Ajuda ao próximo
Ajudar o próximo é mandamento de Deus e expressão prática da fé. A Bíblia ensina que a fé sem obras é morta — e que servir ao menor dos irmãos é servir a Cristo.
ಮೇ ಭುಕ್ಯೊ ಥೊ, ತುಮೆ ಮನ ಖಾಣು ದಿದಾ; ಮೇ ಟೋಖ್ಹ್ಮ ಥೊ, ತುಮೆ ಮನ ಪಿಯ್ಯಾನ ದಿದಾ; ಮೇ ಪರೈ ಅದ್ಮಿಹುಯಿನ್ ಥೊ, ತುಮೆ ಮನ ಮಳೈಲಿದ; ಮೇ ಉಘಾಡೊ ಥೊ, ತುಮೆ ಮನ ಪೇರ್ಹಾನ ಲುಂಗ್ಡಾದಿದಾ; ಮೇ ರೋಗ್ಮ ಪಡ್ಯೋಥೊ, ತುಮೆ ಮನ ದೇಕ್-ಭಾಲ್ ಕರ್ಯಾ; ಮೇ ಜೇಲ್ಮ ಥೊ, ತುಮೆ ಮನ ದೇಖಾನ ಆಯಾಥಾ’ ಕರಿ ಬೋಲ್ಶೆ.
ತದೆ ಯೋ ಧರ್ಮಿ ಅದ್ಮಿಖ್ಹಾರು, ‘ಪ್ರಭು, ಕದೆ ತೂ ಭುಕ್ಯೊ ಥೋತೆ ದೇಖಿನ್, ಹಮೆ ಖಾಣು ದಿದಾ? ನಾತೊ ಕದೆ ತೂ ಟೋಖ್ಹ್ಮ ಥೋತೆ ದೇಖಿನ್, ತುನ ಪಿಯ್ಯಾನ ದಿದಾ? ಕದೆ ತೂ ಪರೈ ಅದ್ಮಿ ಹುಯಿರ್ಹೊಥೋತೆ ದೇಖಿನ್, ಹಮೆ ತುನ ಮಳೈಲಿದ? ನಾತೊ ಕದೆ ತೂ ಉಘಾಡೊ ಥೋತೆ ದೇಖಿನ್, ಹಮೆ ತುನ ಪೇರ್ಹಾನ ಲುಂಗ್ಡ ದಿದಾ? ಕದೆ ತೂ ರೋಗ್ಮ ಥೋತೆ ದೇಖಿನ್, ನಾತೊ ಜೇಲ್ಮಥೋತೆ ದೇಖಿನ್, ಹಮೆ ತುನ ದೇಖಾನ ಆಯಾಥಾ?’ ಕರಿ ಬೋಲ್ಶೆ. ತದೆ ಯೋ ರಾಜಾ಼ ಫರೈನ್, ‘ಆ ಮಾರ ಭೇನೆ-ಭೈಯೇಮ ಕಡ್ತೇಲ್ನಿಮತ್ ಥೂತೆ ಏಕ್ನ ತುಮೆ ಶಶ್ಶಾತ್ ಕರ್ಯಾಕಿ, ಯೋ ಮನಾಬಿ ಕರಾದಾಖ್ಹಲ್ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್’ ಕರಿ ಬೋಲ್ಶೆ!
ಕೋಣ್ತೋಬಿ ತಾರಕನ ಶಾತ್ತೋಬಿ ಮಾಂಗ್ಯುತೊ, ಇನ ದೇ; ತಾರಕನ ಕರಜ಼್ ಮಾಂಗವಾಳನ ಮ್ಹೋಡು ನಕೊ ಫರೈಲೀಶ್.
ಅಮ್ಮಸ್ ತುಮಾರು ಉಜಾ಼ಳು ಅದ್ಮಿನ ಖ್ಹಾಮ್ಣೆ ಉಜಾ಼ಖ್ಹ್ ಹುವಾದೆ, ಅನೇಥಿ ತುಮೆ ಕರಾತೆ ಅಛ್ಛು಼ಕಾಮ್ನ ಇವ್ಣೆ ದೇಖಿನ್, ಸೊರ್ಗಾಮ ಛಾ಼ತೆ ತುಮಾರ ಬಾನ ಖ್ಹರಾವ್ಶೆ.
ಬಿಜಾ಼ನ ದೆವೊ, ತದೆ ದೇವ್ಬಿ ತುಮೂನ ದಿಶೆ. ದಾಬಿ ಹಲೈನ್, ಭಾರ್ ರಂಚಾ಼ವಖ್ಹರ್ಕು ಮಾಪಿನ್, ತುಮಾರಿ ಝೋ಼ಳಿಮ ನಾಕ್ಶೆ, ತುಮೆ ಬಿಜಾ಼ನ ಕಿಮ್ ಮಾಪಿನ್ ದೇಸ್ಕಿ, ಇಮ್ಮಸ್ ದೇವ್ಬಿ ತುಮೂನ ಮಾಪ್ಶೆ.
ತದೆ ಯೋ ಅದ್ಮಿಖ್ಹಾರು, "ಇಮ್ ಕತೊ, ಹಮೆ ಶಾತ್ ಕರ್ನು?" ಕರಿ ಪುಛಾ಼ಯು.
ತದೆ ಯೋಹಾನನೆ, "ತುಮಾರಾಮ ಕಿನಾಕನ ಬೇ ಕುಡ್ತಾ ಛಾ಼ಕಿ ಇವ್ಣೆ, ಕೊಯ್ನಿತೆ ಅದ್ಮಿನ ದ್ಯವಾದೆ; ಖಾಣು ರ್ಹವಾಳು ವಾಟಪಾಡಿ ದೇವ್ಣು" ಕರಿ ಜವಾಬ್ ದಿದೊ.
ತುಮಾರಕನ ಛಾ಼ತೆ ಖ್ಹಾರುಸ್ ವೇಚಿನ್, ಆವಸ್ತೆ ಪೈಶಾನ ಗೋರ್-ಗರೀಬ್ನ ದೇವೊ. ತುಮಾರಕನ ಫಾಟಕೊಂತೆ ಚ಼ಂಚಿಯೇನ ಕರಿಲೆವೊ, ಪರ್ಲೋಕ್ಮ ಕಮ್ ಹುವಾಕೊಂತೆ ಶೊತ್ನ ಜ಼ಮಕರಿಲೇವೊ, ಕೆಹೊ ಚೋ಼ರ್ಬಿ ಇನ ಖನ್ನೆ ಆವಾನ ಕೋ ಆವಾನಿ ಅಜು಼ ಇನ ಕೋರ್ಹ ಖೈನ್ ಬರ್ಬಾತ್ ಕೋ ಉಶೇನಿ. ತುಮಾರಿ ಶೊತ್ ಕಿಜ್ಜಾ಼ ರ್ಹೇಸ್ಕಿ, ಹಿಜ್ಜಾ಼ಸ್ ತುಮಾರೊ ದಿಲ್ಬಿ ರ್ಹೇಸ್.
ಮೇ ತುಮೂನ ಪ್ಯಾರ್ ಕರ್ಯೊತೆ ಇಮ್ಮಸ್, ತುಮೇಬಿ ಏಕ್ಥಿ-ಏಕ್ ಪ್ಯಾರ್ ಕರ್ನು, ಕರಿ ಬೋಲಾನುಸ್ ಮಾರಿ ಹುಕುಮ್.
ಇನೊ ಜಾನ್ನಾಸ್ ದೋಸ್ತ್ ಖ್ಹಾರಾನಖ್ಹಾಜೆ ದೇಸ್ತೆ, ಲಾಡ್ಥಿ ಮಹಾನ್ ಪ್ಯಾರ್ ಬಿಜು಼ ಕೆಹುಸ್ ಕೊಯ್ನಿ.
ಅಖ್ಖೀಸ್ ಬಾರೇಮ ಮೇಸ್ ತುಮೂನ ಚಾ಼ಲಿನ್ ವತಾಳಿರಾಖ್ಯೊಸ್. ತುಮೇಬಿ ಇಮ್ಮಸ್ ಮ್ಹಿನತ್ಕರಿನ್ ತಾಖತ್ಕೊಂತೆ ಇವ್ಣುನ ಮದತ್ ಕರ್ನು ಅಜು಼ ಲ್ಯಾವಥೀಬಿ ದೇವಾಮ ಘಣು ವಾರ್ಖ್ಹೊ ಛಾ಼ಕರಿ ಪ್ರಭು ಹುಯಿರ್ಹೋತೆ ಯೇಸುನಿ ವಾತೆನ ಅಪ್ಣೆ ಖ್ಹಯಾಲ್ಮ ರಾಖೊಕರಿ ಬೊಲ್ಯೊ. ಆವಾತೆಖ್ಹಾರಿ ಯೊ ಬೋಲಿ ಹುಯಿಜಾ಼ವಾದಿನ್ ಇವ್ಣಖ್ಹಾರಾನಿ ಜೋ಼ಡ್ಮ ಢುಕ್ಣ್ಯಮೇಟೆ ಹುಯಿನ್ ಪ್ರಾರ್ಥನೆಕರ್ಯೊ. ಇನಕೇಡೆಥು ಪೌಲನೆ, ತುಮೆ ಮಾರ ಮ್ಹೋಡಾನ ಅಜು಼ ಕದೇಬಿ ದೇಕ್ಶುಕೊಯ್ನಿ ಕರಿ ಬೋಲಖ್ಹತರ್ ಇವ್ಣೆಖ್ಹಾರು ರೊಯಿನ್ ಆಂಝು಼ನಾಖ್ಯು ಅಜು಼ ಇನ ಬಥಾಯು ಅಜು಼ ಬುಚ್ಚಾ಼ದೀನ್ ಜೈ಼ನ್ಆಯೇಸ್ ಕರಿ ಬೋಲ್ಯು. ಇನೆ ಮಾರ ಮ್ಹೋಡಾನ ಬಿಜು಼ಪಾಛು಼ ದೇಕ್ಶು ಕೊಯ್ನಿಕರಿ ಬೋಲ್ಯೊತೆ ವಾತೆನ ಇವ್ಣೆ ಘಣು ದುಖ್ಪಡ್ಯು ಅಜು಼ ಇನ ಜ಼ಹಾಜ಼್ಲಗು ಜೈ಼ನ್ ಮ್ಹೇಲಿನ್ ಆಯು.
ಜ಼ರೂರತ್ ರ್ಹವಾಳ ದೇವ್ನ ಅದ್ಮಿನಿ ಜೋ಼ಡ್ಮ ತುಮಾರಕನ ಛಾ಼ತೆ ಇನಾಮ ಮದತ್ ಕರೊ, ಮ್ಹೇಮಾನ್ನ ಘರ್ಮ ಬುಲೈನ್ ಉಪಚಾರ್ ಕರೊ,
ಬಿಜಾ಼ನ ಲ್ಹಾಯಕ್ ಕರಾವೊ ತುಮುನ ಕಾಹೆ
ವಿಶ್ವಾಸ್ಮ ಘಟ್ಹುಯಿರ್ಹಾತೆ ಅಪ್ಣೆ ಕಮ್ಜೋ಼ರಿವಾಳನು ಭೋಜ಼್ನ ಖ್ಹಮಾಳಿರ್ಹವಾಳ ಹುಯಿರ್ಹಿನ್ ಇನಾಮ ಅಪ್ಣು ಅಪ್ಣೆಸ್ ಕಮ್ಠೋಕಿಲ್ಯವಾಳ ನಾಹುಯಿರ್ಹೇವ್ಣು.
ಏಕ್ಜ಼ಣೊ ಬಿಜೇಕ್ ಜ಼ಣಾನಿ ಭೋಜ಼್ನ ಝೇಲಾದೆ, ಅಮ್ ಕ್ರಿಸ್ತನು ನಿಯಮ್ನ ಪೂರಕರೊ.
ಚೋ಼ರಿ ಕರಾವಾಳೊ ಚೋ಼ರ್ ಕರಾನು ಮ್ಹೆಂದಿನ್ ರಾಬಿನ್ ಮಿನಥ್ಥಿ ಅಛ಼್ಛು ಕಮೈಕರೀನ್ ಜಿವ್ಣು ಕರಾದೆ, ತದೆ ಗರೀಬ್ ಅದ್ಮಿನ ದ್ಯಾವಾನ ಇನ ಹಾತೆ ಉಶೆ.
ತುಮಾರಮ ಹರೇಕ್ಜ಼ಣೊ ಖಲಿ ಇವ್ಣ ಅಛ಼್ಛಾಸ್ನ ನಾ ದೇಕ್ಣುತೆ ಬಿಜಾ಼ನು ಅಛ಼್ಛು ಹುವಾನುಬಿ ದೇಖಾದೆ.
ವಿಶ್ವಾಸ್ ಅಜು಼ ಕಾಮ್
ಮಾರ ಭೈಯೇ ಭೇನೆವೊ. ಏಕ್ಜ಼ಣೊ ಮನ ವಿಶ್ವಾಸ್ಛಾ಼ ಕರಿ ಬೋಲಿನ್ ಕಾಮ್ಮ ನಾರ್ಹಯೊತೊ ಶನೊ ಫಾಯಿದೊ? ಎಥ್ರಾನಿ ವಿಶ್ವಾಸ್ ಇನ ಬಚಾ಼ಡ್ಶೆ ಕಿಶು? ಏಕ್ ವೇಳ್ ತುಮಾರೊ ಏಕ್ ಭೈ ನತರ್ ಏಕ್ ಭೇನ್ನ ಫೇರಾನ ಲುಂಗ್ಡು ಅಜು಼ ಯೋ ದನ್ನು ಖಾಣುಬಿ ನಾರ್ಹವಾಪರ್; ತುಮಾರಮ ಎಕ್ಜ಼ಣೊ ಇವ್ಣುನ ಶರೀರ್ನ ಹೋಣುತೆ ಯೋ ನಾದೀನ್, "ಸಮಾಧಾನ್ಥಿ ಜಾ಼ವೊ, ಆಗ್ ಶೇಕಿಲೆವೊ, ಪೇಟ್ಭರಿಖಾವೊ" ಕರಿ ಬೋಲ್ಯುತೊ ಶನೊ ಫಾಯಿದೊ? ಇಮ್ಮಸ್ ಕಾಮ್ಮಕೊಂತೆ ವಿಶ್ವಾಸ್ ಜಾನ್ ಕೊಂತೆ ಹುಯಿರ್ಹುಸ್.
ಅಜು಼ ಆ ಲೋಕ್ನು ಧನ್ದೌಲತ್ ರ್ಹವಾಳೊ ಕೋಣ್ತೋಬಿ ವದೆಖ್ಹ್ಮರ್ಹಾವಳ ಇನ ಭೈನ ದೇಖಿನ್ ಗೋರ್ನ ಕರ್ಯತೊ ದೇವ್ನಿ ಪ್ಯಾರ್ ಇನಾಮ ರ್ಹಾವನ ಉಶೇಕಿ ಶು?