1 ಅನಖ್ಹಾಜೆ ಯೋನನ ಘಣು ಬೇಜಾರ್ ಹುಯು. ಬುಜು ಇರಾದೊಬಿ ಆಯೊ. 2 ಇನಖ್ಹಾಜೆ ಯೋನನೆ ಯೆಹೋವಾನ ಪ್ರಾರ್ಥನೆ ಕರೀನ್, "ಮೆ ಮಾರ ದೇಖ್ಹ್‌ಮ ಥೊ ತದೇಸ್‌ ಅಮ್ ಉಷೆಕರಿ ತುನ ಬೋಲ್ಯೊಥೊ.ತು ಗೋರ್ ಬಿ, ದಯಾಬಿ, ಶಾಂಥಿ ಕದೇಬಿರ‍್ಹವಾಳೊ, ಕದೇಬಿ ಆರ್‌ಗೋರ್‌ ಕರಾವಾಳೊ, ಬುಜು ದಯಾ ಕರಾವಾಳೊ ಕರಿ ಮಾಲೂಮ್‌ಕರೀಸ್‌ನ ಮೇ ತಾರ್ಷೀಷ್ ಖ್ಹಯೇರ್ ಭಣಿ ಮಿಲಾಯ್‌ ಗಯೋಥೊತೆ. 3 ಹಂಕ್ಕೆ ಯೆಹೋವ ಮಾರೊ ದೇವ್ ಮಾರೊ ಜಾನ್‌ ಕಳ್ಳೆ, ಮೆ ಬಚಿರ‍್ಹವಾಥಿಬಿ ಮರಿಜವಾನೂಸ್ ಅಛ್ಛು" ಕರಿ ಬೊಲಿಲಿದೊ. 4 ತದೆ ಯೆಹೋವ ನೆ,"ತು ಇರಾದೊಕರಾನು ಬರೋಬರ್ ನಾ?" ಕರಿ ಬೊಲ್ಯೊ. 5 ಅನ ಬಾದ್‌ಮ ಯೋನನೆ ಖ್ಹಯೆರ್ನ ಮ್ಹೆಲಿನ್ ದನ್ ನಿಕ್‍ಳಸ್ತೆ ಬಜುನ್ ಜಯಿನ್ ಎಕ್ ಜೊಪ್ಡಿನ ನಾಖಿನ್ ಇನ ಹೇಟ್ ಬೇಶಿನ್ ಖ್ಹಯೆರ್ನ ಶಾತ್ ಹುವಸ್‌ಕರಿ ದೇಖುಕರ್‌ತೊಥೊ. 6 ತದೆ ಯೆಹೋವ ದೇವ್ನೆ ಯೋನನ ಅರಾಮ್ ದ್ಯವಾನಖ್ಹಾಜೆ ಎಕ್ ಎಲೊನ ಫೊಟನಿತರ ಕರ್ಯೊ. ಯೊ ಫುಟಿನ್ ಮಾಥಪರ್‌ ಛಾಳೊ ಬುಜು ಮನಸ್ ನ ಅರಾಂ ಮಳ್ಯು. ಯೋನನ ಘಣು ಖ್ಹುಶಿ ಹುಯು. 7 ರೈತೊಬಿ ಇನ ವ್ಹಾಣೆಲ್ಯೊ ದನ್ಮ ದೇವ್ನೆ ಎಕ್ ಕಿಡುನ ಎಲೊಮ ಕಲ್ಡನ ಮ್ಹೆಲ್ಯೊ. ತದೆ ಯೊ ಎಲೊ ಖ್ಹುಕಾಯ್‌ಗಯು. 8 ದನ್ ಉಪ್ಪರ್ ಚಡ್ತೊ ಅವಮ, ದೇವ್ನು ಚಿತ್ತಂಖ್ಹು ದನ್ ನಿಕ್ಳಾನಿ ತರಪ್‌ಥೂ ಗರಮ್‌ ವಾಯಿರೊ ಅಯು, ತಡ್ಕೊ ಯೋನನ ಮಾಥಪರ್‌ ಮಾರ್‌ಪಡ್‌ತಾಖ್ಹತರ್‌ ಇನ ಡೋಳ ಫರನೀತರ ಹುಯು. ಯೊ ಮರ್‌ನುಕರಿ ಆಖ್ಹ್‌ಕರಿನ್, "ಮೆ ಜಿವಾಥಿಬಿ ಮರಿಜವಾನೂಸ್ ಅಛ್ಛು಼" ಕರಿ ಬೋಲಿಲಿದೊ. 9 ಇನ ದೇವ್ನೆ: "ತೂ ಎಲೊನ ಖ್ಹಾಜೆ ಇರಾದೊ ಕರಾನು ಬರೊಬರ್‌ ನಾ"? ಕರಿ ಪುಚನಮ. ಯೋನನೆ, "ಹೊ, ಮರಣ್ ಅವನಿತರ ಇರಾದೊ ಕರಾನು ಬರೊಬರ್ ಖಯೆನಾ" ಕರಿ ಜವಾಬ್‌ ದಿದೊ. 10 ತದೆ ಯೆಹೋವ ದೇವ್ನೆ, "ತು ಯೊ ಎಲೊನ ಮ್ಹಿನತ್ ಕರ‍್ಯೊಕೊಯ್ನಿ ಪಾಳ್ಯೋ ಕೊಯ್ನಿ, ಯೊ ಎಕ್ ರಾತ್ಮ ಫುಟಿನ್ ಎಕ್ ರಾತ್ಮ ಮರಿಗಯು. ಇನಖ್ಹಜೆ ತುನ ಅತ್ರೆ ಗೋರ್‌ ನಾ 11 ಯೊ ಎಲೊನ ಖ್ಹಾಜೆ ಅತ್ರೆ ಗೋರ್‌ಕರಾಪರ್, ಖ್ಹಚ ಜುಟಿ ಮಾಲಂ ಕೊಯ್ನಿತೆ ಎಕ್ ಲಾಕ್ ಇಖ್ಹ್‌ ಹಜಾರ್ ಅದ್ಮಿ, ಜಿನಾವರ್ ಛಾತೆ ಯೊ ಮೊಟು ಖ್ಹಯೆರ್ ನಿನೆವೆನ ಖ್ಹಾಜೆ ಮೇ ಶನ ಗೋರ್‌ ನಾ ಕರ್‌ನು? ಕರಿ ಬೊಲ್ಯೊ.