मीका 6

इस्राएलेरे खलाफ यहोवारी शिकायत

1 ज़ैन यहोवा ज़ोते तैस शुना, ते उठतां पहाड़ां केरे सामने बेंस केरा, ते पहैड़ी भी तेरी शुन्न। 2 हे पहाड़व, ते हे धेरतरे अटल बुनयादव, यहोवारी बेंस शुना, किजोकि अपने लोकां केरे खलाफ यहोवारो मुकदमोए, ते इस्राएले सेइं बेंस केरते।

3 यहोवा ज़ोते, "हे मेरे लोकव, मीं तुश्शू कुन बिगाड़ेरूए? मीं तुसन पुड़ केन्च़रे बोझ लद्दोरोए, मीं जुवाब देथ? 4 मेरे खलाफ गवाही देथ! मीं त तुसां मिस्र मुल्खे मरां केढतां आनोरेथ, ते गुलैमरे घरे मरां छुटेइतां आनोरेथ; ते तुश्शी अगवाई केरनेरे लेई मूसा, हारून ते मिर्याम भेज़ोरी थिये। 5 हे मेरे लोकव, याद केरा, कि मोआबेरे राज़े बालाके तुश्शे खलाफ कुन योजना बनेवरीए? ते बोरे मट्ठे बिलामे तैस कुन सलाह दित्ती? ते शित्तीम नगरे करां गिलगाल नगरे तगर अपनु सफर याद केरा, ताके तुस यहोवारे धार्मिकतारां कम्मां सेमझ़ी सकथ।"

6 "अवं कुन एन्हतां यहोवारी हज़ूरी मां एज्जी, ते बा रानेबाले परमेशरेरे सामने झुकतां आराधना केरी? कुन अवं होमबलि देनेरे लेई एक्‍की-एक्‍की सालेरां बछ़ड़ां एन्हतां तैसेरी हज़ूरी मां एज्जी? 7 कुन यहोवा हज़ारेईं हुड़न या ज़ैतूनेरे तेलेरे लखेइं दरियान सेइं खुश भोल्हो? कुन अवं अपने पापां केरे बदले अपने ज़ेठे मट्ठे देईं, ते अपने पापेरे बदले मां अपने ज़र्म दित्तोरे कोन्ची देईं?" 8 हे इन्सान, तैनी तीं सेइं ज़ोवरूए कि रोड़ू कुने; ते इसेरे अलावा यहोवा तीं करां होरू कुन चाते, कि तू न्याय सेइं कम केरस, ते दयाई सेइं प्यार रख्खस, ते अपने परमेशरे सेइं नम्रता सेइं च़लस?✝6:8 मत. 23:23;यशा. 1:17.

9 यहोवा इस यरूशलेम नगरेरे बारे मां ज़ोई राहोरोए, ते पूरू ज्ञान, तेरे नंव्वेरो डर मन्नो आहे: राज़दण्डेरी, ते ज़ै तैस देनेबालोए तैसेरी शुना! 10 कुन हुन्ना तगर दुष्टेरे घरे मां बुरैई सेइं हासिल कियोरू धन ते निकड़ो एपा भिट्टो नईं? 11 कुन अवं धोखेरी ट्लकड़ी ते बेइमैनरे तोलां केरि थेली नेइतां पवित्र ठहरी सकताईं? 12 इठेरे दौलतमन्द लोक ज़ुलमेरू कम हेरतन; ते इठेरे सब लोक झूठ ज़ोतन ते तैन केरे ऐशी मरां धोखेरी गल्‍लां निसतिन। 13 एल्हेरेलेइ अवं तीं मारते-मारते बड़ो ज़खमी केरताईं, ते तेरे पापां केरि वजाई सेइं तीं उज़ैड़तां छ़डताईं। 14 तू खालो पन रज़्ज़ेलो न्ना, तेरू पेट खाली रालू, ते तू अपनि जाईदात अकोट्ठी केरेलो, पन बच़ेइ न बटेलो, किजोकि ज़ैन किछ तू बच़ालो, अवं तैस तलवार च़लावेइतां लुटेइलो। 15 तू बीज़ बेलो पन फसल न केट्टी बटेलो, तू ज़ैतून पीढ़ेलो, पन तेल इस्तेमाल न केरि बटेलो, तू दाछ़ पीढ़ेलो पन दाछ़रो रस न पी बटेलो।✝6:15 यूह. 4:37;आम. 5:11;व्यव. 28:38-40. 16 किजोकि तैना ओम्री राज़ेरे कानूने पुड़ ते तैसेरे मट्ठे अहाब राज़ेरे घरानेरे सेभी कम्मन पुड़ च़लतन, ते तैन केरि रीतन मनतन; एल्हेरेलेइ अवं तैन बेरान केरतां छ़डेलो, ते इस नगरेरे लोकन मज़ाकेरो ज़िरियो बनेइलो, ते तुस मेरे लोकां केरि बदनामी झ़ैलेले।