथ कि असन गाने देथ कि यहोवारे लेई बलिदान केरम। 18 हुनी गाथ ते कम केरा, तुसन भूंस न दित्तो गालो; फिरी भी तुसेईं इट्टां तेत्री बनैनी पेनिन।" 19 ज़ैखन इस्राएली प्रधानेईं एन शुनू; कि तुस एपनी इट्टां रोज़ेरे कम्मे मां किछ भी घट न केरि बटेले; तैखन तैनेईं बुझ़ू कि तैना केत्रे मुसीबती मां फसोरेन। 20 ज़ैखन तैना फ़िरौने करां वापस एवरे थिये; त मूसा त हारून तैन सेइं मिलनेरे लेई बत्ती मां खड़े थिये। 21 तैखन तैनेईं मूसा ते हारूने सेइं ज़ोवं, "यहोवा तुसन हेरतां तुश्शो न्याय केरे, किजोकि तुसेईं असां फ़िरौनेरे ते तैसेरे सेवकां केरे नज़री मां बुरे बनेवरेम कि इश्शे मारनेरे लेई तलवार तैन केरे हथ्थे मां दित्तोरीए।"

मूसा परमेशरे सेइं शिकायत केरते

22 फिरी मूसे वापस यहोवा कां एइतां ज़ोवं, "हे प्रभु तीं इन लोकन सेइं एरी बुराई किजो की, ते तीं अवं किजो भेज़ो। 23 ज़ेइसेरो देंतो अवं फ़िरौने कां तेरे नंव्वे सेइं गल्‍लां केरनेरे लेई जेव, तैखन करां ऐह तेरे लोकन पुड़ बुरो बर्ताव केरि राहोरोए, ते तीं अपने लोक न छुटाए।"