1 फिरी यहोवा परमेशरे मूसे सेइं ज़ोवं, "अक होरि आफत अवं फ़िरौन ते मिस्र मुल्खे पुड़ छ़डेलो, तैसेरां बाद तै तुसन इट्ठां गाने देलो, ते फिरी ज़ैखन तै गाने देलो तैखन तुसन सेब्भन पक्‍को कढेलो। 2 मेरे लोकन मेरो ई हुक्म शुना, हर मड़द अपने-अपने पड़ोसी करां ते हर कौन्श एपनी-एपनी पड़ोसी कौन्शी करां सोन्ने ते चैंदरो गेहनो मग्गे।" 3 तैखन यहोवा परमेशरे मिस्री लोक अपने लोकन पुड़ महरबान किये। फिरी एसेरे अलावा मूसो, मिस्र मुल्खे मां फ़िरौनेरे नौकर ते प्रजारे लोकां केरि नज़री मां बड़ो महान थियो।

4 फिरी मूसे ज़ोवं, "यहोवा इन ज़ोते, लगभग एध्धी राती मिस्र मुल्खे मांमेइं अवं च़लेलो। 5 तैखन मिस्र मुल्खे मां तखते पुड़ बिशने बाले फ़िरौने करां देइतां ढ्लाट पीने बैली दैसी तगर सेब्भी केरां बड्डां मट्ठां बल्के जानबरां केरे भी सब बड्डे बच्‍चे मेरि गाले। 6 ते सारे मिस्र मुल्खे मां बड़े मातमेरि लेरां केरि शोर शुनोली, ज़ेरू कधी नईं भोवरू ते न कधी भोल्हु। 7 पन इस्राएली लोकां केरे खलाफ मैन्हु त कुन, कोन्ची जो कुतर भी न घुरकेलू, ज़ैस सेइं तुसन पतो लग्गे कि मिस्री ते इस्राएली लोकन मां अवं यहोवा फर्क केरताईं। 8 तैखन तेरे एना सब नौकर मीं कां एइतां झुकतां इन ज़ोले, ते अपने सेब्भी लोकन सने च़लो गा। फिरी तैसेरां पत्ती अवं निस्सी गानोईं।" एन ज़ोइतां मूसे बड़े क्रोध सेइं फ़िरौने करां च़लो जेव।

9 यहोवा परमेशरे मूसे सेइं ज़ोवरू थियूं, "फ़िरौन तुश्शी गल न शुनेलो, किजोकि मेरी मर्ज़ी ई आहे कि अवं मिस्र मुल्खे मां बड़े चमत्कार केरतां हेरेईं।" 10 मूसे ते हारूने फ़िरौनेरे सामने इनां सब चमत्कार किये, पन यहोवाए फ़िरौनेरो दिल सखत कियो, एल्हेरेलेइ तैनी इस्राएली अपने मुल्खे मरां गाने न दित्ते।