1 एन गल्‍लां केरे बाद क्षयर्ष राज़े अगागी हम्मदातारे मट्ठे हामाने* अक बड्डो उच्‍चो दर्जो दित्तो, तैस खासयत देइतां तैसेरे साथी हाकिमां केरे तखतन करां तैसेरो तखत उच्‍चो कियो। 2 राज़ेरे अपने सारे अधिकारी ज़ैना राज़ेरे मेहलेरे फाटके मां रहते थिये, तैना हामाने कां झुकतां मथ्थो टेकते थिये, किजोकि राज़े तैसेरे बारे मां ऐह हुक्म दित्तोरो थियो। पन मोर्दकै न त झुकतो* थियो ते न मथ्थो टेकतो थियो। 3 ते राज़ेरे अधिकारी ज़ैना राज़ेरे मेहलेरे फाटके मां रहते थिये, तैनेईं मोर्दकै पुछ़ू, "तू राज़ेरो हुक्म किजो न मनतस।" 4 ज़ैखन तैना तैस सेइं रोज़ एन्ने केरते राए, त तैनी तैन केरि अक गल न मन्नी, तैखन तैनेईं इन हेरनेरी इच्छाई सेइं कि मोर्दकैरी ई गल च़लेली कि नईं, हामाने ज़ोवं, तैने तैन ज़ोवरू थियूं कि अवं यहूदी आईं। 5 ज़ैखन हामाने हेरू, कि मोर्दकै न झुके, ते न मीं कां मथ्थो टेके, तैखन हामाने बड़ी सरक अई। 6 तैने सिर्फ मोर्दकै मारनो ठीक न समझ़ो, बल्के तैनेईं हामाने इन ज़ोवरू थियूं, कि मोर्दकै कोस कौमरो आहे, एल्हेरेलेइ हामाने क्षयर्षेरे सूबन मां रानेबाले सारे यहूदी मोर्दकैरी कौम सेमझ़तां, विनाश केरनेरो इरादो कियो।

7 क्षयर्ष राज़ेरे राज़ केरनेरे बारोवं सालेरे नीसान नंव्वेरे पेइले महीने मां, हामाने अदार नंव्वेरे बारोवं महीने तगर एक्‍की-एक्‍की दिहाड़ेरे ते एक्‍की-एक्‍की महीनेरे लेई "पूर" मतलब चिट्ठी अपने सामने छ़डेई। 8 ते हामाने क्षयर्ष राज़े सेइं ज़ोवं, "तेरे राज़ेरे सारे सूबन मां मुल्खे-मुल्खेरे लोकन मां तितर-बितर भोइतां फैलोरी अक कौमे, ज़ेसेरे नियम अलग आन। ते तैना राज़ेरे कानूने पुड़ न च़लन, एल्हेरेलेइ तैना एन्च़रे छ़डनेरे राज़ेरे लेई ठीक नईं। 9 अगर राज़े मन्ज़ूर भोए त खतम केरनेरो हुक्म लिखो गाए, ते अवं राज़ेरे भण्डैरी केरे हथ्थे राज़ेरे भण्डारे मां पुज़ानेरे लेई, दश हज़ार चैंदरे सिक्‍के देइलो" 10 तैखन राज़े अपनि मोहोरी बाली आंवठी अपने हथ्थेरां खोलतां अगागी हम्मदातारे मट्ठे हामाने दित्ती, ज़ै यहूदी लोकां केरो बैरी थियो। 11 ते राज़े हामाने सेइं ज़ोवं, "तै चाँदी तीं दित्ती जेवरीए, ते तैना लोक भी, ताके तैन सेइं तू ज़ेरो सलूख केरनो चातस केर।"

12 फिरी तैस्से पेइले महीनेरी तेरहोवं दिहाड़े राज़ेरे लिखनेबाले कुजाए, ते हामानेरे ज़ोनेरे मुताबिक राज़ेरे सब अधिपति, ते सब सूबां केरे प्रधान, ते मुल्खे-मुल्खेरे लोकां केरे हाकिमां केरे लेई चिट्ठी, एक्‍की-एक्‍की सूबां लफसन मां, ते एक्‍की-एक्‍की मुल्खेरे लोकां केरि भाषाई मां क्षयर्ष राज़ेरे नंव्वे सेइं लिखी जेई। ते तैन मां राज़ेरी मोहरी बाली एंवठरी छापी लाई जेई। 13 राज़ेरे हर सूबे मां एस बारे मां चिट्ठी हर डाकरे ज़िरिये भेज़ी जेई, कि एक्‍की दिहैड़ी मां, मतलब अदार नंव्वेरे बारोवं महीनेरे तेरहोवं दिहाड़े, कुन जुवान, कुन बुढे, कुन कौन्शां, कुन मट्ठां, सारे यहूदी नाश किये गान। ते तैन केरि जाईदात लुट्टी गाए। 14 तैस हुक्मेरी नकलां सैरी सूबन मां भेज़ी जेई कि सैरी मुल्खां केरे लोक तियार भोइ गान। 15 ऐह हुक्म शूशन क़िले मां दित्तो जेव, ते डाकी बाले राज़ेरे हुक्मे सेइं अकदम निस्सी जे। राज़ो ते हामान शराब पीने लगे। पन शूशन नगरे मां घबराट फैली जेई।