मीका 1

सामरिया नगरे पुड़ यहोवारो न्याय

1 यहूदा प्रदेशेरे राज़े योताम, आहाज ते हिजकिय्याहेरे राज़ केरनेरे वक्तन मां यहोवा मोरेशेत नगरेरे रानेबाले मीका सेइं गल्‍लां की। यहोवा सामरिया ते यरूशलेम नगरां केरे बारे मां मीका दर्शने मां इनां गल्‍लां हेरेई।

2 "हे कौमां-कौमां केरे सब लोकव, शुना! हे धरती ते तैस समेत ज़ैन किछ भी आहे ध्यान दे! प्रभु यहोवा तुश्शे खलाफ, बल्के यहोवा अपने पवित्र भवने मरां तुसन पुड़ गवाही दे। 3 किजोकि हेर, यहोवा एपनी पवित्र ठारी पुड़ेरां बेइर निस्सी राहोरोए, ते तै उतरतां धेरतरे मूरती पूज़ा केरनेरी उच्‍ची ठारी पुड़ च़लेलो। 4 पहाड़ां तैस हैठ गेली गालां, ते वादी फेटी गाली, ज़ेन्च़रे मोम अग्गरे सेके सेइं गेली गाते, ते पानी ज़ैन ढलवाने मरां बगते। 5 एन सब याकूबेरे खानदानेरे पाप, ते इस्राएली लोकां केरे पापेरी वजाई सेइं भोल्हु। याकूबेरो पाप कुने? कुन सामरिया नईं? ते यहूदा प्रदेशेरी मूरती पूज़ा केरनेरी उच्‍ची ठारां कुन आन? कुन यरूशलेम नईं? 6 एल्हेरेलेइ अवं सामरिया, मैइदानेरे उडारेरो ढेर बनेइलो, ते दाछ़रो बगीचो बनेइलो; ते अवं तैसेरे घोड़न वैदी मां बुछ़ोड़ेलो, तैसेरी मुनीयाद पुटतां छ़डेलो। 7 सामरियारी सैरी घड़ाई कियोरी देबतां केरि मूरती केरे टुक्ड़े-टुक्ड़े किये गाले। ते ज़ैन किछ तैने वेश्यापन केरतां कमेवरूए तैन अग्गी सेइं भस्म भोइ गालू, ते तैसेरी सैरी मूरती अवं चकनाचूर केरेलो; किजोकि वेश्यापनेरी कमैई सेइं अकोट्ठू कियोरूए, ते तै फिरी वेश्यापनेरी कमाई भोइ गाली।"

मीका मातम केरते

8 तैखन मीका ज़ोवं, एस वजाई सेइं अवं छाती पिटतां हाय-हाय केरेलो। अवं अपनो आप लूटरो ज़ेरो ते नग्गो फिरां केरेलो। ज़ेन्च़रे गिद्दां बाशतन अवं तेन्च़रे चिन्डां मारेलो, ते शतर्मुर्गेरी ज़ेरि लेरां देइलो। 9 किजोकि सामरिया नगरेरे ज़खमेरो कोई आलाज़ नईं, ते मुसीबत यहूदा पुड़ भी पेई, बल्के तै मेरी कौमरे ढ्लान पुड़ भी पेइतां यरूशलेमेरे फाटकन तगर पुज़्ज़ी जेवरीए।

10 गत नगरे मां तैसेरी चर्चा न केरा, ते लेरां न देथ, बेतआप्रा जगाई मां धूड़ी पुड़ लेट्टा। 11 हे शापीरेरी रानेबाली बेशर्म नग्गी भोइतां च़ली गा; सानानेरी रानेबाली बेइर न निस्सी सके; बेतसेलेरे लेरां देनेरे वजाई सेइं तैसेरी छ़पनेरी ठार तुसन करां नी गाली। 12 किजोकि मारोतेरी रानेबाली सुखे बलगते-बलगते तेड़फी जेई, किजोकि यहोवारे तरफां यरूशलेमेरे फाटके तगर बरबादी पुज़ोरीए। 13 हे लाकीश नगरेरी रानेबाली, अपने तेज़ दौड़ने बाले घोड़ां केरू रथ तियार केर, तींए सेइं सिय्योनेरे लोकां केरे पापेरी शुरुआत भोइ, किजोकि इस्राएलेरे सारे पाप तींए मां मैलतन। 14 एल्हेरेलेइ तू गतेरे मोरेशेते दान देइतां दूर केरेलो; अकजीब नगरेरे लोकन करां इस्राएलेरे राज़े सिर्फ धोखो मैल्हेलो। 15 हे मारेशा नगरेरी रानेबाली अवं फिरी तीं पुड़ अक अधिकारी ठहरेइलो, ते इस्राएलेरे ज़ैना मुशूर लोकन तैन्न अदुल्‍लाम नगरे मां एजनू पेनूए। 16 हे यहूदा, अपने ट्लारे बच्‍चां केरे लेई अपनो दोग कटेइतां टिन्ड बना, बल्के अपनो पूरो दोग कटेइतां इल्‍लरो ज़ेरो गंजो केर, किजोकि तैना गुलाम बेनतां तीं करां च़ले गाले।