1 परमेशर ज़ै इश्शी ताकते, तैसेरू गीत खुशी सेइं ज़ोथ;

याकूबेरे परमेशरेरू जयजयकार केरा!

2 गीत ज़ोथ, खंजरी ते सितार ते सारंगी आनां।

3 संगरांतरे दिहाड़े,

ते पुनयारे दिहाड़े इश्शे तिहारेरे दिहाड़े नरशिंगो बज़ाथ।

4 किजोकि ऐह इस्राएलेरी विधि,

ते याकूबेरे परमेशरेरो बनेवरो नियमे।

5 त परमेशरे एन यूसुफे मां कानूनेरी रीति पुड़ तैखन च़लावं,

ज़ैखन यूसुफ मिस्रेरे खलाफ च़लो,

मीं अक एरी आवाज़ शुनी, ज़ै अवं न थियो ज़ानतो।

6 "मीं तैन केरे कंधे पुड़ेरां भारो उसालो;

ते तैन केरे हथ गिरकी टोकरी छ़ूने करां आज़ाद किये।

7 मुसीबती मां तीं मींजेई आवाज़ दित्ती ते मीं तू बच़ाव;

गुड़ते अम्बरे मरां मीं तींजो जुवाब दित्तो,

ते मीं तू मरीबा नंव्वेरे पैनी पुड़ अज़मव।✝ (सेला)

8 हे मेरे लोकव, शुना, अवं तुसन समझ़ताईं!

हे इस्राएल, रोड़ू भोए कि तू मेरी गल मन्नस।

9 तेरे दरमियाने मां कोई होरो ईश्वर न भोए,

ते न तू कोन्ची बखले देबतेरी आराधना केरस!

10 तेरो परमेशर यहोवा अवं आईं,

ज़ैनी तू मिस्र मुल्खे मरां केढतां आनोरोस।

मीं करां मग, त अवं तैन सब किछ देइलो ज़ेसेरी तीं ज़रूरते।

11 पन मेरे लोकेईं मेरी गल न शुनी;

इस्राएले मेरो हुक्म न मन्नो।

12 एल्हेरेलेइ मीं तै तैसेरे सखत दिलेरे हवाले कियो,

कि तै अपने योजनां केरे मुताबिक च़ले।

13 अगर मेरे लोक मेरी गल्‍लां शुन्न,

त अगर इस्राएल मेरी बत्तन पुड़ च़ले,

14 तैखन अवं लूशी तैन केरे दुश्मन दबेइ देथो,

तैखन अवं अपनो हथ तैन दुश्मना केरे खलाफ च़लेइ।

15 यहोवा सेइं बैर केरनेबाले तैस करां डेरतां तैस कां झुकतन!

ते तैन हमेशारे लेई सज़ा मैल्हे।

16 पन इस्राएले त अवं खूब रोड़े गेहुं खुवाथो,

अवं जंगली मैछ़ी सेइं तैन रज़ानेथो।"