1 तैखन योना नबी मेछ़लरे पेटे मरां अपने परमेशर यहोवा कां प्राथना केरतां ज़ोवं,

2 "मीं मुसीबती मां पेवरे यहोवा कां बिनती की,

ते तैनी मेरी बिनती शुनी;

अवं अधलोकेरे डुग्घारे मरां चिन्डां लगो मारने,

ते तीं मेरी बिनती शुनी।

3 तीं अवं डुग्घे समुन्दरे मां शारो

ते छ़ेलहेईं अवं घेरी छ़डो;

तेरी सैरी छ़ेल्ही ते लहरां मीं पुड़मेइं च़ेलती रेई।

4 तैखन मीं अपने आपे सेइं ज़ोवं, ‘अवं तेरी हज़ूरी करां कढो जेवरोईं;

केन्च़रे अवं तेरे पवित्र भवनेरे पासे तकेलो?’

5 अवं पैनी सेइं इड़ी तगर घिरोरो थियो कि मेरी केंयां निस्सी राहोरी थी;

डुग्घो समुन्दर मेरे च़ेवरे पासन थियो, सुमन्दरेरो घास मेरे क्रोड़ी सेइं पलेटोरो थियो।

6 अवं पहाड़ां केरे ज़ीलन तगर पुज़ोरो थियो;

अवं हमेशारे लेई ज़मीनी मां बन्द भोइ जेवरो थियो;

फिरी भी हे मेरे परमेशर यहोवा तीं मेरे प्राण गढे मरां बेइर कढे।

7 ज़ैखन मेरे प्राण निसने लगे, तैखन मीं यहोवा याद कियो;

ते मेरी प्राथना तीं कां बल्के पवित्र भवने मां पुज़्ज़ी जेई।

8 ज़ैना लोक मूरती केरि पूज़ा केरतन,

तैना अपने दया केरनेबाले परमेशरे करां दूर भोतन।

9 पन अवं उच्‍ची आवाज़ी सेइं शुक्र केरतां तीं कां बलिदान च़ाढ़ेलो;

ज़ैन बन्धू मीं कियूं, तैस अवं पूरे केरेलो।

मुक्ति यहोवा ही देते।"

10 तैखन यहोवा मेछ़ली हुक्म दित्तो, ते तैसां योना खुशक ज़मीनी पुड़ उतारो।