1 ಓಬದ್ಯ ದೇಖ್ಯೊತೆ ದೇವ್ ನು ಖ್ಹೊಣ್ಯು, ಎದೋಮ್ ದೇಖ್ಹ್ ನು ಬಾರೇಮ ಯೆಹೋವ ಅಮ್ ಬೊಲುಕರಸ್:

"ಭ್ಹಾರ್‌ ಜಾವೊ, ಎದೋಮ್‌ನ ಉಪ್ಪರ್ ಯುದ್ಧಂಕರನ ಖ್ಹಮೆಜಯೇ"

ಅಮ್ ಕರಿ ಇನ ದೂತರ್ ನ ಮುಲಕ

ಯೆಹೋವನು ಖ್ಹಾರುರಾಜ್ಯಂನ ಬೊಲಿಮೊಕಲ್ ರಕ್ಯೊಸ್.

ಎವ್ಣೆತೆ ಅಯುತೆ ಆ ಸಮಚರಂಖ್ಹಾರು ಹಮೇ ಖ್ಹಂಜ್ಯ.

2 "ಎದೋಮ್, ಹಂದೆಕ್, ಖ್ಹಾರು ದೇಖ್ಹ್ ಮ ತುನ ತೊಡು ಕರಿದಿಶ್.

ತೂ ಘಣು ಶರಂ ಮ ಗುರಿಹುಯಿಸ್.

3 ತಾರು ದುರಹಂಕಾರ್ ತುನ ವಂಚನೆ ಕರ್ಶೆ."

ಉಪ್ಪರ್ ಲ್ಯು ಸ್ಥಾನಂ ಮ ವಾಸಮ್ ಹುಯಿರೊಸ್;

ಬಂಡನಿ ಪದರ್ ಮ ಜ಼ತನ್ ಛ್ಹು ಕರಿ;

ಮನ ಜಮೀನ್‌ಪರ್ ಉತರವಳು ಕೋಣ್?’ ಕರಿ ಬೊಲುಕರಸ್.

4 ಇನ ಯೆಹೋವ: "ತೂ ಖ್ಹಂಳಿವುಡಸ್ತೆ ಜ್ಹಗೊತೊಡಿ ವುಡ್ ತೊ

ರೈತೊಬಿ ಶುಕ್ಕರ್ ರ‍್ಹಾಸ್ತೆ ಜ್ಹಗೊಮ

ರೈತೊಬಿ ಇಜ್ಗೊಥುಬಿ ತುನ ಉತ್ರೈನಖಿದಿಶ್" ಕರಿ ಬೋಲಾಸ್.

5 ತುಮರಮ ಚೊಟ್ಟು ರ‍್ಹಾವೊ,

ರತ್ ನು ಚೊಟ್ಟು ರ‍್ಹಾವೊ ಅಯುತೊ

ಇವ್ಣೆ ಇವ್ಣನ ಹೊಣುತೆ ಎತ್ರನ ಖ್ಹೊತಿಲಿನ್ ಉಳುಜಸ್ತೆಖಾಯೆ ನಾ?

6 ರೈತೊಬಿ ಏಸಾವ್ ನು ಆಸ್ತಿಪಾಸ್ತಿ ಅಕ್ಕುಸ್ ಜ್ಹೊಟೈಲಿದು.

7 ಮಾರ ಖ್ಹಾರದೊಸ್ತ್ ತರ ಫಿಟೆ ಫಿಟೆ ಅಯೊ.

ತಾರು ಅಚ್ಚು ದೊಸ್ತ್ ತುನ ಠಗೈನ್ ಹರೈರಕ್ಯುಸ್.

ತರು ಖಾಣು ಖದುತೆ ಇವ್ಣೆಸ್

ಜ್ಞಾನಂ ಕೊಯಿನ್ತೆ ತುನ ಜಾಳ ಬಿಚೈರಕ್ಯುಸ್.

8 ಯೆಹೋವ ಅಮ್ ಬೊಲುಕರಸ್:

"ಯೋ ದನ್ಮ ಎದೋಮ್ ನು ಜ್ಞಾನಿಖ್ಹರು

ಏಸಾವ್ ನು ಫಡ್ ಮ ಅಕ್ಕಲ್ ನು ಜಿನವರ್ ಖ್ಹರು ಮೇ ಮಠವಕೊಯಿನ್ತೇ ಮೆಂದಿಶ್ ನಾ?

9 ತೇಮಾನ್ ಮುಲಕ್, ತಾರು ಯುಧಂಕರವಾಳು ಡರಿಜಾಶೆ;

ಏಸಾವ್ ನು ಟಬರ್ಕಮ ಅಕ್ಕುಸ್ ನಾಶಂಹುಯಿಜಶೆ.

10 "ತಾರೊ ನ್ಹಾನೊ ಭ್ಹಯ್‍ಹುಯಿರೊತೆ ಯಕೋಬ್‍ ನು ವಿರೋದ್ ಖ್ಹು ಚಲಯುತೆ

ಹಿಮ್‍ಸೆನು ಕಮ್ ಖ್ಹು ತೂ ಶರಂ ಕಡವಾಳೊ ಹುಯಿಶ್.

ನಿತ್ಯನಾಶಂ ಹುಯಿಜಶೆ.

11 ತಾರೊ ನ್ಹಾನೊ ಭ್ಹಯ್‍ನು ಅಸ್ತಿನ ಚೊರಿ ಕರ್ಯುತೆ ದನ್ಮ

ತು ಅಲದನಿತರ ದೆಕ್ತೊ ಇಬ್ರ‍್ಯೊಥೊ.

ಅಲದ ದೆಖ್ಹ್ ವಾಳು ಇನು ಗಾಮ್ ನು ದರ್ವಜನ ಮ್ಹೈತುಅಯಿನ್

ಯೆರೂಸಲೇಮ್ ನು ಅಸ್ತಿನ ಚಿಟಿನಕ್ಯುತೆ ದನ್

ಥು ತೂಬಿ ಇವ್ಣಿನ್ ತರ ಛಾ.

12 ತಾರೊ ನ್ಹಾನೊ ಭ್ಹಯ್‍ನು ಖಾರಬ್ ದನ್ಮ,

ಇವ್ಣ ಕಷ್ಟಕಾಲಮ್ಮ ತೂ ಚುಕ್ಕೆ ದೆಕ್ ತೊ ನಾ ರ‍್ಹಾವನ್ ಥು.

ಯೆಹೂದ್ಯರ್‌ ನು ನಾಶಂ ನು ದನ್ಮ ಸಂತೋಷಂ ನಾ ಪಡನ್ ತು.

ಇವ್‌ಣ ಕಷ್ಟನು ಕಾಲಮ್ಮ ತು ಹಂಕಾರ್ ನಾ ಕರ್ನು ಥು.

13 ಮಾರು ಅದ್ಮಿನು ಕಷ್ಟನು ಕಲಮ್ಮ ತೂ ಇನು ಪುರ್ವ ಭಣಿನು ದರ್ವಜನ ಮ್ಹೈತು ನಾ ಜನು.

ಇನು ಅಸ್ತಿನ ತು ಹತ್ ನಾ ಘಲ್ನು ಥು.

14 ಛುಕೈಲಿನ್ ನಶಿವುಳಿಜತುತುತೆ ಇವ್ಣನ ಮರಕಿದೆವನಕಜೆ

ಎಕ್ಕಸ್ ವಟ್ ಪರ್ ನಾ ಹುಬಿರ‍್ಹವಂತು.

ಕಷ್ಟನು ಪರಸ್ಥಿತಿಮ ಛುಕೈರಕ್ಯುಸ್ತೆ

ಇವ್ಣಮ ಶತ್ರುನ ಹಾತ್‌ಮ ನಾ ಒಪ್ಪಿಸವಂತು.

15 "ಅಕ್ಕಸ್ ದೇಖ್ಹ್ ನ ಯೆಹೋವ ನೊ ದನ್ ಖನ್ನೆಅಯಿರುಸ್.

ತೂ ಕರ್ಯೊತೆಸ್ ತುನಾಬಿ ಉಶೆ.

ತಾರು ಖರಬ್ ಕಮ್ ಅಕ್ಕುಸ್ ತಾರ ಮುಡ್ಕ್ಯನ ಉಪ್ಪರ್ ಆವ್‌ಶೆ.

16 ಖ್ಹಾರ ಅದ್ಮಿ ಪವಿತ್ರಂನು ಫಡ್ ಉಪ್ಪರ್ ಮಾರು ದಂಡನೆನು ಕಡುಪಾಣಿ ಪಿರಕ್ಯಸ್.

ಇಮ್ಮಸ್ ಖ್ಹಾರು ದೇಖ್ಹ್ ಕಡುಪಾಣಿ ಪಿಶೆ.

ಹೋ, ಘಡಿ ಘಡಿ ಪಿನ್ ತೂರಾಡ್ ಶೆ.

ಅಂತ್ಯಮ್ಮ ಕೊಯ್ನಿತಿಮ್ ಹುಯಿಜಷೆ.

17 "ರೈತೊಬಿ ಚೀಯೋನ್ ಫಡ್ ನ ಉಪ್ಪರ್ ಛುಕಿಹುಯುವು ರ‍್ಹಾಶೆ.

ಯೋ ಪರಿಶುದಂ ಜಗೊ ಕರಿ ಬೊಲವ್ ಶೆ.

ಯಕೋಬ್‍ನಿ ಖಾನ್ ದಾನ್‌ ವಾಳು

ಇವ್ಣು ಸೊಂತ್ ಆಸ್ತಿನ ಪಛ್ಹು ಅನುಭವಂ ಕರ್ ಶೆ.

18 ಯಕೋಬ್ ನು ಖನ್ ದನ್ ವಳು ಅಗ್ ನಿ ತರ;

ಯೋಸೇಫ್ ನು ಖನ್ ದನ್ ವಳು ಜ್ವಾಲೆನಿತರ.

ಆ ಬೆ ಜೋಡ್ಮ ಮಳಿನ್ ಖ್ಹುಕ್ಕ ಘಖ್ಹ್ ನಿ ತರ ಛಾತೆ

ಏಸಾವ್ ನು ಖನ್ ದನ್ ನ ಧಗ್ ಧಗ್ ಕರಿ ಬಾಳಿನಕಿದಿಶೆ ದಿಶೆ.

ಏಸಾವ್ ನು ಹಾತ್‌ಮ ಕೋಣ್‌ಬಿ ಕೊ ಬಚ್ ಶೆನಿ."

ಆ ಯೆಹೋವ ನು ವಾತ್.

19 ತದೆ ದಕ್ಷಿಣ್ ವಳು ಏಸಾವ್ ನು ಫಡ್ ನ ಇವ್ಣ ಭಣಿ ಫರೈಲಿಶೆ.

ಪಶ್ಚಿಮ್ ನು ಅಲದು ಟಬರ್ಕೊವಳು ಫಿಲಿಷ್ಟಿಯವಳು ಎಫ್ರಾಯಿಮ್ ಬುಜು

ಸಮಾರ್ಯವಳವ್ನು ಜಮಿನ್ ನ ಇವ್ಣುಕರಿಲಿಶೆ.

ಬೆನ್ಯಾಮೀನ್ ಖಾಂದಾನ್‌ವಾಳ ಗಿಲ್ಯಾದ್‍ನ ಸೊಂತ್‍ ಕರಿಲಿಶೆ.

20 ಕೈದಿ ಹುಯಿರುಸ್ ತೆ ಇಸ್ರಾಯೇಲ್‌ ನು ಸಿಪಯಿಖ್ಹಾರು

ಕಾನಾನ್ ಮುಲುಕ್ ಥು ಚಾರೆಪತಿತೊಡಿ ಇವ್ಣುಕರಿಲಿಶೆ.

ಸೆಪಾರ ಕರಿ ಬೊಲಸ್ತೆ ಖ್ಹಯೆರ್ಮ ಕೈದಿ ಹುಯಿರುತೆ ಯೆರೂಸಲೇಮ್ವಳು

ದಕ್ಷಿಣ್ ಟಬರ್ಕನು ಖ್ಹಾರು ಖ್ಹಯೇರ್ ಸೊಂತ್‍ಕರಿಲಿಶೆ.

21 ಬಚಡವಳೊ ಏಸಾವ್ ನು ಫಡ್ ನ ಆಳಾನ

ಚೀಯೋನ್ ಫಡ್ ನ ಛಡ್ ಶೆ.

ತದೆ ರಾಜ್ ಭಾರಂ ಯೆಹೋವಾ ನು ಹುಯಿರ‍್ಹಶೆ."