मीका 2

1 "अफ़सोस तैन पुड़, ज़ैना राती बिछ़ाने पुड़ लेटतां बुरी योजना बनातन ते बुरे कम्मां केरि इच्छा केरतन, ते तैना ताकतबर भोनेरे वजाई सेइं झ़ेझ़ भोते तैस पूरे केरतन।✝2:1 भज. 36:4. 2 तैना ऊडारां केरू लालच़ केरतां तैन थसोड़तन, ते घरां केरू लालच़ केरतां तैन भी थसोड़तन, ते तैसेरे घराने समेत मड़दे पुड़, ते तैसेरे हिस्से समेत कोन्ची मड़दे पुड़ अंधेर ते ज़ुलम केरतन।"✝2:2 लैव्य. 25:23-28;गिन. 27:1-11;33:54;36:1-12. 3 एल्हेरेलेइ यहोवा एन ज़ोते, "अवं एस कुले पुड़ एरी मुसीबत छ़डने बालोईं, ज़ैस हैठां तुसां अपनि क्रोड़ी खड़ी न केरि बटेले; ते न अपनि क्रोड़ी खड़ी केरतां च़ेलि बटेले; किजोकि तै आफतरो वक्त भोल्हो। 4 तैस वक्ते अमीर लोक इन बड़े मातमेरू गीत मसालरे रीती पुड़ ज़ोले; ‘असां त बिलकुल बरबाद भोइ जे, तै मेरे लोकां केरे हिस्से बिगाड़ते, अफ़सोस तै तैस मीं करां केत्रे दूर केरते! यहोवा इश्शे उडारे बगावत केरनेरे लेई देते। 5 एल्हेरेलेइ तेरो एरहो कोई न भोल्हो, ज़ै यहोवारी मेण्डली मां चिट्ठी छ़ेडतां नापनेरी डोरी छ़डे।’"

6 नबी ज़ोतन, "नबूवत न केरा। इन गल्‍लां केरे बारे मां ज़ोथ!" एरे लोकन मरां बेइज़्ज़ी मिटी गाली। 7 यहोवा ज़ोते, "हे याकूबेरे घराना, कुन एन ज़ोवं गाए कि यहोवारी आत्मारी सबर खतम भोवरीए? कुन मेरे गल्‍लन सेइं तैसेरू भलू न भोए ज़ै सिद्धाई सेइं च़लते? 8 यहोवा जुवाब देते, हिजेरी गल्‍ले कि मेरे लोक दुश्मन बेनतां खड़े भेवरेन। तुसां बेकसूर बत्तां च़लनेबाले सिद्धे-सादे लोकां केरां लिगड़ां भी थुसोड़तथ ज़ैना लड़नेरो विचार न केरतां बेधड़क च़ले गातन। 9 तुसां मेरे लोकां केरि कौन्शन अपने आरामेरे घरे मरां भी केढी छ़डतथ; ते तैन केरे निक्‍के बच्‍चन करां मेरी दित्तोरी रोड़ी चीज़ां हमेशारे लेई थुसोड़तां नेतथ। 10 उठा, च़ले गाथ! किजोकि तै तुश्शी आरामेरी ठार नईं; तैसेरी वजा तै अशुद्धता आहे, ज़ै सखत दुखे सेइं तुश्शो नाश केरेली। 11 अगर कोई झूठी आत्माई मां च़ेलतां झूठी बेकार गल्‍लां ज़ोए, ते ज़ोए कि अवं तुश्शे रोज़ेरे लेई दाछ़रे रस्सेरे लेई प्रचार शुनातो रालो, त तैए एन लोकां केरो नबी भोल्हो। 12 हे याकूब, अवं ज़रूर तुसन सेभन अकोट्ठे केरेलो, अवं इस्राएलेरे बच़ोरे लोक ज़रूर अकोट्ठे केरेलो; ते बोस्रा नगरेरे गब्बां केरे ज़ेरे अकोट्ठे रेखेलो। तैस केन्नरे ज़ेरे ज़ै रोड़े चरागा मां भोए, ते हछे लोकां केरि वजाई सेइं शोर मेच़ि गाली। 13 तैन अग्री-अग्री बाड़ेरो ट्लोड़ने बालो जेवरोए, एल्हेरेलेइ तैना भी तैस ट्लोड़ी राहोरेन, ते गुलैमरे फाटके मरां भोइतां निसते गेइ राहोरेन; तैन केरो राज़ो तैन अग्री-अग्री जेव मतलब यहोवा तैन केरो प्रधान ते अगुवो आहे।"