1 मीं ज़ोवं: हे याकूबेरे प्रधानव, हे इस्राएलेरे न्यायी लोकव शुना! कुन न्यायेरो भेद ज़ाननो तुश्शू कम्मां नईं? 2 तुसां त भलियैई सेइं बैर, ते बुरैई सेइं प्यार रखतथ, ज़ेन्च़रे कि तुसां लोकां केरि खाड़ी केढी छ़डतथ, ते तैन केरि हेड्डन पुड़ेरां मास खातथ। 3 बल्के तुसां मेरे लोकां केरू मास भी खातथ, ते तैन केरि खाड़ी कढतथ; ते तैन केरि हेड्डन पतीले मां ट्लोड़तां बनानेरे लेई छ़डतथ, ते तैन केरू मास बनानेरे लेई टुक्ड़े-टुक्ड़े केरतथ। 4 तैना तैस वक्ते यहोवा कां बिनती केरेले, पन तै तैन केरि न शुनेलो, बल्के तैस मौके तैन केरे बुरे कम्मां केरि वजाई सेइं तैन करां अपनु तुत्तर फिरालो।

5 यहोवा एन ज़ोते, ज़ैना नबी मेरे लोकन टपलातन, ते ज़ैखन तैन खाने जो मैलते तैखन, "शान्ति-शान्ति," ते अगर कोई तैन केरे एशी मां किछ न दे, फिरी तैना तैसेरे खलाफ जंगरे लेई तियार भोतन। 6 एल्हेरेलेइ तुसन पुड़ एरी रात एज्जेली, कि तुसन दर्शन न मैल्हेलू, ते एरहु आंधरू भोल्हु कि तुसां एजने बाले वक्तेरे बारे मां ज़ोई न बटेले, नेबी केरे लेई दिहाड़ो डुब्बी गालो, ते दीसां तैन पुड़ आंधरू भोइ गालू। 7 दर्शी ते एजने बाले वक्तेरे बारे मां ज़ोनेबाले शरमिन्दा भोल्हे, ते तैना सब अपने ओठन एल्हेरेलेइ ढकेले कि परमेशरेरी तरफां जुवाब न मैल्हेलो। 8 पन अवं त यहोवारी आत्मारी शक्ति, न्याय ते कुदरत हासिल केरतां भरपूर आईं कि अवं याकूबे तैसेरे अपराध ते इस्राएले तैसेरे पाप ज़ोई सेकी।

9 हे याकूबेरे घरानेरे प्रधानव, हे इस्राएली लोकां केरे न्यायी लोकव, हे न्याय सेइं नफरत केरनेबालव ते सब सही गल्‍लन टैरी केरनेबालव, ई गल शुना। 10 तुसां ज़ैना सिय्योने खून केरतां ते यरूशलेमे बुरैई सेइं बनातथ। 11 तैस नगरेरे प्रधान रिश्पत खेइतां न्याय केरतन, ते तैसेरे याजक कीमत नेइतां शिक्षा देतन, ते तैसेरे नबी पेइंसे नेइतां नबूवत केरतन, फिरी भी एन केरतां तैना यहोवा पुड़ भरोसो रखतन, ते ज़ोतन, "यहोवा असन मांए; असन पुड़ कोई आफत न एज्जेली।" 12 एल्हेरेलेइ सिय्योन तुश्शी वजाई सेइं उडारेरू ज़ेरू जोट्लु गालू, ते यरूशलेम नगर खण्डर भोइ गालू, ते ज़ैस पहाड़े पुड़ परमेशरेरो भवन बनोरोए, तै जंगलेरी उच्‍ची ठार बेनि गाली।