1 ಯೋನನ ಯೆಹೋವ ದೇವ್ ನಿ ವಾತೆ ಫಚು ಖ್ಹಂಜಯುತೆ: 2 ಯೆಹೋವ ದೇವ್ ಯೋನನ, "ತೂ ಉಠೀನ್ ಯೊ ಮೊಟು ಖ್ಹಯೆರ್ ನಿನೆವೆನ ಜಾ. ಜಯ್‌ನ್ ಮೇ ಬೋಲುಸ್ತೆ ವಾತ್ನ ಅದ್ಮಿವ್‍ನ ಬೋಲ್," ಕರಿ ಬೊಲ್ಯೊ. 3 ಯೆಹೋವ ದೇವ್ನೆ ಕಿಮ್ ಬೋಲ್ಯೊಕಿ ಇಮ್ಮಸ್ ಯೋನ ನಿನೆವೆ ಖ್ಹಯೆರ್ ನ ಗಯೋ. ಯೊ ಖ್ಹಯೆರ್ ತೀನ್ ರೋಜ್‌ನಿ ಚಾಲ್ ಎವ್ಡು ಮೊಟು ಖ್ಹಯೆರ್ ಹುಯಿರುಸ್. 4 ಯೋನ ನಿನೆವೆ ಖ್ಹಯೆರ್ ಮಾಕರಿ ಎಕ್ ರೋಜ್‌ನಿ ಚಾಲ್ ಎವ್ಡು ಚಾಲಿನ್ ಜೈನ್ ಅ ಹುಯಿಜವದಿನ್ ಯೋನ ಯೆಹೋವ ದೇವ್ನಿ ವಾತೆ ನ ಬೊಲ್ತೊ, "ಖ್ಹಾರ ಅದ್ಮಿ, ಖ್ಹಂಜೊ: ಆ ಖ್ಹಯೆರ್ನ ಚಾಳಿಖ್ಹ್ ರೋಜ್‌ನ ಪಾರ್ ಯೆಹೋವ ದೇವ್ ನಾಶನಂ ಕರ್ಶೆ," ಕರಿ ಬೊಲ್ಯೊ. 5 ನಿನೆವೆವಾಳು ದೇವ್ನಿ ಯೊ ವಾತೆನ ನಂಬ್ಯು. ಹರ್ ಎಕ್ ಜಣು ಉಪಾಸ್ ರ‍್ಹನು ಕರಿ ವಾತೆ ಬೊಲಿಲಿದು. ಅಡ್ಡಾಣಿಥು ಧರೀನ್ ಶಾಣತೋಡಿ ಅಕ್ಕುಸ್ ಜಣು ಎಕ್ಕಸ್ ದಿಲ್‍ಖ್ಹು ಘುಂಗ್‌ಡಿ ಖ್ಹು ಲಪೇಟಿಲಿದು. 6 ಆ ಪುಕಾರ್‌ನ ನಿನೆವೆನೊ ರಾಜಾನ ಖ್ಹಂಜಯು. ಯೊ ರಾಜಾನಿ ಕುರ್ಚಿ ಥು ಉತ್ರಿನ್, ಇನು ರಾಜ್ ನು ಪೇರಖ್ಹೊನ ಉತಾರೀನ್, ಘುಂಗ್‌ಡಿ ನ ಹೊಡಿಲಿನ್ ರಾಕ್‌ಮ ಬೇಶಿಗಯೊ. 7 ತದೆ ನಿನೆವೆನು ಅದ್ಮಿವ್ ನ ಎಕ್ ರಾಜಾನಿ ಹುಕುಮ್‌ ದಿದೊ, "ನಿನೆವೆನು ಅಖ್ಖುಸ್ ಅದ್ಮಿರ‍್ಹಾವೊ, ಢಾಂಡು-ಗಯಿನ ಚೆಲ್ಕರ‍್ಹಾವೊ, ಬೊಕ್ಡ-ಮ್ಹೆಂಡರ‍್ಹಾವೊ, ಖಣುಪಾಣಿ ನಾ ಪಿನು. 8 ಅಖ್ಖುಸ್ ಅದ್ಮಿಖ್ಹರು ಘುಂಗ್‌ಡಿ ನ ಹೊಡಿಲಿನ್ ಜಿನವರ್ನಬಿ ಹೊಡವ್ ನು. ದೇವ್ನ ಗಟ್‍ಖ್ಹು ಪ್ರಾರ್ಥನೆ ಕರ್‌ನು. ಹರ್‌ ಎಕ್ ಜಣು ಖರಾಬ್ ವಾಟ್‌ಮಾಥು ಫರೊ, ಮಾರ್ ತೋಡ್ ಖ್ಹಾರು ಮ್ಹೆಲಿದೆವಾದೆ. 9 ಕಿನ ಮಲಾಂ, ಅಮ್ ಕರ‍್ಯಾತೊ ಎಕ್ ವಳಿ ದೇವ್ ನು ಮನಸ್ ಫರೈನ್, ಗೋರ್‌ ಕರೀನ್ ಇನೊ ಇರಾದೊ ಮ್ಹೆಲಿನ್, ಅಪ್ಣ ನಾಶಂ ನಾ ಕರ್ನುತಿಮ್ ಬಚಾವಜೈ." 10 ನಿನೆವೆ ಖ್ಹಯೆರ್‌ವಾಳು ಇವ್ಣ ಖರಾಬ್ ವಾಟ್‌ಮಾಥು ಫರಿಗಯುತೆ ದೇವ್ನೆ ದೇಖ್ಯೋ. ದೇಖಿನ್‌ ಗೋರ್‌ಕರೀನ್ ಇವ್ಣ ದೆವನುಥುತೆ ವದಖ್ಹೊ ನಾ ದೆನುತಿಮ್ ಕರ್ಯೊ.