Ajuda ao próximo
Ajudar o próximo é mandamento de Deus e expressão prática da fé. A Bíblia ensina que a fé sem obras é morta — e que servir ao menor dos irmãos é servir a Cristo.
I siragl pre na okna kidan goglko, ene kaya mokna narikwa. Te, na nigl goglko, ene nigl kogl narikwa. Na dumo ta nem moglko, ene na i yugugl edigwa. Na kuguglna gaglna yeikruko, ene kugugl gagl narikwa. Kide na sugo, ene u na kanigwa. Te, na kane yugu paigo, ene na moglmara wimiwe di, yegl dinagle dugwa.
Ana na yegl dibo, yoba du moraiglkwa i, di ikne ede yegl dinaiglkwa, Yagl Kade yo, ene aunake kidan goglngo, no kandre, ene kaya mokna tomga pre dine? Te, aunake nigl goglngo, no kandre, nigl kogl tomne? Ene aunake dumo ta nem moglsre, ungo, ene i yugugl edumne? Te, aunake ene kugugl gaglnen yeikruko, no kugugl gagl tomne? Te, aunake kide ene sugwa mo ene kane yugu pai motngo, no u kamne? dinaiglkwa. Yegl dibi, na king moraglka i, yegl dinaglka, Na ene kaima di teiga, na agrama meglmara suna i, ene yoba swara ta, yoba kade mo yoba yoko kaima ta moglkwa i pra, ake ple di teigwa igne, ene na ake ple di narimiwe di, yegl dinaglka.
Yoba ene taraglno pre yana dibi, ene ye dinaiglmere teo. Mo, ye dina ta eramne dibi, ene mane dikrio di, Jisas yegl dugwa.
Kuno yegl mere ene mabuno wakai bogl, abuglage mere yegl meglbi, yoba pere kandre, ene Neno heven ibo moglkwa i, kagie kade tenaiglmiwe dugwa.
Ene taraglno yoba pere tebi, siragl mere tenaiglmere yegl God kuno ere enene te ikne edenabuka. Edidre, konbauna kane kane mina siragl mere kide ake ple di tenabiwe di, yegl dugwa.
Ana Jon yegl dugo, yoba mere makai si meglkwa i, ye di pre, Ana no siragl eramne? digwa. Yegl digo, Jon ye di ikne ede tedre, yegl dugwa, Ene gaglnen suna suo ta yenan, ene agitn ta gaglmo suna yekrabuka i, ta to! dugwa. Te, ene kaya moknanen mere ta yenan, ene ama kuno yegl mere eratniwe dugwa.
Ene taraglno i pi mige boglsre, mige i pi goduglme yoba teo. Ene yegl eribi, ene mige moni i pi heven ibo bona sigwa mere yegl panan, taragl wakai wakai okuo inaiglkwa i, ta dudukrabuka. Kunogl gogl yoba ta u i pikribi, gunage ama ere kide erekraiglkwa ba aimadi kamun yenabuka. Ene dumo aglo mere ta bona sinaiglkwa i, dumo i keme ene nomano mina kau sinabuka pre heven ibo keme bona sinamnedi erio di, Jisas yegl dugwa.
Na ene ka ta duglo boraiglme di teiga i, Na ene dena muduna teimere yegl, ene ama agrama abarama deno muduno teo diga.
Ana yoba kabagle ta ere inagledi goran, ye deno muduno teigwa mabuno i, mudu egre i atne kaima edenabiwe dugwa.
Na yegl ere ene obuno di teiga i, ene kogon yegl ersre, yoba tau yobuglno paikrukwa ake ple di tenaiglkwa pre obuno di teiga. Yegl obuno di tedre, te Jisas ka ta yene dra mina dugwa i, ene pre moraiglmedi na ene obuno di teiwe dugwa. Jisas yegl dugwa, Ene enene taragl tau idre, gun yenatnga i, gun kebra yenatnga ba ene taragl tau yoba tedre, gun yenatnga i, gun podo kaima yenatniwe di, Jisas ka yegl dumiwe di, Pol yegl dugwa.
Ana Pol ka yegl di kodidre, ye goglko boduglko, no Efesus suglno yoba mudu i bogl akie kamage erumga. Kamage ere kodumgo, yagl wagle i kai podo ere, Pol nugo kugro, pauna si neigwa. I siragl pre Pol ye okuo na ta kankraiglmiwe dugwa pre ye deno muduno yubun podo dogo, ye kai ere, Pol kugro, pauna si neigwa. Yegl ersre, ye no Pol bogl auro i pi sip mina edigo, munga.
Te, God yobama ta kaya mokna mo ki ta yeikrabuka i, ake ple di tedre, agroma abaroma yogugl ta unaiglkwa i, ere wakai ere teo.
Nono yoba tau kinano suo yeikruko, mie nomga i, nono keme nenamnedi erekramga. Nono pre medunga gigle dugwa i, gigle dikrukwa i, kide kankre, ake ple di tenamga paugwa.
Ene agitn ta yubun inan, ye yubunmo ake ple di teo. Ene yegl eribi, Krais lomo duglo beglkwa mere yegl panabuka.
Te, ene tau yoba taraglno kunogl neigwa i, mabuno i kide kodo, enene ogono wagle kogon ere yagl, i neo. Ene kogon eribi, ene enene si nedre, te, yoba ta kaya mokna mo ki ta yeikrabuka i, ama ene ake ple dinaiglkwa kuno erabuka.
Te, ene enene keme wakai moramnedi prikre, agroma abaroma tau i ama wakai moraiglmedi prio.
Yoba ta pre mediglsre, mabuno wakai ta erekran, ye pre meduglkwa i, mogo ta koglkrukwa
Ana agrama abarama wagle, yoba ta ere mogl, Krais pre medile dinabuka ba ye mabuno wakai ta pamere yoba bogl tekran, ye pre meduglmara i, ake ple di tekrabuka. Ene prio. Ene agro mo abaro swara ta kugugl gagl edenabuka ta yekran, kaya mokna nenabuka ama ta yekran, ene ye kugugl gagl ya kaya mokna kwi ta tekre, ye ka yoko di tedre, Ene den mudun aragan eran, ede po didre, te, Ogon nagn niga dinan, kaya mokna mere no! dibi, ene yegl digwa i, ta ake ple di tekrukwa. Kuno yegl mere yoba ta Krais pre medrabuka ba mabuno wakai ta pamere yoba bogl tekran, ye pre meduglkwa i mogo wakai ta koglkre, de sugwa mere yegl paugwa.
Yoba ta makandigle taragl mere kan nenabuka ba agigle ta ibun inan, ye kandre, ake ple di tekran, God dem muduo norukwa mabuno i, agro i moglmara kogon erekrukwa mere yegl paugwa.