निर्गमन 27

होमबलि देनेरी वेदी

1 "फिरी वेदी किकरेरी लेकड़री पंच़ हथ लम्मी ते पंच़ हथ बिल्‍ली बनावेइयां, वेदी च़ेवर कून्न बाली भोए, ते तैसारी ऊँचाई ट्लाई हथ भोए। 2 ते तैसेरे च़ेवरे कून्न पुड़ च़ेवर शिंगां बनावेइयां, तैना तैस समेत एक्‍की टुक्ड़ेरां भोन, ते तैस पितली सेइं मढ़वेइयां। 3 ते तैसेरी मांज़न सलनेरू भांड, ते बेलचे, ते कुटोरो, कंटे, ते एंवठी बनावेइयां; सारू सामान पितलरू बनावेइयां। 4 ते तैसेरे पितलरी जैलरी अक झंझरी बनावेइयां, ते तैसेरे च़ेवरे कून्न मां पितलरे च़ेवर कड़े लुवेइयां। 5 ते तैस झंझरी वेदरे च़ेवरे पासन कंगनी हैठ एन्च़रे लुवेइयां कि तै वेदरे उंचाईयरे मझ़ाटे तगर पुज़्ज़े। 6 ते वेदरे लेई किकरेरे लेकड़रे डण्डे बनावेइयां, ते तैन पितली सेइं मढ़वेइयां। 7 ते डण्डे कड़न मां छ़डे गान, कि ज़ैखन-ज़ैखन वेदी छ़ुई गाए तैखन तैना तैसेरे दूईये पासन रान। 8 वेदी तखतन सेइं खाली बनावेइयां, ज़ेरि तै इस पहाड़े पुड़ तीं हिरेवरूए तेरही ज़ेरि बनाई गाए।

पवित्र तेम्बेरू अंगन

9 "फिरी मिलापे बाले तेम्बेरू अंगन बनावेइयां। तैसेरे दक्षिणेरे पासेरे लेई बट्टोरी सूक्ष्म सनेरे कपड़ां केरे सेब्भी पड़दां केरे हिस्से मिलेइयां कि तैन केरि लम्बाई 100 हथ भोए; एक्‍की पासे त एत्रू भोए। 10 ते तैन केरे 20 खम्भे बन्न, ते एन केरे लेई पितलरी 20 कुर्सी बन्न, ते खम्भे केरे कुन्डे लाने ते तैन केरि पेट्टी चैंदरी भोन। 11 ते तैस्से तरीके सेइं अंगनेरे उत्तरेरे पासे लम्बाई मां भी 100 हथ लम्मे पड़दे भोन, ते तैन केरे भी 20 खम्भे ते तैन केरे लेई भी पितलरे 20 खम्भे केरे कुन्डे ते पेट्टी चैंदरी भोन। 12 फिरी अंगनेरी चौड़ाई मां पश्चिमेरे पासे 50 हथ पड़दे भोन, तैन केरे खम्भे 10 ते खाते भी 10 भोन। 13 पूरबेरे पासे अंगनेरी चौड़ाई 50 हथ भोए। 14 ते अंगनेरे दारेरे एक्‍की पासे 15 हथ पड़दे भोन, ते तैन केरे खम्भे ट्लाई ते खाते भी ट्लाई भोन। 15 ते होरि पासे भी 15 हथ पड़दे भोन, तैन केरे भी खम्भे ट्लाई ते खाते भी ट्लाई भोन। 16 अंगनेरे दारेरे लेई अक पड़दो बनावेइयां, ज़ै नीले, बैंगनी ते लाल रंगेरे कपड़े ते सूक्ष्म सनेरे कपड़े कढ़ाई केरतां 20 हथ भोन, तैसेरे खम्भे च़ेवर ते खाते भी च़ेवर भोन। 17 अंगनेरे च़ेवरे पासां केरे सब खम्भे चैंदरी पेट्टेइं सेइं ज़ुड़ोरी भोए, तैन केरे कुन्डे चैंदरे ते खम्भे पितलरे भोन। 18 अंगनेरी लम्बाई 100 हथ, ते तैसेरी चौड़ाई बराबर 50 हथ, ते तैसेरी कनातेरी ऊँचाई पंच़ हथ भोए, तैसेरी कनात, केत्तोरी उन्ना केरे कपड़ेरी बने, ते खम्भे खाते पितलरे भोन। 19 मिलापे बाले तेम्बेरां किसमे-किसमेरां भांडां ते सब सामान ते तैसेरे सब खुन्डे ते अंगनेरे भी सब खुन्डे पितलरे भोन।

दीयेरे लेई तेल

20 "फिरी तू इस्राएली लोकन हुक्म देइयां, कि मीं कां झ़ुसतां निस्सोरो ज़ैतूनेरो खालिस तेल ऐन्हां, ज़ैस सेइं दीयो हमेशा बलतो राए। 21 मिलापे बाले तेम्बु मां तैस मझ़ाटेरे पड़दे सेइं बेइर ज़ै गवैहरे सन्दूखे अग्गर भोल्हो, हारून ते तैसेरां मट्ठां ड्लोझ़रे देंते झ़ेझ़ां तगर यहोवारे सामने सज़ेइतां रखन। ई विधि इस्राएली केरे पीढ़ी केरे लेई हमेशा बनोरी राए।