निर्गमन 14

इस्राएली लोक लाल समुन्दरे पार केरतन

1 यहोवाए मूसे सेइं ज़ोवं, 2 "इस्राएली लोकन हुक्म दे, कि तैना वापस मुड़तां मिग्दोल नगर ते समुद्रे मांमेइं पीहाहीरोत नगरेरे नेड़े बाल-सपोन नगरेरे सामने अपने डेरे खड़े केरन, तैसेरे सामने समुद्रेरे बन्ने अपने डेरे खड़े केरन। 3 तैखन फ़िरौन इस्राएली लोकां केरे बारे मां सोचेलो, ‘कि तैना सुनसान ठारारे उलझन्न मां फसोरे भोल्हे।’ 4 तैखन अवं फ़िरौनेरो दिल सखत केरेलो, ते तै तैन पत्ती खत्तेलो, तैखन फ़िरौन ते तैसेरी सारी सेनारे ज़िरिये सेइं अवं अपनि महिमा बधालो, ते मिस्री लोक ज़ानेले कि अवं यहोवा आईं।" ते तैनी एरू कियूं।

5 ज़ैखन मिस्र मुल्खेरे राज़े ऐह बिस्तार मैलो कि तैना लोक नश्शोरेन, तैखन फ़िरौन ते तैसेरे नौकरां केरो मन तैन केरे खलाफ बेदलोव, ते तैना ज़ोने लगे, "असेईं इन कुन कियूं, कि इस्राएली लोक अपने गुलैमी करां छुटेइतां हथरां छ़डे?" 6 तैखन तैनी अपनु रथ तियार कराव ते अपनि सेना भी साथी नी। 7 तैनी 600 रोड़े करां रोड़ां रथां मतलब मिस्रेरे सब रथां नियां ते तैन सेब्भन पुड़ प्रधान बिशाले। 8 फिरी यहोवा परमेशरे मिस्रेरे राज़े फ़िरौनेरो दिल सखत कियो, एल्हेरेलेइ तैनेईं इस्राएली लोकां केरो पीछो कियो पन इस्राएली त बेधड़क निस्तां च़लोरे थिये। 9 पन मिस्री सेना फ़िरौनेरे सब घोड़न, ते रथ्थन, ते सुवारन सने पीछो केरतां इस्राएली लोकन कां पुज़्ज़े, ज़ैनेईं पीहाहीरोतेरे नेड़े, बाल-सपोनेरे सामने, समुद्रेरे बन्ने पुड़ डेरे लेवरे थिये।

10 ज़ैखन फ़िरौन नेड़े पुज़्ज़ो, तैखन इस्राएली लोकेईं सामने कुन हेरू, कि मिस्री लोक इश्शो पीछो केरने लगोरेन, ते इस्राएली बड़े डेरि जे, ते चिन्डां मैरतां यहोवा याद कियो ते ज़ोने लग्गे कि इश्शी मद्दत केर। 11 ते तैना मूसे सेइं ज़ोने लगे, "कुन मिस्र मुल्खे मां कब्रां न थी कि तू असन तैट्ठां मरनेरे लेई इस बियाबान ठैरी मां घिन्तां आनोरेम? ते तीं असन सेइं कुन कियूं कि अस मिस्र मुल्खे मरां केढतां आने? 12 कुन अस तीं सेइं मिस्र मुल्खे मां एना गल्‍लां न थिये ज़ोते, कि असन राने दे, कि अस मिस्री लोकां केरि सेवा केरम? इश्शे लेई सुनसान ठैरी मां मरने करां मिस्री केरि सेवा केरनि रोड़ी थी।" 13 मूसे लोकन जुवाब दित्तो, "डरा न, खड़े-खड़े यहोवारी मुक्ति हेरा ज़ै अज़ तुश्शे लेई केरेलो। ज़ैना मिस्री लोक तुस अज़ लहतथ, तैन फिरी कधी न लाहेले। 14 यहोवा एप्पु तुश्शे लेई लड़ेलो, एल्हेरेलेइ तुस च़ुपच़ारे राथ।" 15 तैखन यहोवाए मूसे सेइं ज़ोवं, "तू किजो मीं कां बिनती केरने लगोरोस? इस्राएली लोकन ऐह हुक्म दे कि इट्ठां अग्रोवं च़लन। 16 ते तू अपनि सोटी अग्रोवं केरतां अपनो हथ समुद्रेरे पासे रख, ते तै दूई हिस्से भोइ गानोए; तैखन इस्राएली लोक समुद्रे मझ़मेइं शुक्‍कोरी ज़मीनी पुड़मेइं च़लेले। 17 ते शुन, अवं एप्पु मिस्री केरे दिल सखत केरताईं, ते तैना तैन केरो पीछो केरते समुद्रे मां गाले, तैखन फ़िरौन ते तैसेरी सेना, ते तैन केरे रथां ते सुवारां केरे ज़िरिये सेइं मेरी महिमा भोनीए। 18 ते ज़ैखन फ़िरौन ते तैसेरे रथ, ते सुवारां केरे ज़िरिये सेइं मेरी महिमा भोनीए, तैखन मिस्री लोक ज़ानेले कि अवं यहोवा आईं।"

19 तैखन परमेशरेरो दूत ज़ै इस्राएली सेनारे अग्री-अग्री च़लतो थियो तैन केरे पत्ती बिदलारारो खम्भो तैन केरे अगरां निस्तां तैन केरे पत्तर गेइतां खेड़ोव। 20 एस तरीके सेइं तै मिस्री केरि सेना ते इस्राएली लोकां केरि सेनारे मझ़ाटे अव; ते बिदलारी सेइं आंधरू भोवं, पन फिरी भी तैस राती तैन बिदलारी मरां लौ मैलती राई, ते तैना सैरी राती एक्‍की होरि कां न आए।

21 तैखन मूसे अपनो हथ समुद्रेरे पासे रख्खो, ते यहोवाए सैरी राती पूर्वेरे पासेरां बड़ो बात च़लाव, ते समुद्रेरे दूई हिस्से केरतां पानी एन्च़रे अलग कियूं, ते मझ़मेइं शुक्‍कोरी ज़मीन भोइ जेई। 22 तैखन इस्राएली समुन्दरे मझ़मेइं शुक्‍कोरी ज़मीनी पुड़ च़ेलतां निस्सी जे ते पानी तैन केरे देइने ते बांए पासे दिवारारू ज़ेरू खड़ू थियूं। 23 तैखन मिस्री लोक ते फ़िरौनेरे सब घोड़े, तैन केरे रथ, ते सुवार तैन केरो पीछो केरते समुन्दरेरे मझ़मेइं च़ले जे। 24 ते रातरे आखरी पहरे मां यहोवाए बिदलार ते अग्गरे खम्भे मरां मिस्री केरि सेना हेरतां तैना डराए। 25 ते तैनी तैन केरे रथां केरे पेइहे केढी छ़डे, ज़ैस सेइं तैन केरू च़लनू मुश्किल भोवं, तैखन मिस्री एप्पु मांमेइं ज़ोने लगे, "एज्जा अस इस्राएली लोकां केरे सामनेरां नश्शम, किजोकि यहोवा तैन केरे लेई मिस्री केरे खलाफ जंग केरने लगोरोए।"

26 फिरी यहोवाए मूसा सेइं ज़ोवं, "अपनो हथ समुद्रेरे पासे अग्रोवं केर, कि पानी मिस्री लोकां केरे, ते तैन केरे रथ, ते सुवारन पुड़ फिरी बगे।" 27 तैखन मूसे अपनो हथ समुन्दरेरे पासे रख्खो, ते झ़ेझ़ भोते-भोते कुन भोवं कि समुन्दर ज़ेरो थियो तेरहो भोइतां एपनी ताकती पुड़ अव, ते मिस्री पत्रोवं नश्शने लगे, पन यहोवा तैना समुन्दरे मां रुढ़ाए। 28 ते पैनेरे बेदलोने सेइं, ज़ेत्रे रथ ते सुवार इस्राएली लोकन पत्पती समुन्दरे मां एवरे थिये तैना सब सुवारन समेत फ़िरौनेरी सेना तैस मां डुब्बी जेई, ते तैस मरां अक भी न बच़ो। 29 पन इस्राएली समुन्दरे मझ़मेइं शुक्‍कोरी ज़मीनी मांमेइं भोइतां च़ले जे, ते पानी तैन केरे देइने ते बांए पासे दूईने पासन दिवारारू ज़ेरू खड़ू थियूं।

30 एस तरीके सेइं यहोवा तैस दिहैड़ी इस्राएली लोक मिस्री केरे गुलैमी करां छुटाए, ते इस्राएली लोकेईं मिस्री लोक समुन्दरेरे बन्ने मरोरे लाए। 31 ते यहोवाए मिस्री लोकन पुड़ ज़ै अपनि शक्ति हिरेवरी थी, तैन हेरतां इस्राएली लोकेईं यहोवारो डर मन्नो ते यहोवा ते तैसेरे दास मूसे पुड़ भी याकीन कियूं।