Aniversário de idoso
O aniversário de um idoso é celebração de uma vida longa e cheia de experiências com Deus. A Bíblia honra os cabelos brancos como coroa de glória e prova da fidelidade divina.
Gumazamiziba osɨmtɨzibar aven ikia Godɨn deima, a men apangkuvigha men akura
Ikiavɨra Itir God a dughiabar zurara en dera,
a zurara en apangkuva ikia mamaghɨra iti.
Kamaghɨn amizɨ, e a mɨnamam!
Ikiavɨra Itir God uabɨ, dughiar aghuir kam e ganɨngi.
Kamaghɨn en naviba deraghtɨ, e bar akuegham.
God bar deragha Devit gamizɨ, an an ziam fe
Kɨ zurara ziar ekiam Ikiavɨra Itir God danɨngam.
Kɨ an ziam fɨ mamaghɨra ikiam.
Ikiavɨra Itir God uabɨ gavgavim isa na ganɨga,
nan oramɨn mɨn ikia na modi.
Ezɨ kɨ nɨghnɨzir gavgavim an iti.
A nan akurvagha na gamima,
kɨ uan navir averiamɨn, a bagha bar akuegha
onger akabagh amua a mɨnabi.
Wit ko wainɨn ovɨziba azenibar aghua bar puvɨra bema, gumaziba da bagha bar akonge.
Ezɨ nɨ na gamizɨ kɨ nɨ bagha bar akongezir arazim, nan navir averiam bar a gizɨvagha,
wit ko wain gifongezir arazim guizbangɨra bar a gafira.
Nɨ uabɨ ikɨrɨmɨrir aghuarim iniamin tuavim nan akagha gɨfa.
Kɨ nɨn damazimɨn ikɨtɨ, nan navir averiam agorogem bar a gizɨvagham.
Kɨ nɨn boroghɨra ikɨ zurara bar akueghvɨra ikiam.
Kɨ bizir vamɨra bagha Ikiavɨra Itir Godɨn azaragha gɨfa.
Bizir kɨ bar ifongezimra kara:
kɨ angamɨra itir dughiamɨn, kɨ an Dɨpenimrama aven ikiam.
Kɨ an ganganir aghuimɨn gan an boroghɨn ikɨ bar akueghasa.
Kɨ an Dɨpenimɨn ikɨ a baghvɨra ikɨva an nɨghnɨzim gɨfofoghsɨ an azangam.
Nɨ deragh en sure damutɨ, e uan ikɨrɨmɨrimɨn dughiam gɨfogham, an otefe.
E fofozir aghuim ikɨva, dughiaba vaghvagh deraghvɨra bizibar amuam.
Gumazamiziba, gumazir ghuribar dapanir arɨzir ghurghuribar gari, me fo, gumazir ghuriba me arazir aghuibar gɨn ghua, dughiar ruarimɨn nguazimɨn iti. Kamaghɨn, me ziar ekiam me ganɨdi.
Gumazir igiaba me gavgaviba iti, ezɨ bizir kam gumazamizibagh amima, me me bagha bar akonge. Ezɨ gumazir ghuriba dapanir arɨzir ghurghuriba iti, ezɨ gumazamiziba bizir kam gɨnɨghnɨgha ziar ekiam me ganɨdi.
Ezɨ gumazamizir nɨghnɨzir gavgavim Ikiavɨra Itir Godɨn ikia, an gavgavim bagha a mɨzua itiba,
a gavgavir igiam me danɨngtɨ, me zurara gavgavighvɨra ikiam.
Me dɨkavigh deraghvɨra mangam, mati kuarazir bagaba overiamɨn mɨghagha arui.
Me ivemar mangɨ, egh avɨghaghan kogham,
me daru mangɨ, egh amɨrvaghan kogham.
Egha Kalep ua kamaghɨn Josua mɨgɨa ghaze, "Nɨ oragh. Israelia gumazamiziba puvatɨzir danganimɨn ikiavɨra itima, Ikiavɨra Itir God bizir kamɨn gun Moses mɨkemezɨ, datɨrɨghɨn 45plan azeniba gɨfa. Ezɨ kɨ datɨrɨghɨn azenir 85plan ikia egha ikiavɨra iti. Fomɨra, Moses ingangarir kam damuasa na amadazir dughiam, kɨ gavgavim iti. Ezɨ gavgavir kam datɨrɨghɨn nan ikiavɨra itima, kɨ mɨsogh bizibar amu daruvɨra ikiam.
" ‘Ikiavɨra Itir God, deraghvɨra ia damuva,
egh deraghvɨra ian ganam.
Ikiavɨra Itir God, ian apangkuv egh,
mati an guamɨn angazangarim ia gisirazɨ moghɨn,
deraghvɨra ian ganam.
Egh Ikiavɨra Itir God, navir aghuim ian ikɨ,
egh navir amɨrizim ko dabirabir aghuim ia danɨngam.’
Nan namakar aghuim, kɨ nɨ bagha God ko mɨgɨa ghaze, nɨn duam deravɨra iti moghɨn, nɨn mɨkarzim bar deravɨra ikɨtɨ, bizir aghuaribara nɨ bativam.