1 तैस दिहाड़े क्षयर्ष राज़े यहूदी केरे विरोधी हामानेरी घरबार* एस्तेर रैनी दित्तू। मोर्दकै राज़ेरे सामने अव, किजोकि एस्तेरां राज़े सेइं ज़ोवरू थियूं, कि तैस सेइं तैसारो कुन रिशतोए। 2 तैखन राज़े अपनि मोहरी बाली आंवठी ज़ै तैनी हामाने करां वापस नेवरी थी खोलतां, मोर्दकै दित्ती। एस्तेर रैना मोर्दकै हामानेरे घरबारे अधिकारी बनाव।

3 फिरी एस्तेर रैना होरी फेरे राज़े सेइं ज़ोवं, ते तैसेरे पव्वन पुड़ पेई, ते ऐंखरेईं सेइं लेरां देंती ते छंदे केरतां बिनती केरने लगी, कि अगागी हामानेरी बुराई ज़ै यहूदी लोकां केरे नुक्सानेरी योजना बनेवरी थी, तै बेफल की गाए। 4 तैखन क्षयर्ष राज़े एस्तेर रैनरे पासे सोन्नेरी सोटी रखी। 5 तैखन एस्तेर रानी उठतां राज़ेरे सामने खड़ी भोइ; ते बिनती केरने लगी, "अगर राज़े मन्ज़ूर भोए ते मीं पुड़ खुशी भोए ते ई गल मेरी तैस ठीक लग्गे, ते अवं भी अगर तैस ठीक लगती भोईं, त ज़ैना चिट्ठी अगागी हम्मदातारे मट्ठे हामाने राज़ेरे सेभी सूबन मां यहूदी लोकां केरे नाश केरनेरे लेई भेज़ोरी थी, तैन रद केरनेरे लेई लिखू गाए। 6 किजोकि अवं एपनी कौमी पुड़ एजनेबाली मुसीबत केन्च़रे हेरी बटेली? ते अपने लोकन नाश भोंते केन्च़रे बटेली?" 7 तैखन क्षयर्ष राज़े एस्तेर रैनी सेइं ते मोर्दकै सेइं ज़ोवं, "मीं हामानेरू घरबार त एस्तेर रैनी दित्तोरूए, ते तै फांसी देनेरे खम्भे पुड़ टंगोरोए, एल्हेरेलेइ कि तैनी यहूदी लोकन पुड़ हथ खड़ो कियोरो थियो। 8 ते तुसां एपनी समझ़रे मुताबिक क्षयर्ष राज़ेरे नंव्वे सेइं यहूदी लोकां केरे नंव्वे पुड़ चिट्ठी लिखा, ते राज़ेरी मोहोरी बाली एंवठरी मोहर तैस पुड़ लाथ। किजोकि ज़ै चिट्ठी राज़ेरे नंव्वे सेइं लिखी गाए, तैस पुड़ तैसेरी मोहोरी बाली एंवठरी मोहर लाई गाए, तैस कोई रद न केरि सखे।"

9 तैस मौके मतलब सीवान नंव्वेरे ट्लेइयोवं महीनेरे तरेइयोवं दिहाड़े राज़ेरे लिखनेबाले कुजाए ते ज़ैस-ज़ैस गल्‍लरो हुक्म मोर्दकै तैन दित्तोरो थियो, तै यहूदी केरे ते हाकिम ते भारते करां लेइतां कूशे तगर, ज़ैना 127 सूबे आन, तैन सेभी अधिकारी ते हाकिमन जो हर एक्‍की सूबेरे लफसन मां ते एक्‍की-एक्‍की मुल्खेरे भाषाई मां ते यहूदन तैन केरे भाषाई मां ते लफसन मां चिट्ठी लिखी दित्ती। 10 मोर्दकै क्षयर्ष राज़ेरे नंव्वे सेइं चिट्ठी लिखेइतां, ते तैन पुड़ राज़ेरी मोहोरी बैली एंवठरी मोहर लेइतां तेज़ी सेइं च़लनेबाले शाही घोड़े खचरन पुड़ सुवार भोइतां तैन केरे हथ्थे भेज़ी दित्ती। 11 एन चिट्ठन मां सेभी नगरां केरे यहूदी लोकन जो राज़ेरी तरफां अज़ाज़त दित्ती जेई, कि तैना अकोट्ठे भोन ते अपने-अपने प्राण बच़ानेरे लेई तियार भोन, ज़ैस कौमरे या सूबेरे लोक अन्याये केरतां यहूदी लोकां केरि कौन्शन या बाल बच्‍चन दुख देनो चान, तैन मारा ते नाश केरा, ते तैन केरि धन-दौलत लुटन। 12 ते एन क्षयर्ष राज़ेरे सेभी सूबन मां एक्सां कियूं गाए, मतलब अदार नंव्वेरे बारोवं महीनेरे तेरहोवं दिहाड़े। 13 एस हुक्मेरी लिखोरी नकलां सारे सूबन मां ते सेभी मुल्खां केरे लोकन कांजो खुल्‍ले तोरे पुड़ चिट्ठी भेज़ी दित्ती। ताके यहूदी लोक तैस दिहाड़े अपने दुश्मन सेइं बदलो नेनेरे लेई तियार रान। 14 ते तेज़ घोड़े च़लानेबाले राज़ेरे घोड़न पुड़ सुवार भोइतां, राज़ेरो हुक्म घिन्तां बेड़ी लूशी सेइं च़ले जे, ते तै हुक्म शूशन राज़गढ़े मां दित्तोरो थियो।

15 तैखन मोर्दकै नीले ते सुफेद रंगेरां शाही लिगड़ां लेइतां ते दोग्गे पुड़ ताज लेइतां ते सूक्ष्म सनेरां ते बैंगनी रंगेरो चोगो लेइतां राज़ेरे सामनेरां निस्सो, ते शूशन नगरेरे लोकन मां आनन्देरे मारे ललकारने लगे। 16 ते यहूदी लोकां केरे लेई ऐह बड़ो खुशरो मौको थियो, किजोकि तैन केरि बड़ी इज़्ज़त भोवरी थी। 17 ते ज़ैस-ज़ैस सूबे, ते ज़ैस-ज़ैस नगरे मां क्षयर्ष राज़ेरो हुक्म ते नियम पुज़ोरो थियो, तैड़ी-तैड़ी यहूदी लोकन आनन्द ते खुशी मैल्ही, ते तैनेईं तै दिहाड़ी अक धाम मनेइतां तै दिहाड़ी खुशरी दिहाड़ी मनाई, ते तैस मुल्खेरे लोकन मरां बड़े लोक यहूदी बेनि जे, किजोकि तैन केरे दिले मां यहूदी लोकां केरो डर पैदा भोइ जेवरो थियो।