1 तैस राती राज़े निड्ल न आई, एल्हेरेलेइ तैनी अपने एक्‍की अधिकैरी हुक्म दित्तो, ते तैसेरे हुक्मे सेइं इतिहासेरी किताब आनी, ते पेढ़तां राज़े शुनाई जेई। 2 तैस मां एन लिखोरू मैल्हू, कि ज़ैखन क्षयर्ष राज़ेरे खोजे हाकिम ते ज़ैना पहरदार भी थिये, तैन मरां बिगताना ते तेरेश नंव्वेरे दूई मड़द ज़ैनेईं राज़ो मारनेरी योजना बनेवरी थी, तै मोर्दकै बांदी कियोरी थी। 3 तैखन राज़े पुछ़ू, "एसेरे बदले मोर्दकै कुन इनाम दित्तू ते बडीयाई की गाए?" राज़ेरे ज़ैना खोजे सेवा केरि राहोरे थिये, तैनेईं तैस जुवाब दित्तो, "तैसेरे लेई किछ भी नईं कियोरू।" 4 राज़े पुछ़ू, "अंगने मां कौने?" तैस मौके हामान राज़ेरे मेहलेरे बेइरीं अंगने मां इस इरादे सेइं एवरो थियो, कि ज़ै खम्भो मोर्दकैरे लेई तियार कियोरो थियो, तैस पुड़ टंगनेरे लेई राज़े सेइं गलबात केरे। 5 तैखन राज़ेरे सेवकेईं तैस जुवाब दित्तो, "अंगने मां त हामान खड़ोए।" राज़े ज़ोवं, "तैस अन्तर कुजाथ।" 6 ज़ैखन हामान अन्त अव, तैखन राज़े तैस पुछ़ू, "ज़ेसेरी अवं इज़्ज़त बडीयाई केरनी चाताईं तैसेरे लेई कुन लोड़ते कियोरू?" हामाने सोचू, कि राज़ो मीं करां जादे केसेरी इज़्ज़त बडीयाई केरनी चातो भोल्हो? 7 हामाने राज़े जुवाब दित्तो, "ज़ैस मैन्हेरी इज़्ज़त बडीयाई राज़ो केरनी चाते, 8 तैसेरे लेई शाही लबास आनो गाए, ज़ै राज़ो लाते, ते राज़ेरो घोड़ो भी, ज़ैस पुड़ राज़ो सुवारी केरते, ते शाही ताज ज़ैन तै दोग्गे पुड़ लाते, तैन भी आनू गाए। 9 फिरी तै लबास, ते तै घोड़ो राज़ेरे कोन्ची बड्डे खास हाकिमे सौंफो गाए, ते ज़ैस मैन्हेरी राज़ो इज़्ज़त बडीयाई केरनी चातो भोए, तैस तै लबास लुवाव गाए, ते तै तैस घोड़े पुड़ सुवार केरतां नगरेरे चौवके मां फिराव गाए; ते तैस अग्री-अग्री ऐह प्रचार कियो गाए, ‘ज़ेसेरी राज़ो इज़्ज़त बडीयाई केरनी चाते, तैस सेइं एन्च़रां सेइं कियूं गालू।’" 10 राज़े हामाने सेइं ज़ोवं, "लूशी केरतां अपने ज़ोनेरे मुताबिक तै लबास ते घोड़े ते तैस यहूदी मोर्दकै सेइं ज़ै मेहलेरे फाटके पुड़ बिशते, तैस सेइं एन्च़रे केर। ज़ैन तीं ज़ोवरूए तैस मां कोई कमी न लोड़े भोवरी।" 11 तैखन हामाने तै शाही लबास ते तै लबास मोर्दकै लुवाव, ते तै घोड़ो एन्हतां तै घोड़े पुड़ च़ाढ़ो, ते नगरेरे चौवके मां एन ज़ोतो च़लाव, "ज़ेसेरी राज़ो इज़्ज़त बडीयाई केरनी चाते, तैस सेइं एन्च़रां सेइं कियूं गाते।"

12 तैखन मोर्दकै त मेहलेरे फाटके मां वापस च़लो जेव पन हामान दुखी ते शरमिन्दो भोइतां ते तुत्तर छ़ुपेइतां अपने घरे जो च़लो जेव।✝ 13 हामाने एपनी कौन्शी जेरेश ते अपने दोस्तन सेइं तैन सब किछ ज़ोवं, ज़ैन किछ तैस सेइं बीतोरू थियूं। तैखन तैसेरे अक्लमन्द दोस्तेईं ते तैसेरी कौन्श जेरेशां ज़ोवं, "मोर्दकै ज़ैस तू घटिया समझ़नो चातस, तै यहूदी केरे खानदाने मरांए, एल्हेरेलेइ तू तैस करां ज़ींती न सकस, बल्के तू एप्पु बुरे तरीके सेइं हारेलो।"

14 तैना तैस सेइं हेजू गल्‍लां केरने लगोरे थिये, त राज़ेरे खोजेईं एइतां, हामान एस्तेरारे धामी मां लूशी कुजेइतां नियो।