Arca da aliança
A Arca da Aliança era o símbolo mais sagrado de Israel — representava a presença de Deus no meio do seu povo. Sobre ela brilhava a glória do Senhor entre os querubins.
"किक्कर की लाकड़ी का एक सन्दूक बणाया जावै; उसकी लम्बाई ढाई हाथ, अर चौड़ाई अर ऊँचाई डेढ़-डेढ़ हाथ की हो। अर उसनै शुद्ध सोन्ने तै भित्तर अर बाहर तै मढ़वाईये, अर सन्दूक कै उप्पर चौगरदे सोन्ने की बाड़ बणवाईये। अर सोन्ने के च्यार कड़े ढाळ कै उसकै च्यांरु पायां पै, एक ओड़ दो कड़े अर दुसरी ओड़ भी दो कड़े लगवाईये। फेर किक्कर की लाकड़ी के डंडे बणवाईये, अर उननै भी सोन्ने तै मढ़वाईये। अर डंड्यां नै सन्दूक की दोन्नु ओड़ के कड़यां म्ह घालियो, जिसतै उनकै सहारै सन्दूक ठाया जावै। वे डंडे सन्दूक कै कड़यां म्ह लाग्गे रहवै; अर उसतै न्यारे ना करे जावै। अर जो साक्षीपत्र मै तन्नै दियुँगा उसनै उस्से सन्दूक म्ह धरिये।"
"फेर शुद्ध सोन्ने का एक प्रायश्चित का ढकणा बणवाईये; उसकी लम्बाई ढाई हाथ, अर चौड़ाई डेढ़ हाथ की हो। अर सोन्ना ढाळ कै दो करूब बणवाकै प्रायश्चित कै ढक्कण के दोन्नु सिरयां पै लगवाईये। एक करूब तो एक सिरे पै अर दूसरा करूब दुसरे सिरे पै लगवाईये; अर करूबां नै अर प्रायश्चित कै ढक्कण नै उसकै टुकड़े तै बणाकै उसके दोन्नु सिरयां पै लगवाईये। अर उन करूबां कै पंख उप्पर तै इसे फैल्ले होए बणै के प्रायश्चित का ढकणा उनतै ढकया रहवै, अर उनके मुँह आम्ही-स्याम्ही अर प्रायश्चित कै ढक्कण की ओड़ रहवै। अर प्रायश्चित कै ढक्कण नै सन्दूक कै उप्पर लगवाईये; अर जो साक्षीपत्र मै तन्नै दियुँगा उस ताहीं सन्दूक कै भित्तर धरिये।
अर मै उसकै उप्पर रहकै तन्नै मिल्या करुँगा; अर इस्राएलियाँ कै खात्तर जितने हुकम मन्नै तेरे ताहीं देणे होवैंगे, उन सारया कै बारै म्ह मै प्रायश्चित के ढक्कण कै उप्पर तै अर उन करूबां कै बिचाळै म्ह तै, जो साक्षीपत्र कै सन्दूक पै होवैंगे, तेरे तै बातचीत करया करुँगा।"
फेर बसलेल नै किक्कर की लाकड़ी का सन्दूक बणाया; उसकी लम्बाई ढाई हाथ, चौड़ाई डेढ़ हाथ, अर ऊँचाई डेढ़ हाथ की थी।
फेर यहोवा नै मूसा तै कह्या, "पैहल्ड़े महिन्ने कै पैहले दिन नै तू मिलापआळे तम्बू नै खड्या कर दिये। अर उस म्ह साक्षीपत्र के सन्दूक नै धरकै बीच आळे पड़दे की ओट म्ह कर दिये।
अर उसनै साक्षीपत्र ताहीं लेकै सन्दूक म्ह धरया, अर सन्दूक म्ह डण्ड्याँ नै लगाकै उसकै उप्पर प्रायश्चित कै ढक्कण ताहीं धर दिया; अर उसनै सन्दूक ताहीं मिलापआळे तम्बू म्ह पोहचवाया, अर बीच आळे पड़दे नै लटकवा कै साक्षीपत्र कै सन्दूक नै उसकै भित्तर करया; जिस तरियां यहोवा नै मूसा तै हुकम दिया था।
अर जिब मूसा यहोवा तै बात करण नै मिलापआळे तम्बू म्ह गया, फेर उसनै प्रायश्चित कै ढक्कण पै तै, जो साक्षीपत्र कै सन्दूक कै उप्पर था, दोन्नु करूबां कै बीच म्ह तै उसकी आवाज सुणी जो उसतै बात कर रह्या था; अर उसनै (यहोवा) उसतै बात करी।
फेर इस्राएलियाँ नै यहोवा कै पर्वत तै चाल कै तीन दिन का सफर करया; अर उन तीन्नु दिनां कै राह म्ह यहोवा के करार का सन्दूक उनके खात्तर आराम का स्थान टोहन्दा होया उनकै आग्गै-आग्गै चालदा रह्या। अर जिब वे छावणी की जगहां तै चाल्या करै थे फेर दिन भर यहोवा का बाद्दळ उनके उप्पर छाया रहवै था। अर जिब-जिब सन्दूक का चालणा होवै था तब-तब मूसा यो कह्या करै था, "हे यहोवा, उठ, अर तेरे बैरी तित्तर-बितर हो जावैं, अर तेरे बैरी तेरे स्याम्ही तै भाज जावैं।" अर जिब-जिब वो ठैहर ज्या था तब-तब मूसा कह्या करै था, "हे यहोवा, हजारां-हजार इस्राएलियाँ म्ह बोहड़कै आजा।"
फेर यहोवा नै मूसा तै कह्या, "इस्राएलियाँ तै बात करकै उनके पूर्वजां के घरान्यां कै मुताबिक, उनके सारे प्रधानां कै धोरै तै एक-एक छड़ी ले; अर उन छड़ियाँ म्ह तै एक-एक पै एक-एक कै मूल माणस का नाम लिख, अर लेवियाँ की छड़ी पै हारुन का नाम लिख। क्यूँके इस्राएलियाँ के बुजुर्गां कै घरान्यां के एक-एक खास आदमी की एक-एक छड़ी होवैगी। अर उन छड़ियाँ नै मिलापआळे तम्बू म्ह साक्षीपत्र कै स्याम्ही, जड़ै मै थमनै मिल्या करुँ सूं, धरदे। अर जिस माणस नै मै चुणुँगा उसकी छड़ी म्ह कली फूट लिकड़ैगी; अर इस्राएली जो थारै पै बड़बड़ान्दे रहवैं सैं, वो बड़बड़ाणा मै अपणे उप्पर तै दूर करुँगा।" आखर म्ह मूसा नै इस्राएल के माणसां तै या बात कही; अर उनके सारे प्रधानां नै अपणे-अपणे खात्तर, अपणे-अपणे पूर्वजां के घरान्यां कै मुताबिक, एक-एक छड़ी उस ताहीं दी, इस करकै बारहा छड़ी होई; अर उन छड़ियाँ म्ह हारुन की भी छड़ी थी। उन छड़ियाँ ताहीं मूसा नै साक्षीपत्र कै तम्बू म्ह यहोवा कै स्याम्ही धर दिया। दुसरे दिन मूसा साक्षीपत्र के तम्बू म्ह गया; तो के देख्या, के हारुन की छड़ी जो लेवी कै घरान्यां कै खात्तर थी उस म्ह कली फूट लिकड़ी, उस म्ह कली लाग्गी, अर फूल भी फुल्लै, अर पके बदाम भी लाग्गे सैं। फेर मूसा नै उन सारी छड़ियाँ ताहीं यहोवा कै स्याम्ही तै लिकाड़कै सारे इस्राएलियाँ कै धोरै लेग्या; अर उननै अपणी-अपणी छड़ी पिच्छाणकै ले ली। फेर यहोवा नै मूसा तै कह्या, "हारुन की छड़ी ताहीं साक्षीपत्र कै स्याम्ही फेर धरदे, के यो उन रोळा करण आळयां कै खात्तर एक निशान बणकै धरी रहवै, के तू उनका बड़बड़ाणा जो मेरै खिलाफ होंदा रहवै सै भविष्य म्ह रोक सकै, इसा ना हो के वे मर जावैं।" अर मूसा नै यहोवा के इस हुकम कै मुताबिक ए करया।
ज्यांतै जिब प्रजा के माणसां नै अपणे डेरयां तै यरदन नदी पार करण खात्तर चाल्ले, तो याजक करार का सन्दूक ठाए होए प्रजा कै आग्गै-आग्गै चाल्ले, अर सन्दूक के ठाणआळे यरदन नदी पै पोहचे, अर सन्दूक के ठाणआळे याजकां के पैर यरदन के तट के पाणी म्ह पड़े (यरदन नदी का पाणी तो कटणी कै बखत के हर दिन अपणे तट के ऊपर-ऊपर बह्या करदा), फेर जो पाणी उप्पर की और तै बह्या आवै था वो घणा दूर, यानिके आदाम नगर कै धोरै जो सारतान कै लोवै सै रुक कै एक ढेर होग्या, अर दीवार जिसा उठ्या रहया, अर जो पाणी अराबा का ताल, जो मृत सागर भी कुहवावै सै उसकी और बह्या करै था, वो पूरी तरियां तै सूख ग्या; अर प्रजा के माणस यरीहो कै स्याम्ही पार उतरगे। अर याजक यहोवा के करार का सन्दूक ठाए होए यरदन के बीचों बीच पोहचकै सुखी धरती पै मजबूती तै खड़े रहे, अर सारे इस्राएली सुक्खी-सुक्खी ए धरती पार उतरदे रहे आखर म्ह उस सारी जात्ति के लोग यरदन पार होगे।
अर जिब यहोवा के वाचा का सन्दूक ठाणआळे याजक यरदन के बीच म्ह तै लिकड़ आए, अर जिब उनके पैर धरती पै पड़े, जिब ए यरदन का पाणी अपणी जगहां पै आया, अर पैहले की तरियां किनारयाँ कै उप्पर फेर बहण लाग्या।
यरीहो नगर के सारे फाटक इस्राएलियाँ के डर के मारे लगातार बन्द रहे, अर कोए बाहर भित्तर आण-जाण न्ही पावै था। फेर यहोवा नै यहोशू तै कह्या, "सुण, मै यरीहो नै उसके राजा अर शूरवीरां समेत तेरे वश म्ह करुँ सूं। इस करकै थारे म्ह जितने योद्धा सैं नगर नै घेर लें, अर उस नगर के च्यांरु और एक बार घूम आवै। अर छः दिन ताहीं इसाए करया। अर सात याजक सन्दूक के आग्गै-आग्गै मिंढे के सींगां के सात नरसिंगे लिए होए चाल्लै; फेर सातमै दिन थम नगर के च्यांरु और सात बार घुमियो, अर याजक भी नरसिंगे फूँकदे चाल्लै। अर जिब वे मिंढे के सींगां के नरसिंगे देर तक फूँकदे रहवैं, तो सारे माणस नरसिंगे का शब्द सुणदे ए तेज आवाज तै जयजयकार करै; फेर नगर की शहरपनाह नींव तै गिर जावैगी, अर सारे माणस अपणे-अपणे स्याम्ही चढ़ जावैं।" सो नून के बेट्टे यहोशू नै याजकां ताहीं बुलवाकै कह्या, "वाचा के सन्दूक नै ठा ल्यो, अर सात याजक यहोवा के सन्दूक कै आग्गै-आग्गै मिंढे के सींगां के सात नरसिंगे लिए चाल्लै।" फेर उसनै माणसां तै कह्या, "आग्गै बढ़कै नगर के च्यांरु और घूम आओ; अर हथियार-बन्द माणस यहोवा के सन्दूक कै आग्गै-आग्गै चाल्लै।"
फेर माणसां नै जयजयकार करया, अर याजक नरसिंगे फूँकदे रहे। अर जिब माणसां नै नरसिंगे का शब्द सुण्या तो फेर बड़ी तेज आवाज तै उननै जयजयकार करया, फेर शहरपनाह नींव तै गिरगी, अर माणस अपणे-अपणे स्याम्ही तै उस नगर म्ह बढ़गे, अर वो नगर ले लिया।
तब पलिश्तियाँ नै इस्राएल देश के बिरुध्द पाँति बाँधी, अर जिब घमासान युद्ध होण लाग्या फेर इस्राएली पलिश्तियाँ तै हारगे, अर उननै कोए च्यार हजार इस्राएली सेना के माणसां ताहीं मैदान म्ह ए मार गेरया। जिब वे माणस छावणी म्ह लौट आए, फेर इस्राएल के अगुवे माणस कहण लाग्गे, "यहोवा नै आज म्हारे ताहीं पलिश्तियाँ तै क्यूँ हरवा दिया? आओ, हम यहोवा की वाचा का सन्दूक शीलो तै माँग ले आवां, के वो म्हारे बीच म्ह आकै हमनै दुश्मनां के हाथ तै बचावै।" फेर उन माणसां नै शीलो शहर म्ह भेजकै ओड़ै तै करूबां के उप्पर विराजण आळे सेनाओं के यहोवा का वाचा का सन्दूक मँगवा लिया; अर परमेसवर की वाचा के सन्दूक के साथ एली के दोन्नु बेट्टे, होप्नी अर पीनहास भी ओड़ै थे।
जिब यहोवा के वाचा का सन्दूक छावणी म्ह पोहच्या, फेर सारे इस्राएली इतणे बल तै ललकार उठे, के धरती गूँज उठ्ठी। इस ललकार का शब्द सुणकै पलिश्तियाँ नै पूच्छया, "इब्रियाँ की छावणी म्ह इसी बड़ी ललकार का के कारण सै?" फेर उननै जाण लिया, के यहोवा का सन्दूक छावणी म्ह आया सै। फेर पलिश्ती डरकै कहण लाग्गे, "उस छावणी म्ह परमेसवर आ ग्या सै।" फेर उननै कह्या, "हाय! म्हारे पै इसी बात पैहले न्ही होई। हाय! इसे महाप्रतापी देवत्यां के हाथ तै हमनै कौण बचावैगा? ये तो वोए देवता सैं जिसनै मिस्रियाँ पै जंगळ म्ह सारी ढाळ की विपत्ति डाली थी। हे पलिश्तियाँ, थम हिम्मत ना हारो, अर पुरुषार्थ जगाओ, कदे इसा न हो के जिस तरियां इब्री लोग थारे अधीन होगे उसे तरियां थम भी उनके अधीन हो जाओ; पुरुषार्थ करकै युद्ध लड़ो।"
फेर पलिश्ती लड़ाई के मैदान म्ह टूट पड़े, अर इस्राएली हार कै अपणे-अपणे डेरे कान्ही भाजण लाग्गे; अर इसा घमासान संहार होया, के तीस हजार इस्राएली मारे गये। अर परमेसवर का सन्दूक छीन लिया गया; अर एली के दोन्नु बेट्टे, होप्नी अर पीनहास, भी मारे गए।
फेर यहोवा का हाथ अश्दोदियाँ के उप्पर भारी पड्या, अर वो उन ताहीं नाश करण लाग्या; अर उसनै अश्दोद अर उसके आस्सै-पास्सै के माणसां कै गिलटियाँ लिकाड़ी। यो हाल देखकै अश्दोद के माणसां नै कह्या, "इस्राएल के देवता का सन्दूक म्हारे बिचाळै रहणा न्ही चाहिए; क्यूँके उसका हाथ म्हारे पै अर म्हारे देवता दागोन पै भारी पड्या सै।" फेर उननै पलिश्तियाँ के सारे सरदारां ताहीं बुलावा भेज्या, अर उनतै पूच्छया, "हम इस्राएल के देवता के सन्दूक का के करां?" वे बोल्ले, "इस्राएल के देवता का सन्दूक घुमाकै गत नगर म्ह पोहचाया जावै।" आखिर म्ह उननै इस्राएल के परमेसवर के सन्दूक ताहीं घुमाकै गत म्ह पोंहचा दिया। पर जिब वे उस ताहीं घुमाकै ओड़ै पोहचे, तो न्यू होया के यहोवा का हाथ उस गत नगर के बिरुध्द इसा उठ्या के उस म्ह भोत बड़ी हलचल माचगी; अर उसनै छोट्टे तै बड़े ताहीं उस नगर के सारे माणसां ताहीं दंडित करया, अर उनकै गिलटियाँ लिकड़ण लाग्गी। फेर उननै परमेसवर का सन्दूक एक्रोन नगर कान्ही भेज्या अर जिस तरियां ए परमेसवर का सन्दूक एक्रोन म्ह पोहच्या उसे तरियां ए एक्रोनी यो कहकै डर के मारे चिल्लाण लाग्गे, "इस्राएल के देवता का सन्दूक घुमाकै म्हारे धोरै ज्यांतै पोहचाया गया सै, के हमनै अर म्हारे माणसां ताहीं मरवा दे।" फेर उननै पलिश्तियाँ के सारे सरदारां ताहीं कठ्ठा करया, अर उनतै कह्या, "इस्राएल के देवता के सन्दूक नै लिकाड़ द्यो, के वो अपणी जगहां पै लौट जावै, अर म्हारे ताहीं अर म्हारे माणसां नै मार न्ही पावै।" उस सारे नगर म्ह तो मौत के भय की हलचल माच रह्यी थी, अर परमेसवर का हाथ ओड़ै घणा भारी पड्या था।
यहोवा का सन्दूक पलिश्तियाँ के देश म्ह सात महिन्ने ताहीं रह्या। पलिश्तियाँ नै पुजारियाँ अर भावी कहण आळयां ताहीं बुलाकै पूच्छया, "यहोवा के सन्दूक का हम के करां? हमनै बताओ, के कीमत देकै हम उस ताहीं उसकी जगहां पै भेज्जा?" वे बोल्ले, "जै थम इस्राएल के देवता का सन्दूक ओड़ै भेज्जो, तो उसनै न्यूए ना भेजियो; उसकी हानि भरण कै खात्तर जरुर दोषबलि दियो। फेर थम ठीक हो जाओगे, अर थम जान ल्योगे के उसका हाथ थारे पै तै क्यूँ न्ही उठाया गया।"
उन माणसां नै उसाए करया; यानिके दो दुधार गां लेकै उस गाड़ी म्ह जोत्ती, अर उनके बच्चयां ताहीं घर म्ह बन्द कर दिया। अर यहोवा का सन्दूक, अर दूसरा डिब्बा, अर सोन्ने के चूहे अर अपणी गिलटियाँ की मूरतां ताहीं गाड़ी पै धर दिया। फेर गायां नै बेतशेमेश का सीध्धा राह लिया; वे सड़क ए सड़क रम्भादी होई चली गई, अर ना दाहिने मुड़ी अर ना बायें; अर पलिश्तियाँ के सरदार उनकै पाच्छै-पाच्छै बेतशेमेश की सीमा ताहीं गए। अर बेतशेमेश के माणस तराई म्ह गेहूँ काट रह्ये थे; अर जिब उननै आँख ठाकै सन्दूक ताहीं देख्या, फेर उसके देखण तै आनन्दित होए। गाड़ी बेतशेमेशी नगर के यहोशू नाम के एक आदमी के खेत म्ह जाकै ओड़ै ठहर गई, जित्त एक बड़ा पत्थर था फेर उननै गाड़ी की लाकड़ी ताहीं चीरा अर गायां ताहीं होमबलि करकै यहोवा के खात्तर चढ़ाया। अर लेवियाँ नै यहोवा के सन्दूक ताहीं उस डिब्बा के समेत जो गैल था, जिस म्ह सोन्ने की चिज्जां थी, उतार के उस बड़े पत्थर पर राक्ख दिया; अर बेतशेमेश के माणसां नै उसे दिन यहोवा के खात्तर होमबलि अर मेलबलि चढ़ाए।
फेर किर्यत्यारीम के माणसां नै जाकै यहोवा के सन्दूक ताहीं उठाया, अर अबीनादाब के घर म्ह जो टीले पै बण्या था राख्या, अर यहोवा के सन्दूक की रक्षा करण खात्तर अबीनादाब के बेट्टे एलीआजर ताहीं पवित्र ठहराया करया।
किर्यत्यारीम म्ह सन्दूक ताहीं धरे होए घणे दिन होए, यानिके बीस साल बीतगे, अर इस्राएल का सारा घराना बिलाप करदा होया यहोवा के पाच्छै चाल्लण लाग्या।
फेर दाऊद राजा ताहीं यो बताया गया, के यहोवा नै ओबेदेदोम के घराने पै, अर जो कुछ उसका सै, उसपै भी परमेसवर के सन्दूक कै कारण आशीष दी सै। फेर दाऊद नै जाकै परमेसवर के सन्दूक ताहीं ओबेदेदोम के घर तै दाऊदपुर म्ह आनन्द कै गैल पोंहचा दिया। जिब यहोवा का सन्दूक ठाणआळे छः कदम चल लिए, फेर दाऊद नै एक बळध अर एक पाळ्या पोस्या होया बाछड़ा बलि कराया। अर दाऊद सणी का एपोद कमर म्ह कसे होए यहोवा के धोरै तन-मन तै नाचदा रह्या। आखर दाऊद अर इस्राएल का सारा घराना यहोवा कै सन्दूक ताहीं जयजयकार करदे अर नरसिंगा फूँकदे होए ले चल्या।
फेर सुलैमान नै इस्राएली बुजुर्गां ताहीं अर गोत्रां के सारे खास माणसां ताहीं भी जो इस्राएलियाँ के पूर्वजां के घरान्ने के प्रधान थे, यरुशलेम म्ह अपणे धोरै इस इरादे तै कठ्ठे करे, के वे यहोवा के करार का सन्दूक दाऊदपुर यानिके सिय्योन तै उप्पर ले आवैं। आखर म्ह सारे इस्राएली माणस एतानीम नाम के सातवें महिन्ने के त्यौहार के बखत राजा सुलैमान कै धोरै कठ्ठे होए। जिब सारे इस्राएली अगुवे आए, फेर याजकां नै सन्दूक ताहीं ठा लिया। अर यहोवा का सन्दूक, अर मिलापआळे तम्बू, अर जितने पवित्र बरतन उस तम्बू म्ह थे, उन सारया ताहीं याजक अर लेवीय माणस उप्पर लेगे। अर राजा सुलैमान अर सारी इस्राएली मण्डळी, जो उसकै धोरै कठ्ठी होई थी, वे सारे सन्दूक कै स्याम्ही इतणी भेड़ अर बळध बलि करण लागरे थे, जिनकी गिणती किसे तरियां तै न्ही हो सकै थी। फेर याजकां नै यहोवा के वाचा का सन्दूक उसकी जगहां पै यानिके भवन के पवित्रस्थान म्ह, जो परमपवित्र स्थान सै, पोहचाकै करूबां के पंखां कै तळै धर दिया। करूब सन्दूक की जगहां कै उप्पर पंख इसे फैलाए होए थे, के वे उप्पर तै सन्दूक अर उसके डण्ड्याँ ताहीं ढाँप्पे थे। डण्डे तो इतणे लाम्बे थे, के उनके सिरे उस पवित्रस्थान तै जो पवित्रस्थान कै स्याम्ही था दिखाई पड़ै थे पर बाहर तै वे दिखाई न्ही देवैं थे। वे आज कै दिन ताहीं उरैए मौजूद सैं। सन्दूक म्ह किमे न्ही था, उन दो पटियाँ नै छोड़ जो मूसा नै होरेब पहाड़ म्ह उसके भित्तर उस बखत धरी, जिब यहोवा नै इस्राएलियाँ के मिस्र तै लिकड़ण पै उनकै गैल करार करया था। जिब याजक पवित्रस्थान तै लिकड़े, फेर यहोवा के भवन म्ह घणा बाद्दळ छा गया। अर बाद्दळ के काम्मां के कारण याजक सेवा-पाणी करण खात्तर खड़े ना रह सके, क्यूँके यहोवा का तेज यहोवा के भवन म्ह भरग्या था।
"हे भटकण आळे बाळकों, बोहड़ आओ, क्यूँके मै थारा माल्लिक सूं; यहोवा की या वाणी सै। थारे हर एक नगर तै एक, अर हर एक कुल तै दो ताहीं लेकै मै सिय्योन म्ह पोंहचा देऊँगा।"
"मै थमनै अपणे मन कै जिसा पाळी देऊँगा, जो ज्ञान अर बुद्धि तै थमनै चरावैंगे। उन दिनां म्ह जिब थम इस देश म्ह बढ़ो, अर फूल्लो-फळो, तब माणस फेर इसा ना कहवैंगे, यहोवा के करार का सन्दूक; यहोवा की या भी वाणी सै। उसका विचार भी उनकै मन म्ह ना आवैगा, ना माणस उसके ना रहण तै चिन्ता करैंगे; अर ना उसकी मरम्मत होवैगी।
इब, उस पैहल्ड़े करार म्ह भी सेवा के नियम थे, अर इसी पवित्र जगहां थी, जो इस दुनिया की थी। यानी के एक तम्बू बणाया गया जिस म्ह दो कमरे थे, पैहले कमरे म्ह दीवट, मेज अर मेज कै उप्पर भेंट की चढ़ाई होई रोटियाँ थी, अर वा पवित्र जगहां कुह्वावै सै। ओड़ै एक परदा था उस परदे कै पाच्छै दूसरा कमरा था, जो परमपवित्र जगहां कुह्वावै सै। उस दुसरे कमरे म्ह सोन्ने की धूपदानी, अर चौगरदेकै सोन्ने तै मन्ढया होया करार का सन्दूक था, अर उस म्ह मन्ना तै भरया होया सोन्ने का मर्तबान भी था, अर हारुन की छड़ी जिस म्ह फूल फळ आ गये थे, अर करार की पत्थर की पटियाँ भी थी। इसकै अलावा सन्दूक कै उप्पर दोन्नु ओड़ तेजोमय करूब थे, जो प्रायश्चित के ढक्कण जिस ताहीं प्रायश्चित के दिन पापबलि के लहू तै छिड़क दिया जावै था। इनका एक-एक करकै जिक्र करण का इब्बे बखत न्ही सै।
फेर परमेसवर का जो मन्दर सुर्ग म्ह सै वो खोल्या गया, अर उसकै मन्दर म्ह उसका करार का सन्दूक दिख्या, बिजळियाँ, शब्द, गरजण अर भूकम्प होए अर बड़े ओळे पड़े।