Amor de casal
O amor de casal é celebrado na Bíblia como dom sagrado. O Cântico dos Cânticos exalta a beleza do amor conjugal — íntimo, exclusivo e forte como a morte.
मीं नगीनेरे ज़ेरे अपने दिले सेइं लेइतां रख,
ते जंत्रेरे ज़ेरे तू एपनी पैखड़ी पुड़ बेन्धतां रख,
किजोकि प्यार मौतरो ज़ेरो ताकतबरे,
ते तैसेरी जलन कब्रारी ज़ेरि बेरहमे
तैसेरी ज्वाला अग्गरी ज़ेरि भड़कोरीए।
बल्के परमेशरेरी अग आहे।
पैनेरी हड़ैई सेइं भी प्यार न हिश्शे,
ते न समुन्दरे मां डुबी सके,
अगर कोई अपने घरेरी सारी जाईदात प्यारेरे
बदले दे फिर भी तै बड़ो घटिया समझ़ो गालो।
लैड़रो ढ्ला
हे मेरी बेइन, हे मेरी दुल्हन, तीं मेरो दिल च़ोरी छ़डोरोए,
एपनी एछ़्छ़री एक्की नज़री सेइं
ते अपने गलेरे एक्की हीरे सेइं मेरो दिल घिन्नी छ़डोरोए।
अपने ओठन सेइं तू मीं फुम्मड़ी दे!
किजोकि तेरो प्यार दाछ़रे रस्से करां जादे रोड़ोए।
तेरे किसमां-किसमां केरे इत्रेरी खुशबू बड़ी रोड़ीए।
तेरू नवं उलटावरे इत्रेरू ज़ेरू आहे,
एल्हेरेलेइ कुइयां तीं सेइं प्यार केरतिन।
हे मेरी ट्लारी, तू केत्री खूबसूरत आस, हेर तू केत्री खूबसूरत आस
तेरी एछ़्छ़ी कबूतरेरी ज़ेरिन।
लाड़ी
हे मेरे ट्लारा तू केत्रो मने पसंद एजनेबालो आस,
ते इश्शू बिछ़ान भी सब्ज़ आहे;
फिरी यहोवा परमेशरे ज़ोवं, "आदमेरू अकैल्लू रानू ठीक नईं; अवं तैसेरेलेइ अक एरहो मद्दतगार बनेइलो ज़ै तैस सेइं मेल खाए।"
ते यहोवा परमेशरे तै दल्लोड़ी ज़ै तैने आदमे मरां कढोरी थी, तैसारी अक कौन्श बनाई; ते तै आदमे कां आनी। तैखन आदमे ज़ोवं, "हुनी ई मेरी हेड्डन मरां हड्डी ते मेरे मासे मरां मासे; एल्हेरेलेइ इसेरू नवं नारी भोल्हु, किजोकि ऐह नरे मरां निस्सोरीए।" एल्हेरेलेइ मड़द अपने अम्मा-बाजी करां अलग भोइतां अपनि कौन्शी सेइं मिलोरो रालो ते तैना दूईये अक जान भोल्हां।
ज़ैनी कौन्श ड्लाई, तैस रोड़ी चीज़ मैल्ही,
ते यहोवारो अनुग्रह तैस पुड़ भोवरोए।
तेरो नाग धन राए; ते अपने कौन्शी सेइं साथी खुश रह ज़ैस सेइं तीं ड्लाह बनेवरो थियो ज़ैखन तू जुवान थियो,
तै तेरे लेई ट्लारी हिरनी या खूबसूरत सांभेरनरी ज़ेरि भोए,
तैसारी छाती हमेशा तीं खुश रख्खे,
ते तैसेरो प्यार हमेशा तीं फिदा केरतो राए।
हे मेरे मट्ठा, तू बदचलन कौन्शी पुड़ किजो फिदा भोस,
ते बेखली कौन्शी किजो छैती सेइं लास?
एल्हेरेलेइ हुनी तैना परमेशरेरी नज़री मां दूई नईं, पन अक्के आन। एल्हेरेलेइ ज़ैना परमेशरे ज़ोड़ोरेन, तैन्न कोई मैन्हु अलग न केरे!"
ज़ैना लोक होरन सेइं प्यार केरतन तैना सबर ते दयाई सेइं कम केरतन, तैना जलन न केरन, तैना अपनि बडीयाई न केरन, ते न घमण्ड केरन। तैना होरन बेइज़्ज़त न केरन, तैना खुदगरज़ न भोन, जल्दी क्रोध न केरन ते ज़ैना बुरी गल्लां तैन केरे खलाफ भोइ, तैन तैना याद न केरन। ते तैन केरे खलाफ ज़ैना पाप केरतन तैना, तैन बड़े आसान तरीके सेइं माफ़ केरतन। तैना खुशी न भोन ज़ैखन लोक बुरू केरतन, पन तैना तैखन खुश भोतन ज़ैखन लोक तैन केरतन ज़ैन ठीक ते सच़्च़ू। तैना सब गल्लां झ़ैल्लतन, प्यार विश्वास कधी न गुवाए, ते असन परमेशरे पुड़ भरोसो केरनेरे काबल बनाते, मुशकलन ते तकलीफन मां सबर रखते।
एन्च़रे मुन्श अपने कुआन्शी सेइं अपने जानी बराबर प्यार केरे। ज़ै अपने कुआन्शी सेइं प्यार केरते, तै एप्पू सेइं प्यार केरते। किजोकि कोन्चे कधी अपने जानी सेइं बैर नईं रखोरो, बल्के तैसेरी हेरगेश कियोरीए, ज़ेन्च़रे मसीह भी कलीसियाई सेइं केरते।
पन तुसन मरां हर कोई अपने कुआन्शी सेइं एप्पू बराबर प्यार केरे, ते कुआन्श भी अपने मुन्शेरी इज़्ज़त केरे।
इन सेब्भन करां बा प्यारे ज़ै सेब्भन सिद्धतारो पटकोए बन्धा।
एक्की करां दूई रोड़ेन, तैन केरि मेहनतरो रोड़ो फल भोते। किजोकि अगर तैन मरां अक बिछ़ड़े, त होरो तैस खड़े केरेलो; पन अफ़सोस तैस पुड़, ज़ै अकैल्लो भोइतां खिरके, ते तैस कोई खड़ो केरनेबालो न भोए। फिरी अगर दूई ज़ने अकोट्ठे झ़ुलतन त तैन निग्घू लग्गेलू, पन अकैल्लो केन्च़रे निग्घो रेइ सकते? अगर कोई अकैल्ले पुड़ हावी भोए त भोए, पन अगर दूई ज़ने भोन तैना तैसेरो सामनो केरि सकेले। ज़ै रस्सी ट्लाई डोरिन सेइं बनाई गातीए तै जल्दी न ट्लुटे।
कुन तैनी अक्के नईं बनेवरी हालांकि होरि भी आत्मा तैस कां थी? ते एक्के किजो बनाई? एल्हेरेलेइ कि तै परमेशरेरे काबल औलाद चाते। एल्हेरेलेइ तुसां अपने आत्मारे बारे मां खबरदार राथ, ते तुसन मरां कोई अपने जुवैनरे कौन्शी सेइं धोखो न केरे।
"ज़ैस मड़देरो नंव्वो-नंव्वो ड्लाह बनोरो भोए, तै सेनाई सेइं साथी न गाए ते न कोन्ची कम्मेरो भार तैस पुड़ छ़डो गाए; तै पूरे साले अपने घरे मां आज़ाद रेइतां अपनि ड्लाहोरी कौन्शी खुश केरतो राए।