च़ोरारे बारे मां नियम
1 "अगर कोई मैन्हु दांत या भैड या छ़ेल्ली च़ोरतां तैस मारे या बेच़ी छ़डे, त तै दांतेरे बदले पंच़ दांत, ते भैड्डां-छ़ेल्ली केरे बदले च़ेवर भैड्डां-छ़ेल्ली भरे। 2 अगर च़ोर राती च़ोरी केरतो ट्लाव गाए, त तैस एरी मार बज़्ज़े कि मेरि गाए, त तैसेरे मारनेरो दोष न लग्गेलो; 3 अगर दिहाड़ो निस्सोरो भोए, त तैसेरे मारनेरो दोष लग्गेलो, ज़रूर तै च़ोरारो बदलो भेरि दे, ते अगर तैस कां किछ न भोए, त च़ोरारे बदले तै बेच़ो गाए। 4 अगर च़ोरी कियोरो दांत, या गधो, या भैड या छ़ेल्ली तैसेरे हथ्थे मां ज़ींती मैल्ही गाए, त तै तैसेरो दुगनू भेरि दे।
फसलरे हिफाज़तरे बारे मां नियम
5 "अगर कोई अपने जानबरे करां केन्चेरी फसल या दाछ़री बाग खुवाए, मतलब अपने जानबरे छ़डे कि तै होरि केरू ऊडार च़ाराए, त तै अपने उडारेरी ते दाछ़रे बागरे रोड़े करां रोड़े फसली मरां तैस नुकसान भेरि दे।
6 "अगर कोई कोन्ची ठैरी अग लाए, ते तै कंटन मां लेगि गाए, ते फूड़ू केरो ढेर या फसल या फसलरू ऊडार फुकोई गाए, त ज़ैनी अग लेवरी भोए त तै नुकसान भेरि दे।"
अपने जाईदातरे बारे मां नियम।
7 "अगर कोई मैन्हु अपने पड़ोसी किछ रुपेइये या सामान रखनेरे लेई दे, ते तैन तैसेरे घरे मरां च़ोरी भोए, त अगर च़ोर ट्लाव गाए, त दुगनू तैनी भरनु पेनूए। 8 ते अगर च़ोर न ट्लेइयोए, त तैस घरेरो मालिक परमेशरे कां आनो22:8 परमेशरे कां आनो या न्याय केरनेबालन कां। गाए कि साबत भोए कि तैनी अपने पड़ोसेरे सामने हथ लेवरोए कि नईं। 9 चाहे दांत, या गधो, या भैड, या छ़ेल्ली, या लिगड़, या कोन्ची किसमेरी एरी हेरोरि चीज़रे बारे मां दोष लेवरो भोए, ज़ैस दूई ज़ने अपनि-अपनि ज़ोते भोन, त दूईये ज़नां केरो मुकदमो परमेशरे कां22:9 परमेशरे कां या न्याय केरनेबालन कां आनो गाए, ते ज़ैस परमेशर22:9 परमेशर या न्याय केरनेबाले दोषी ठहराए तै होरी जो दुगनू भेरि दे।
10 "अगर कोई अपने पड़ोसेरो गधो या दांत या भैड-छ़ेल्ली या कोई जानबर रखनेरे लेई दे, ते केन्चेरे बगैर हेरने तै मेरि गाए, या ज़खमी भोए, या कोई तैस खदाड़े। 11 त तैन दूईयां केरे दरमियान यहोवा परमेशरेरी कसम खुवाई गाए, ‘मीं एसेरी अमानती सेइं हथ नईं लेवरो;’ तैखन अमानतरो मालिक तैस सच़ मन्ने, ते होरि जो तैस करां किछ न भरनु पे। 12 पन अगर तै सच़्च़े तैसेरे तैट्ठां च़ोरोरो भोए, त तै जानबरेरे मालिके जो कीमत भरे। 13 ते अगर तै जंगली जानबरे मारोरो भोए, त तै मारोरो हिस्सो सबूतेरे लेई घिन्नी एज्जे, तैखन तैस तैसेरो नुकसान भरनो न पेलो।
14 "फिरी अगर कोई अपने पड़ोसी करां जानबर मेगतां आने, ते तैसेरो मालिक तैस सेइं साथी न भोए ते तै खिरकतां मेरि गाए, त तै ज़रूर तैसेरे नुकसान भरे। 15 अगर तैसेरो मालिक साथी भोए, त तैखन ज़ैने तै मगोरो भोए तैस नुकसान न भरनो पे, ते अगर तै किरैइये पुड़ भोए त तैसेरो नुकसान तैसेरे किरैइये मां एज्जी जेव।"
नैतिक ते धार्मिक नियम
16 "अगर कोई मड़द कोन्ची कुइये ज़ेसेरो रिश्तो न भोए भोवरो, टपलेइतां तैस सेइं कुकर्म केरे, त तै ज़रूर तैसेरी कीमत देइतां ड्लाहे। 17 तै अगर तैसारो बाजी तैस देनेरे लेई बिलकुल न मन्ने, त कुकर्म केरनेबालो कुइयरे मगनेरे रुवाज़ेरे मुताबिक रुपेइये तुलतां दे।
18 "तू जैदू-टूनो केरनेबाली कौन्शी ज़ींते न राने देइयां।
19 "ज़ै कोई जानबरे सेइं जिसमानी रिश्तो बनाए तै ज़रूर मारो गालो।
20 "ज़ै कोई यहोवा परमेशरेरे अलावा कोन्ची होरि देबतेरे लेई बलि केरे त तै सत्यानाश कियो गालो।
21 "तू परदेशी न सतेइयां ते न तैस पुड़ ज़ुलम केरां किजोकि मिस्र मुल्खे मां तुस भी परदेशी थिये। 22 कोन्ची विधवा कौन्शी या अनाथ बच्चे दुख न देइयां। 23 अगर तू एरे ज़ेरेन कोन्ची तरीके सेइं दुख देस, ते तैना मीं कां किछ भी फरियाद केरन, त अवं ज़रूर तैन केरि फरियाद शुनेलो। 24 तैखन मेरो क्रोध भड़केलो, ते अवं तुसन तलवारी सेइं मैरेलो, ते तुश्शी कौन्शां विधवा ते तुश्शां मट्ठां अनाथ भोल्हां।"
25 "अगर तू मेरे लोकन मरां कोन्ची गरीबे ज़ै तीं कां रहतो भोए, किछ रुपेइये ओधार देस, त तैस करां होरि केरू ज़ेरू सूत न नेइयां। 26 अगर तू कधी अपने पड़ोसी या रिश्तेदारेरां लिगड़ां बन्धे रख्खस त दिहाड़ी डुबने तगर वापस देइ छ़ेडां; 27 किजोकि तैन तैसेरू अक्के लानेरू लिगड़े, तैसेरे जानरू तैने लिगड़े, फिरी तैनी कुन छ़ुंहें घिन्तां झ़ुलनुए, ते ज़ैखन तै मीं कां फरियाद केरेलो, तैखन मीं तैसेरी शुन्नीए, किजोकि अवं त दया केरनेबालोईं।"
28 "परमेशरे22:28 परमेशर या न्याय केरनेबालन जो। जो लानत न देइयां, ते न अपने लोकां केरे प्रधाने जो लानत देइयां।
29 "अपने उडारेरी फसल ते फलां केरे रस्से मरां किछ मीं कां आन्नेरे लेई च़िर न लेइयां। अपने पेइले मट्ठे मींजो देइयां। 30 तेन्च़रे अपने बेछ़ी केरे ते भैड्डां-छ़ेल्ली केरे ज़ेठे बच्चे भी देइयां, ज़र्मेरे सत दिहाड़न तगर त बच्चे अपने अम्मा सेइं साथी राने देइयां, ते अठोवं दिहाड़े तू तैस मींजो देइयां।
31 "तुस मेरे लेई पवित्र मैन्हु बना, एस वजाई सेइं ज़ै जानबर धेरती पुड़ मारोरो बिछ़ड़ेरो मैल्हे तैसेरू मास न खेइयथ, तैन कुतरन कां शैरतां छ़ेडथ।"