1 ज़ैखन मोर्दकै एस गल्‍लरो पतो लग्गो त तैनी दुखेरे मारे अपना लिगड़ां छ़िंदां ते टाट पलेटतां, ते अपने दोग्गे पुड़ मांज़न छ़ेडतां, नगरे मां गेइतां उच्‍चे ते दुखेरे शब्द ज़ोइतां चिन्डां मारने लगो। 2 ते तै राज़ेरे मेहलेरे फाटके कां पुज़्ज़ो, पन टाट पलेटतां राज़ेरे मेहले मां गानेरो कोन्ची हुक्म न थियो। 3 ते हर एक्‍की सूबे मां ज़ैड़ी-ज़ैड़ी राज़ेरो हुक्म ते नियम पुज़ोरो थियो, तैड़ी-तैड़ी यहूदी लोक मातम ते बरत रेखतां लेरां लगे देने। बल्के बड़े लोक टाट पलेटतां बिश्शोरे राए।

4 एस्तेर रैनरी कम केरनेबैली ते खोजे लोकेईं गेइतां तैस सेइं ज़ोवं, तैखन एस्तेर रानी बड़ी परेशान भोइ। ते मोर्दकै कांजो लिगड़ां भेज़तां ई समाद भेज़ो, कि टाट खोलतां लिगड़ां ला, पन तैनी लिगड़ां न नेआं। 5 तैखन एस्तेरां राज़ेरे खोजन मरां हताक, ज़ै राज़े तैस कां रानेरे लेई रखोरो थियो, कुजेइतां हुक्म दित्तो, कि मोर्दकै कां गेइतां पतो केर, कि ऐह कुन गल्‍ले, ते एसेरी कुन वजा आहे। 6 तैखन हताक नगरेरे तैस चौवके मां, ज़ै राज़ेरे मेहलेरे फाटके सामने थियो, मोर्दकै कां जेव। 7 तैखन मोर्दकै तैस सेइं सारो बिस्तार दित्तो कि मीं सेइं कुन-कुन बीतेरूए, ते हामाने यहूदी लोकां केरे नाश केरनेरे लेई राज़ेरे भण्डारे मां केत्री चाँदी देनेरो वाधो कियोरो थियो, ऐह सब बिस्तार दित्तो। 8 फिरी ज़ै यहूदी लोकां केरो नाश केरनेरो हुक्म शूशन नगरे मरां दित्तोरो थियो, तैसेरी अक नकल भी हताकेरे हथ्थे मां, एस्तेरारे हिरानेरे लेई दित्ती, ते तैस सारो हाल शुनाने, ते ऐह हुक्म देनेरे लेई ज़ोवं, कि अन्तर राज़े कां गेइतां अपने लोकां केरे लेई छंदे केरतां बिनती केर। 9 तैखन हताके एस्तेरी कां गेइतां मोर्दकै एरी सैरी गल्‍लां शुनेई। 10 तैखन एस्तेरां हताके मोर्दकै सेइं एन ज़ोनेरे लेई हुक्म दित्तो, 11 "राज़ेरे सारे अधिकारी, बल्के राज़ेरे सारे सूबां केरे लोकन पतोए, कि कोई मड़द, कोई कौन्श, कोई कि न भोए, ज़ै कोई बगैर हुक्मे राज़ेरे अंगने मां राज़े कां अन्तर गाए, तैस मारनेरो हुक्मे। पन ज़ेसेरे पासे राज़ो अपनि सोटी रख्खे तैए बच़ते। पन 30 दिहाड़े भेवरेन राज़े अवं एप्पु कां नईं कुजेवरी।" 12 एस्तेरारी एना सैरी गल्‍लां हताके गेइतां मोर्दकै शुनेई। 13 तैखन मोर्दकै एस्तेरी जो ऐह बिस्तार भेज़ो, "तू अपने मने मां एन न सोचां, कि अवं राज़ेरे मेहले मां राने सेइं बाकी यहूदी लोकन सेइं साथी मारी न गाली। 14 किजोकि तू इस मौके च़ुप राए, त कोन्ची न कोन्ची उपाए सेइं यहूदी लोकां केरो छुटकारो ते मुक्ति भोइ गाली, पन तू अपने बाजी केरे घराने समेत नाश भोइ गाली। कुन पतोए, तीं एरे मुश्किल वक्तेरे लेई रानी भोनेरो पद मैल्होरो भोए?" 15 तैखन एस्तेरां मोर्दकै कां ऐह बिस्तार भेज़ो, 16 "तुस गेइतां शूशन नगरेरे सारे यहूदी लोकन अकोट्ठे केरतां, तुसां सब मिलतां मेरे खातर बरत रखा, ते ट्लाई दिहाड़े न किछ खेइयथ ते न पियथ। ते अवं भी एपनी सहेलन सेइं साथी एस्से तरीके सेइं बरत रखेली। ते एस्से हालती मां अवं फारसेरे नियमेरे खलाफ राज़े कां अन्तर गाली। ते अगर मीं मरनू भी पेलू त अवं मरेली।" 17 तैखन मोर्दकै च़लो जेव ते एस्तेरारे हुक्मेरे मुताबिक तैन्ने कियूं, ज़ैन तैसां ज़ोवरू थियूं।