ಯೋನ ದೇವ್ನಿ ವಾತ್ ಖ್ಹಂಜೊ ಕೊಯ್ನಿತೆ
1 ಎಕ್ ದನ್ನೆ, ಅಮಿತೈ ನೊ ಛಿಯ್ಯೊಹುಯಿರೊತೆ ಯೋನನ ಯೆಹೋವ ದೇವ್ ನು ವಾತೆ ಖ್ಹಂಜಯು. 2 "ನಿನೆವೆ ಕರಿ ಮೊಟು ಖ್ಹಯೆರ್ಮ ರ‍್ಹಾವಳು ಕೆತ್ರೆ ಖರಾಬ್ ವಳು ಕರಿ ಮನ ಮಾಲಂ ಪಡ್ಯು. ತು ಇಜ್ಗ ಜಾ ಇವ್ಣ ಭರೊಬರ್ಥಿ ಭೊಲ್." 3 ರೈತೊಬಿ ಯೋನ ನೆ ಯೆಹೋವ ದೇವ್ ನಿ ಸನ್ನಿದಿಮತು ಚುಕೈಲೆನು ಕರಿ ನಿನವೆನ ನಾ ಜವನು ಬದಲ್ ತಾರ್ಷೀಷ್ ಭ್ಹಣಿ ಫರಿನ್ ಮಿಲೈಜನು ಕರಿ ಗಯೊ. ಯೊಪ್ಪಕರಿ, ಗಾಮ್ಮ ಉತ್ರಿನ್ ಜೈನ್, ತಾರ್ಷೀಷ್ ನ ಜಾವಾಳಿ ಎಕ್ ಜಹಾಜ್‍ನ ದೇಕ್ಯೊ. ಯೆಹೋವ ದೇವ್ ನಿ ಸನ್ನಿದಿಥಿ ದೂರ್ ಜನುಕರಿ ಜಹಾಜ್‍ವಳನಿ ಜೊಡ್ಮ ಮೊಲ್ ದಿನ್ ತಾರ್ಷೀಷ್ ನ ಜಾವಾನ ಛಡಿಗಯೊ. 4 ತದೆ ಯೆಹೋವ ದೇವ್ ನೆ ಮೋಟೊ ವಾಯಿರೊನ ದರ್ಯವ್ ಉಪ್ಪರ್ ಅವನಿತರ ಕರ್ರ್ಯೊ. ಬುಜು ಡುಂಜ್ ಅಯುತೆ ರಫಾಟಮ ಜಹಾಜಸ್ ತುಟಿಜಾವಾಂತ್ರ ಹುವ್ವಲಗ್ಯುಥು. 5 ಜಹಾಜ್‍ನ ಚಲವಳು ಡರಿನ್, ಹರ್ ಎಕ್ ಜಣು ಇವ್ಣ-ಇವ್ಣ ದೇವ್ನ ಮದತ್‍ನ ಕಜೆ ಚಿಕ್ರಾಲಗ್ಯು; ಜಹಾಜ್‍ನೊ ವಜನ್ ಕಮ್‍ಹುವ್ವಾದೆ ಕರಿ ಇನಾಮಾನು ರ‍್ಹಾಚು ಪಾಡಿನ್ ದರ‍್ಯಾವ್‌ಮ ಫ್ಹೆಕ್ಯು; ರೈತೊಬಿ ಯೋನ ಜಹಾಜ್‍ನ ಹೆಟ್ ಭೊರ್ ನಿ ನಿಂದರ್‌ಮ ಖ್ಹುತೋಥೊ.
6 ಅನ ದೆಕ್ಯುತೆ ಜಹಾಜ್‍ನ ಚಲವಳವ್‍ನೊ ಮೊಟೊ ಯೋನಕನ ಅಯಿನ್, ಇನ ವುಟಡಿನ್: "ಶೆಲ ಬಬ ಅರಾಂಖ್ಹು ಅಜ್ಗೊ ಖ್ಹುತೋಸ್ತೆ, ಉಟ್. ತಾರ ದೇವ್ನ ಪ್ರಾರ್ಥನೆ ಕರ್‌, ಯೋತೋಬಿ ಅಪ್ಣ ಉಪ್ಪರ್ ಗೋರ್‌ ವೊತಳಿನ್, ಅಪ್ಣೆ ನಾಶನಂ ನಾ ಕರ್ನುತಿಮ್ ಕರಶ್ ಶುಕಿ," ಕರಿ ಬೊಲ್ಯೊ.
7 ತದೆ ಜಹಜ್ ಚಲಾವವಳು: "ಅಪ್ಣ ಅಯಿರುಸ್ತೆ ಅ ಮುಸಿಬತ್ ನ ಕರಣಂ ಕೊಣ್? ಅವೊ ಅಪ್ಣೆ ಚೀಟಿ ನಾಖಿನ್ ದೆಖೆ" ಕರಿ ಇವ್ಣ ಇವ್ಣಮಸ್ ವಾತೆ ಬೊಲಿಲಿದು. ಇಮ್ ಕರಮ ಚೀಟಿಮ ಯೋನನು ನಾಮ್‍ ಅಯು. 8 ತದೆ ಜಹಜ್ ಚಲಾವಳು: "ಹಮರ ಉಪ್ಪರ್ ಕ್ಹೆವು ಕರಣಂಖ್ಹು ಅಯು ಅ ಅಪಯಂ. ತರು ಕಾಮ್ ಕ್ಹೆವು? ತು ಕಿಜ್ಗಥೊ ಆಯೊ? ತರು ದೇಖ್ಹ್‌ ಕ್ಹೆವು? ಕೆವ್ಹಿ ಜಾತ್‍ವಾಳೊ?" ಕರಿ ಪುಛಾಯು.
9 ಇನ ಯೋನ ನೆ: "ಮೆ ಇಬ್ರಿಯ ವಳೊ, ದರ್ಯವ್ ಜಮೀನ್‍ನಾಭಿ ಉಬ್‍ಜಾಯೊತೆ ಪರಲೋಕಂನೊ ಯೆಹೋವ ದೇವ್ನ ಡರ್ ಮ ಚಲವಳೊ," ಕರಿ ಬೊಲ್ಯೊ. 10 ತದೆ, ಯೋನ ಯೆಹೋವ ದೇವ್‍ಕಂಥೊ ಮಿಲಯ್ ಆಯೋಹುಯೊ ಕರಿ ಬೊಲ್ಯೊ. ಅನ ಖ್ಹಂಜಿನ್ ಘಣು ಡರಿಗಯು. ತದೆ ಯೋನನ, "ತು ಇಮ್ ಶನ ಕರ‍್ಯೊ!", ಕರಿ ಬೋಲ್ಯು. 11 ತದೆ ಮೋಟೊ ವಾಯಿರೊ ಬುಜುಬಿ ಜಾಖ್ಹಾತ್-ಜಾಖ್ಹತಸ್ ಹುವ್ವಲಗ್ಯುಥೂ. ತದೆ ಇವ್ಣೆ ಯೋನನ, "ಆ ದರ‍್ಯಾವ್ ಶೊಪೊ ಹೋಣುಕತೊ ತುನ ಹಮೆ ಶಾತ್ ಕರ‍್ನು ಬೋಲ್?" ಕರಿ ಬೋಲ್ಯು. 12 ತದೆ ಯೋನನೆ, "ಮನಪಾಡಿನ್ ದರ‍್ಯಾವ್‌ಮ ಫ್ಹೆಖೊ ತದೆ ದರ‍್ಯಾವ್ ಶೊಪೊ ಹುಯಿಜಾಶೆ. ಆ ಮೊಟೊ ವಯಿರೊ ಮಾರಖ್ಹಾಜೇಸ್ ತುಮಾರಪರ್ ಐರ‍್ಹುಸ್ತೆ ಕರಿ ಮನ ಮಲಾಂ," ಕರಿ ಬೊಲ್ಯೊ. 13 ರೈತೊಬಿ ಜಹಾಜ್‍ಮ ರ‍್ಹವಳು ಇನ ಮನ್ಯುಕೊಯ್ನಿ, ಕಿಮ್‍ತೋಬಿ ಕನಾರೆ ಲಿಜಾನುಕರಿ ಕರ‍್ಯುತೋಬಿ ದರ್ಯವ್‌ನೊ ಝೋಕಾಳೊ ಜಾಖ್ಹತ್-ಜಾಖ್ಹತಸ್ ಹುಂಕರ್ತು. ಕನಾರೆ ಆವಾನ ಕೋ ಹುಯುನಿ 14 ಹುಯಿಜವದಿನ್ ಇವ್ಣೆ ಯೆಹೋವ ದೇವ್ನ ಪ್ರಾರ್ಥನೆ ಕರ್ಯು, "ಓ ದೇವ್ ಖ್ಹಮಜ್ ಆ ಅದ್ಮಿನು ಮರಣ್ಣು ಪಾಪ್ ಹಮಾರ ಉಪ್ಪರ್ ನಕೊ ಆವಾದೀಶ್. ಆ ಅಪರಾಧ್ ಕೊಯ್ನಿತೆ ಅದ್ಮಿನ ಮಾರ‍ನು ದೋಷ್‍ನ ಹಮಾರ ಉಪ್ಪರ್ ನಕೊನಾಖಿಶ್. ಓ ದೇವ್ ಆ ಖ್ಹಾರು ಹುಯೂತೆ ತಾರೀಸ್ ಇಚ್ಚಾಥಿ", ಕರಿ ಪ್ರಾರ್ಥನೆ ಕರ್ಯು. 15 ಬಾದ್‌ಮಾ ಯೋನನ ಪಾಡಿನ್ ದರ‍್ಯಾವ್‌ಮ ನಾಖಿದಿದು. ತದೆ ದರ‍್ಯಾವ್ ಶೊಪೊ ಹುಯುಗಯೊ. 16 ಅನೇಥಿ ಜಹಜ್‌ಮ ಥೂತೆ ಅದ್ಮಿಮ ದೇವ್ನ ಡರಿಗಯು. ಇವ್ಣೆ ಯೆಹೋವಾಸ್ ಖ್ಹಾಚೊ ದೇವ್ ಕರಿ ನಂಬಿನ್ ಬಲಿಛಡಾಯು. ಬುಜು ಯೆಹೋವ ದೇವ್‌ನಾಸ್ ಡರಿನ್ ಜಿವ್‌ಶು ಕರಿ ಕಬೂಲ್ ಲಿಲಿದು. 17 ಹಂಕಡ್ ಯೋನನ ಗಳನಖ್ಹಾಜೆ ಯೆಹೋವ ದೇವ್ನೆ ಏಕ್‌ ಮೋಟ ಮಾಚ್ಲನ ಮೋಕ್‌ಲ್ಯೊ. ಯೊ ಮಾಛ್ಲಾನ ಪೇಟ್‌ಮಾ ಯೋನ ತೀನ್ ದನ್ ತೀನ್ ರಾತ್ ಥೊ.