निर्गमन 9

पंच़ोंव आफत-जानबरां केरि मौत

1 फिरी यहोवा परमेशरे मूसे सेइं ज़ोवं, "फ़िरौने कां गेइतां ज़ो, ‘इब्रि लोकां केरो परमेशर यहोवा तीं सेइं इन ज़ोते, कि मेरे लोकन गाने दे, कि तैना मेरी आराधना केरन। 2 अगर तू तैन गाने न देस, ते तैन हथरां न छ़डस, 3 त शुन तेरे ज़ैना घोड़े, गधे, ऊँट, गोरू-गब्बां ते सारे जानबर ज़ैना मैइदाने मां आन, तैन पुड़ यहोवारो हथ एरहो पेलो कि बड़ी मरी पेली, 4 पन यहोवा, इस्राएली लोकां केरे जानबरन मां ते मिस्री लोकां केरे जानबरन मां एरहो फर्क केरेलो, कि ज़ैना इस्राएली लोकां केरे जानबर भोल्हे तैन मरां कोई भी न मरेलो।’" 5 एन ज़ोइतां, फिरी यहोवाए अक वक्त रख्खो, "अवं एन कम एस नगरे मां कालां केरेलो।" 6 तैखन होरसां यहोवाए एन्च़रे कियूं, ते मिस्री लोकां केरे सारे जानबर मेरि जे, पन इस्राएली लोकां केरो अक जानबर भी न मरो। 7 ते फ़िरौने पतो केरने मैन्हु भेज़े, पन इस्राएली लोकां केरे जानबरन मरां अक भी न थियो मरोरो। फिरी भी फ़िरौनेरो दिल सखत भोइ जेव, ते तैनी तैना लोक गाने न दित्ते।

शेइयोवं आफत-शेले ते खराड़ां

8 फिरी यहोवाए मूसा ते हारूने सेइं ज़ोवं, "तुस दूईये भेट्ठी मरां अक-अक मुठड़ी मांज़न घिन्नी गाथ, फिरी मूसो तैस मांज़नी फ़िरौनेरे सामने नेइतां अम्बरेरे पासे उडारे। 9 फिरी तै खुशक धूड़ भोइतां सारे मिस्र मुल्खेरे रानेबाले मैन्हन ते तैन केरे सेब्भी जानबरन पुड़ शेले ते खराड़ां बेनि गालां।" 10 एल्हेरेलेइ तैना भेट्ठरी मांज़न नेइतां फ़िरौनेरे सामने खड़ो भोए, फिरी मूसे तै मांज़न आसमाने जो उडारी, ते तै मैन्हन ते जानबरन पुड़ शेले ते खराड़ां बेनि जेई। 11 तैन खराड़ां केरे वजाई सेइं जैदूगिर मूसेरे सामने खड़े न भोइसखे, किजोकि तैना खराड़ां ज़ेन्च़रे सेब्भी मिस्री लोकन निस्सोरां थियां, तेन्च़रे तैन जैदूगिरन भी निस्सोरां थियां। 12 तैखन यहोवाए फ़िरौनेरो दिल सखत कियो, ते ज़ेन्च़रे यहोवाए मूसे सेइं ज़ोवरू थियूं, तैनी तैसेरी गल न शुनी।

सत्तोवं आफत-आण बखनी

13 फिरी यहोवा मूसे सेइं ज़ोवं, "झ़ेझ़ां उठतां फ़िरौनेरे सामने खड़ो भोइयां, ‘कि इब्रि केरो परमेशर यहोवा एन ज़ोते, कि मेरे लोकन गाने दे कि तैना मेरी आराधना केरन। 14 नईं त अवं इस फेरे तीं पुड़ ते तेरे कम केरनेबालन पुड़ ते तेरे लोकन पुड़ हर किसमेरी आफतां छ़डेलो, ज़ैस सेइं तू ज़ानस कि सैरी धेरती पुड़ मेरे बराबर होरो कोई नईं। 15 मीं त हुन्ना तगर अपनो हथ अग्रोवं रेखतां तू ते तेरे लोक मरी सेइं मारोरे भोथे; ते धेरती पुड़ तेरो सत्यानाश कियोरो भोथो; 16 पन सच़्च़े मीं, तू एस वजाई सेइं ज़ींतो रखोरोस कि तीं अवं अपनि शक्ति हेरेईं, ते अपनु नवं सैरी धेरती पुड़ मुशूर केरि। 17 कुन तू हेजू भी मेरे लोकां केरे सामने अपनो आप बड़ो समझ़तस, ते तैन गाने न देस। 18 एल्हेरेलेइ शुन कालां अवं इस्से मौके बड़ी-बड़ी आण बखेइलो, ज़ेसेरी ज़ेरि मिस्र मुल्खे मां शुरू करां अज़ तगर कधी नईं पेवरी। 19 एल्हेरेलेइ हुनी लोकन भेज़तां अपने जानबरन ते उडारे मां ज़ैन किछ तेरूए सेब्भन जल्दी छ़ुपा, नईं त ज़ेत्रे मैन्हु ते जानबर उडारे मां राले, ते घरे मां अकोट्ठे न भोल्हे; तैन पुड़ आण बखनीए, ते तैना मेरि गानेन।’" 20 एल्हेरेलेइ फ़िरौनेरे नौकरन मरां ज़ैना मैन्हु यहोवा परमेशरेरे वचनेरो डर मन्ते थिये, तैनेईं त अपने सेवक ते अपने जानबर घरे मां ढेप्पी छ़डे। 21 पन ज़ैनेईं यहोवा परमेशरेरे वचने पुड़ मन न लव, तैनेईं अपने नौकर ते जानबर मैइदाने मां रख्खे।

22 तैखन यहोवा परमेशरे मूसा सेइं ज़ोवं, "अपनो हथ अम्बरेरे पासे केर कि सारे मिस्र मुल्खेरे मैन्हु ते जानबरन पुड़ ते उडारे मां ज़ेत्री फसले तैस पुड़ आण बख्खे।" 23 तैखन मूसे अपनि सोटी अम्बरेरे पासे खड़ी की, ते यहोवा परमेशरेरी शेक्ति सेइं अम्बर गुड़ने लगू, ते आण बखने लगी, ते अग धेरती तगर पुज़ने लगी, एन्च़रे सेइं यहोवाए मिस्र मुल्खे पुड़ आण बरसाई। 24 ज़ै आण बखती थी तैस मां अग भी साथी मिलोरी भोती थी, ते तै आण एत्री गिरकी थी कि ज़ेइसेरो मिस्र मुल्ख बस्सोरो थियो, तैखन करां मिस्र मुल्खे मां एरी ज़ेरि आण कधे नईं बख्खोरी। 25 एल्हेरेलेइ पूरे मिस्र मुल्खेरे उडारन मां कुन मैन्हु ते कुन जानबर ज़ेत्रे भी थिये सब आणी सेइं मेरि जे, ते आणी सेइं ऊडारां केरि सारी फसल खतम भोइ जेई, ते मैइदानेरे सारे बुट भी ट्लुटी जे। 26 सिर्फ गोशेन प्रदेशे मां ज़ैड़ी इस्राएली रहते थिये तैड़ी आण नईं बख्खोरी।

27 तैखन फ़िरौने मूसो ते हारून समाद देइतां कुजाए, ते तैन सेइं ज़ोवं, "इस फेरे त मीं पाप कियोरोए, यहोवा धर्मीए, पन अवं ते मेरे लोक अधर्मी अहम। 28 अम्बरेरू गुड़नु ते आण भी बड़ी बख्खी, हुनी यहोवा कां बिनती केरा, तैखन अवं तुसन लोकन गाने देइलो।" 29 मूसे तैस सेइं ज़ोवं, "नगरे मरां निसते अवं यहोवारे पासे हथ फैलालो, तैखन अम्बर गुड़नु ते आण बंद भोल्ही, एस वजाई सेइं तू ज़ानेलो कि धरती यहोवा परमेशरेरीए। 30 तांभी अवं ज़ानताईं, कि न तू, ते न तेरे नौकर यहोवा परमेशरेरो डर मन्नेले।" 31 सन ते जौआं केरि फसल त आणी सेइं खतम भोइ जेवरीए, किजोकि जौआं केरि फसली शिल्‍लां भी निस्सोरां थियां, ते सने फूड़ू लग्गोरां थियां। 32 पन गेहुं ते छ़ीर गेहुं बेडोरे न थिये, तांए तैना बेंच़ी जे। 33 ज़ैखन मूसो फ़िरौने करां बेइरोवं नगरेरे पासे निसते बार यहोवारे पासे हथ फैलाए, तैखन अम्बरेरू गुड़नु ते आण बखनी बंद भोइ, ते फिरी धेरती पुड़ जादे झ़ड़ी न बख्खी। 34 फ़िरौने एन हेरतां भी कि आण बखनी ते अम्बर गुड़नु बंद भोवरूए, फिरी भी तैने ते तैसेरे नौकरेईं अपनो मन सखत केरतां फिरी पाप कियो। 35 एन्च़रे सेइं फ़िरौनेरो मन ज़िद्दी भोतो जेव, ते तैनी इस्राएली लोक गाने न दित्ते; ज़ेन्च़रे कि यहोवाए मूसेरे ज़िरिये ज़ोवरू थियूं।