1 तैखन परमेशरे इना सब वचन ज़ोए, 2 "अवं तेरो परमेशर यहोवा आईं, ज़ैने तू मिस्र मुल्खेरी गुलैमी मरां केढतां आनोरोस।

3 "तू मेरे अलावा होरि कोन्ची परमेशर केरतां न मेन्नां।

4 "तू अपने लेई घड़ाई केरतां कोई मूरती न बनेइयां, न कोन्चेरी शकल बनेइयां, ज़ै आसमाने मां या धेरती पुड़ या धेरतरे पैनी मां भोए। 5 तू तैन कां न झुकां, ते न तैन केरि आराधना केरां, किजोकि अवं तेरो परमेशर यहोवा जलन रखनेबालो परमेशर आईं, ते ज़ैना मीं सेइं बैर रखतन, तैन केरे मट्ठन, पोट्लड़न, ते पड़पोट्लड़न भी सियानां केरि सज़ाह देताईं, 6 ते ज़ैना मीं सेइं प्यार केरतन ते मेरे हुक्मन मनतन, तैन हज़ारन पुड़ दया केरताईं।

7 "तू अपने परमेशरेरू नवं बेफैइदू न ज़ोइयां, किजोकि ज़ै कोई यहोवारू नवं बेफैइदू ज़ोते दोषी ठहरालो।

8 "तू थैकरी दिहाड़ी पवित्र मेन्नां याद रेखां। 9 हफतेरे शा दिहाड़े त तू मेहनत केरतां अपनु सब कम-काज़ केरां। 10 पन सत्तोवं दिहाड़ी तेरे परमेशर यहोवारे लेई थैकरी दिहाड़ीए। तैस मां न त तू कोन्ची किसमेरू कम काज़ केरां, ते न तेरू मट्ठू, न तेरी कुई, न तेरो नौकर, न तेरी नौकरानी, न तेरे जानबर, न कोई परदेशी ज़ै तेरे घरे मां भोए। 11 किजोकि शा, दिहाड़न मां यहोवाए अम्बर ते धरती ते समुन्दर, ते ज़ैन किछ तैस मां आहे, सब बनेवरूए, ते सत्तोवं दिहाड़े आराम कियोरोए, एल्हेरेलेइ यहोवाए थैकरे दिहाड़े बरकत दित्ती ते तै पवित्र ठहराई।

12 "तू अपने अम्मा-बाजी केरि आदर केरां, ज़ैस सेइं ज़ै मुल्ख तेरो परमेशर यहोवा तीं देते तैस मां तू बड़े दिहाड़न तगर ज़ींतो रालो।

13 "तू कत्ल न केरां।

14 "तू व्यभिचार न केरां।

15 "तू च़ोरी न केरां।

16 "तू अपने पड़ोसेरे खलाफ झूठी गवाही न देइयां।

17 "तू केन्चेरे घरेरू लालच़ न केरां, न केन्चेरी कौन्शरू लालच़ केरां, ते न केन्चेरे नौकर-नौकरानी, या दांत या गधेरू, न केन्चेरी कोन्ची चीज़रू लालच़ केरां।"

18 ते सब लोक गरज़नेरी ते झ़पनेरी ते नरशिंगेरी आवाज़ शुन्तां, ते पहाड़े पुड़ तूँ च़लतो हेरतां, तैना लोक थरकने लगे ते दूर खड़े भोइ जे; 19 ते तैना मूसे सेइं ज़ोने लगे, "तूए असन सेइं गल्‍लां केर, तैखन अस शुनमेले, पन परमेशर असन सेइं गल्‍लां न केरे, एरू न भोए कि अस मेरि गाम।" 20 मूसे लोकन सेइं ज़ोवं, "डरा नन्ना, किजोकि परमेशर एल्हेरेलेइ लेई एवरो कि तुश्शी अज़मैइश केरे, ते तैसेरो डर तुश्शे दिले मां बनोरो राए, कि तुस पाप न केरथ।" 21 मूसो तैस बड़े आंधरेरे नेड़े जेव ज़ैड़ी परमेशर थियो, ते तैना लोक त दूर खड़े राए।

22 तैखन यहोवाए मूसे सेइं ज़ोवं, "तू इस्राएली लोकन मेरे इन्ना वचन शुना, कि तुसेईं लोकेईं त एप्पु लाहेरू कि मीं तुसन सेइं आसमाने मरां गल्‍लां कियोरिन। 23 तुस मीं साथी कोन्ची शामल न केरथ, मतलब अपने लेई चाँदी या सोन्ने सेइं देबते न बनेइयथ। 24 मेरे लेई मित्तरी अक वेदी बनेइयथ, ते अपने भैड्डां-छ़ेल्‍ली ते बेछ़ी-दांतां केरि होमबलि ते मेलबलि तैस पुड़ च़ैढ़थ, ज़ैड़ी-ज़ैड़ी अवं अपने नंव्वेरी याद करालो तैड़ी-तैड़ी अवं तुसन कां एइतां बरकत देलो। 25 ते अगर तुस मेरे लेई घोड़ां केरि वेदी बनाथ, त तराशोरे घोड़न सेइं न बनेइयथ, किजोकि ज़ैड़ी तीं तैस पुड़ हथियार लव तैड़ी तू तैस अशुद्ध केरि छ़डेलो। 26 ते मेरी वेदी पुड़ कधी पेवड़ी सेइं नईं च़ढ़नू, कधी एरू न भोए कि तेरी जान तैस पुड़ नग्गी लेइहोए।"