Arca da aliança

Lichanduko lya Lilaghano

10 Akaichilahele bhatengenecha lichanduko lya mbau ya nchita, lilibhii na utandamaho gwake ubhaha chentimeta miya jhimo na likome limo na upana gwake chentimita chitine na chita na kukola kwake kubhaha chentimita chitine na chita. 11 Milikilima lichanduko lyenie kwa chaabo jhambone nkate na panja nu kulibhinikila chaabo chehemo jhoha. 12 Peniya militengenechela pete ncheche nu kuwalicha mu makongono ghake, kila lukongono pete jhimo. 13 Ntengenecha nchegha gwa nnchita nu kukilima chaabo. 14 Michegha jhenio mijhingiya mu pete ibhii pande ibhele ya lichanduko, nhwalo gwa kugheghela lyenio Lichanduko. 15 Michegha jhenie iighala momo mu pete, jhangabhoka ng’o mwenio. 16 Nkate jha lichanduko lyenie mmeka ibao ibhele ya maghanga imbakumpe, inyandike mihilo jhango.

17 "Peniya, panane jha lichanduko ntendekeya kiyekelelo cha chaabo jhamaha chikibhii na utandamalo gwake chentimita miya jhimo na likome limo nupana gwake chentimita chitine na chita nuutandamalo gwake chentimita chetine na chita. 18 Helahela nantendekeya ulandano gwa ihumbe ibhele ina mapapanilo kukuyana mukipala, ikemwa makelube, mibheka mujhomokelo gwa kiyekelo kongo na kongo. 19 Kihumbe chimo kukijhomokela kiyekelelo na chenge kukijhomokela. Mibheka ihumbe yenio ilombane mujhomokelo mu kiyekelo, bhabha kilebhe chimo na chenie kiyekelelo chenio kongo na kongo. 20 Ihumbe yenio nailoleyana, mapapanilo ghake ghabhaha anda ghimbuluka na kughubika kiyekelelo, miho ghabhe ghalolekeya kiyekelelo chenie. 21 Nkate jha lichanduko mmeka ibao ibhele ya maghanga nu kubheka kiyekelelo panane jhake.

22 Nenga nangongana na mwenga peniya, nu kubhoka panane jha kiyekelelo chenie panakate jha ihumbe yenio ibhii panane jha lichanduko, nanongela namwenga peniya nu kumpe mihilo jhoha jha kwalobholela Akaichilahele.

Kutendekeya Lichanduko lya Lilaghano

1 Bezaleli ngatendekeya lichanduko lya Lilaghano kwa mbau ya nkongo nchita miya jhimo na likome limo, kutandamala kwake kukibha chetimita chitine na chita na kubhoka pahe ade kunane chetimita chitine na chita.

Lihema li Nyahinyahi litendwa kujhemikwa

1 Bhambo Chapanga ngannobholila Mucha, 2 "Lichiko lyu kutumbula lya mwehe ghukutumbula, milijhemeka Lihema li Nyahinyahi. 3 Nkate jha Lihema lyenio mmeka Lichanduko lya Malaghano lilibhi na mihilo kome na peniya mmeka lipanjiya nnonge jhake.

20 Peniya, Mucha ngatola ibao ibhele ya maghanga na kuibheka mu Lichanduko lya Lilaghano. Na ngaipetecha heke mupete ya lichanduko nu kubheka kiyekelelo panane jha lichanduko lyenie. 21 Bhahe, Mucha ngabheka Lichanduko Lilaghano mu Lihema na kukobheka lipanjiya, kukutenda yenio ngaliibhilikiya Lichanduko li lilaghano ngita chalaghilwa na Bhambo Chapanga.

14 Bhahe, bhando ngabhoka muighono yabhe nukujhenda kujhomboka lukemba lwa Yoludane, akapiya matambiko bhakalitwekii Lichanduko lya Lilaghano na kwalongolela bhando. 15 Kipinde chenio ndi kikibha kipinde cha mahuno na lukemba Yoludane lukibha lutwelii hake, nambo papa tugha bhibhajhegha Lichanduko lya Lilaghano pubhahikita lukemba lwa Yoludane na njajho yabhe pilebhita muupele jha lukemba lwenio, 16 mache gheniya ghighakokwila kuhumii kundumba na ghajhakulundikana pahina na muche gwa Adamo ghubhii pahina na kubomane jhu ku Saletane. Mache gheniya ghighakokwa kujhenda ku mbwane jha lulambo lwa lukemba lwa Yoludane, yane mbwane jha Mwinyo. Bhando bhajhakujhomboka kujhenda pahina na muche gwa ku Yeliko. 17 Kipinde Akaichilahele pibhajhombwika, akapiya matambiko bhibhagheghita Lichanduko lya Lilaghano bhajhakujhema mulukemba chehemo nyomo ade pibhajhomolila kujhomboka bhando bhoha palukemba lwono.

18 Akapiya matambiko bheniya bhubhajheghita Lichanduko lya Lilaghano lya Bhambo Chapanga pibhabhokita pakate jha lukemba lwa Yoludane, na kulebhata pandumba, papa mache ngaghatumbwila kukokwa ngita chighakibha nu kutwelela kabhele.

Akaichilahele bhipukila muche gwa Yeliko

1 Milyango jha kujhingilila ku muche gwa ku Yeliko ngaidinditwa nganganga na kulondwa kupala kuhibhikiliya Akaichilahele bhakoto kujhingila mweno. Akibha jhe mundo jhojhoha jwajhingila hilu kupita. 2 Bhambo Chapanga ngannobholila Yoshuwa, "Ngohe muche gwa ku Yeliko pamonga na munahota nkolongwa gwake na akakomana ngondo bhoha nabhabha mulongoche gwino. 3 Mwenga na bhando bhala bhubhabhii na chilaha, namuuntindila muche gwenio mala jhimo kila lichiko kwa machiko chita. 4 Na akapiya matambiko chaba kongo bhabhii na mapenenga ghabhe gha manyelo gha limbelele lyankambako, nabhalongolela palonge jha Lichanduko lya Lilaghano. Mu lichiko lya chaba namtindila muche gwenio mala chaba na akapiya matambiko bhapeta kujhemba mapenenga. 5 Pibhapa kujhemba mapenenga gheniya kanonowa na papa pumpakujhoha lilobhe lyenio, bhando bhoha nabhachobhela kanonowa na mapamanda gha muche gwenio naghatilukila pahe. Peniya kila mundo nabhaujhingilila muche gwenio kubhoka kila chehemo pabhile."

6 Yene Yoshuwa mwana jwa Nune, ngabhakema akapiya matambiko na kwalobholela, "Ntolangane Lichanduko lya Lilaghano na akapiya matambiko chaba bhatole mapenenga gha manyelo gha lipongo lya limbelele, bhalongolele palonge jha Lichanduko lyenio." 7 Yoshuwa ngabhalobholila bhando, "Nnyendengane nnonge, mutindila muche, na akakomana ngondo bhandina bhina chilaha bhajhenda nnongi jha Lichanduko lya Lilaghano lya Bhambo Chapanga."

20 Yene akapiya matambiko bhakahona mapenenga. Bhando pibhajhohina lilobhe likolongwa lya mapenenga ngabhachobhila kanonowa na mapamanda gha muche ngaghatilukina. Papa bhando ngabhaujhingilila muche gweno kila jhumo kwahumile ngaupukila.

2 Akafilichite ngabhajhingilila Akaichilahele, ngondo piikondita Akaichilahele ngabhalepelila ngondo. Yene akakomana ngondo ngita elufo ncheche bha Akaichilahele ngabhakomitwa mulubhanja lwa ngondo. 3 Akakomana ngondo bhibhahighilike pibhakelehwika kukighono chabhe, ighogholo yuku Ichilahele ngabhakonyina bhene chika, "Bho, kunhwalo ghane Bhambo Chapanga abhalekite Akafilichite bhatuhotole? Tijhangana takatole Lichanduko lya Lilaghano lya Bhambo Chapanga ku Shilo, kupala Bhambo Chapanga abhehe pamonga na twenga, atukombola kubhoka kwa akamakoko bhito." 4 Yene, ngabhatumita bhando kujhenda ku Shilo, na bheniya ngabhaliletita Lichanduko lya Lilaghano lya Bhambo Chapanga, Chapanga jhuna makakala ghoha, jwaitama panane jha ihumbe ina mapapanilo iikemwa Makelube. Yana inalome ya mpiya litambiko Ele yane Hofini na Finehache, ndi bhibhahikita na Lichanduko lya Lilaghano lya Bhambo Chapanga.

5 Kipinde Lichanduko lya Lilaghano lya Bhambo Chapanga pilihikichwa kukighono, Akaichilahele ngabhachobhila kukuhangana, na kilambo choha ngakinyukwinyika. 6 Akafilichite pubhajhoina njobhelo yenio yukuhangana ngabhakonya, "Bho, njobhelo yenio yoha kukighono cha Akaebulaniya kipitii nike?"

Pibhamanyita kubhehe lichanduko lya Lilaghano lya Bhambo Chapanga lihikichwe mukighono cha Akaichilahele, 7 ngabhajhogwipa hake Akafilichite, ngabhalongila, "Pange ichapanga jhabhe ijhingii mukighono chabhe. Natulola choto, kilebhe ngita chenje kinawahi jhe kupitila. 8 Natulola choto! Bho, meneke jwahoto kutughombola na ichapanga jhenje ina makakala? Yenio ndi ichapanga ijhakomita Akamichile kwa mabulo ghangalandana, kwenio kunjenga. 9 Ngohe, ma Akafilichite mangajhoghopa jhe. Mmaa, nganganga kupala mangabhe jhe akabhanda bha Akaebulaniya ngita bheniya chibhakibha akabhanda kwa twenga. Mma nganganga mukakomane nabho."

10 Bhahe, Akafilichite ngabhakomina ngondo na Akaichilahele, na Akaichilahele ngabhalepelila, na kila mundo ngatilila mukighono chake. Na akakomana ngondo elufo chelachine bhuku Ichilahele bhibhatyanga kwa magholo, ngabhakomitwa lichiko lyenio. 11 Lichanduko lya Lilaghano lya Bhambo Chapanga ngalipukilwa kwa makakala na Akafilichite, na helehela yana inalome ya mpiya litambiko Ele, Hofini na Fineache, ngabhakomitwa.

6 Bhambo Chapanga ngabhachwapwila hake bhando bhuku Ashidodi na bhando bha pahina jhabhe, ku kwalete ulwalo gwa mapute. 7 Bhando bhuku Ashidodi pighaweine ilebhe yenio, ngabhalongila, "Bhambo Chapanga jwa Akaichilahele atuchwapuu hake twenga pamonga na Chapanga gwito Dagoni. Ngohe, Lichanduko lya Lilaghano lya Bhambo Chapanga lihoto jhe kutama kwito." 8 Bhahe, ngabhakemita ilongoche bhoha bha Akafilichite na kwakonya, "Bho, natutenda bho na Lichanduko lende lya Chapanga jwa Akaichilahele?"

Bheniya ngabhajhangwila, "Lichanduko lyenio lya Chapanga jwa Akaichilahele milipeleka ku Gati." Bhahe, na bheniya ngabhalipeleka ku muche gwa ku Gati.

9 Nambo pibhalihamichila lichanduko lyenio ku Gati, Bhambo Chapanga ngauchwapwila muche gwenio, ngabhatweliya kiholo, na ngabhachwapwila akanalome bha muche gwenio, ingombo kwa ighogholo, ku kwalete mapute. 10 Bhahe, ngabhalipelika Lichanduko lyenio lya Bhambo Chapanga ku muche gwa Ekiloni. Nambo Lichanduko lyenio pilihikita kwenio, bhando bha muche gwenio, ngabhalelita kanonowa kukulonge, "Bhatuletii Lichanduko lya Bhambo Chapanga jwa Akaichilahele, kupala kutukoma twenga na bhando bhito." 11 Peniya, ngabhakemita kabhele ilongoche ya Akafilichite nukulonge, "Milibhujhiche Lichanduko lya Bhambo Chapanga jwa Akaichilahele kwatoila, kupala likoto kutukoma twenga pamonga na bhando bhito." Bhalongila yene ku nhwalo pakibha na kiholo kikolongwa pa muche gwoha, nhwalo Bhambo Chapanga abhachwapwila hake.

Lichanduko lya lilaghano libhujhichwa

1 Bhahe, Lichanduko lya Bhambo Chapanga pulikibha litamite mu kilambo cha Akafilichite kwa myehe chaba, 2 Akafilichite ngabhakemita akapiya matambiko bha Dagoni na bhibhalondola na kwakonya, "Bho, natutenda bhole na Lichanduko lende lya Bhambo Chapanga? Tulobholela, natubhujhicha bhole kola kulikibha?"

3 Bheniya ngabhajhangwila, "Anda mibhujhicha Lichanduko lya Chapanga jwa Ichilahele mangabhujhicha jhe changa kilebhe. Nambo mmujhicha na litambiko lya kupepulila malemwa, na mangota nanama mpepula malemwa gwino. Na mangota nambangatuka kilebhe chikintei nchwapulilwe changa kotoka."

10 Ngabhateila ngita chibhalaghilwa, ngabhatoila ng’ombi ibhele ijhongecha nu kwakonga mu mutuka jhenio jhukuhutwa, na matohe ghabhe ngabhadindila mukibhajha. 11 Ngabhalibhekita Lichanduko lya Bhambo Chapanga lela mu mutuka jhenio pamonga na kichanduko cha inyagho hela ya chaabo ya makule na hela ya mapute. 12 Peniya, ng’ombi yenio ngaijhahwila chomola ku muche gwa Bete shemeshi changa lyangatika lubhoko lwa ngejha hilu lwalelo, ipetita kumeta ndela jhoha. Ilongoche ya Akafilichite ngabhakengima unyuma ng’ombi yenio ade kumpaka gwa ku Bete shemeshi.

13 Bhando bhuku Bete shemeshi bhakibha bhahunita ngano yabhe mu lulambo. Pibhajhinwila miho ghabhe ngabhalibhona Lichanduko lya Bhambo Chapanga, ngabhahangina hake. 14 Mutuka jhenio jhihutwa na ng’ombi ngaijhawila ade kunng’onda gwa Yochuwa, nkola muche jwa ku Bete shemeshi, ngalijhemita papa, pahina na lighanga likolongwa. Bhando ngabhaihangabhina mutuka yenio, na mbau yake ngabhatumila kuikomelekela ng’ombi yenio ngita litambiko lya kukomelekelwa kwa Bhambo Chapanga. 15 Akalabhe ngabhalihulwiya lichanduko lya Bhambo Chapanga, pamonga na lela lichanduko lya inyagho ya chaabo nukwibheka ilebhe yenio pa lighanga likolongwa. Lichiko lyenio bhando bhuku Bete shemeshi ngabhapiya matambiko ghu kukomelekelwa mbwe, nu matambiko ghange.

1 Peniya, bhando bhuku Kiliate yealimo ngabhajhahwila nukutola Lichanduko lya Bhambo Chapanga. Ngabhalipelika ku nyumba jha Abinadabo, jwatamita pa kitombe. Ngabhammekita kwa lihengo lya Bhambo Chapanga, mwana mundo Eleazali, kulijhemelela lichanduko lya Bhambo Chapanga.

Chamwele ilongocha ku Ichilahele

2 Lichanduko lya Bhambo Chapanga, ngalihighilika ku Kiliate yealimo kwa machiko twee, ngita makome mabhele gha yaka. Kipinde choha Akaichilahele bhannelila Bhambo Chapanga abhatangatile.

Lichanduko lya Lilaghano liletwa ku Nyumba jha Bhambo Chapanga

1 Peniya, munahota nkolongwa Chelemane ngabhakema akanahota pamonga na ilongoche ya makabila na ilongoche ya ngolo yoha yaka Ichilahele bhakongane ku Yeluchalemo, kupala kulitola Lichanduko lya Lilaghano kubhoke ku Siyone yane muche gwa Daude. 2 Bhando bhoha ngabhakonganika nnonge jha munahota nkolongwa Chelemane, kipinde cha unyagho, mu mwehe gwa Etanimo yane mwehe gwa chaba. 3 Kipinde akanahota bheniya pibhakonganika kwenio, akapiya matambiko ngabhalighegha lichanduko lyenio lya Lilaghano, 4 Akalabhe na akapiya matambiko ngabhahamicha Lichanduko lya Lilaghano na Lihema lya Nyahinyahi na yombo yoha ya nyahinyahi ikibha mwenio mu lihema. 5 Munahota nkolongwa Chelemane pamonga na bhando bhoha bhuku Ichilahele ngabhakongana nnonge jha Lichanduko lya Lilaghano na ngabhapiita matambiko gha mambelele na ng’ombi twe yangabhalangika. 6 Peniya, akapiya matambiko ngibhilijhingiya Lichanduko lyenie chehemo jha chumbe cha nkate cha Nyahinyahi Hake, pahe jha mapapanilo gha ihumbe ikemwa makelube. 7 Makelube gheniya ngaghajhinwila mapapanilo ghake panane jha lichanduko ku yene lichanduko pamonga na michegha jhake jhikibha pahe jha mapapanilo. 8 Michegha jhenio jhikibha mitandamaho hake pu udamo ghukemwa Chehemo jha Nyahinyahi, nnonge jha chumbe cha nkate pipakemwa Chehemo jha Nyahinyahi, nambo ibhonikina jhe ade panja. Michegha jhenio ibhii koko kwenio ade ngohe. 9 Kikibha jhe kilebhe chenge nkate jhi Lichanduko lya Lilaghano nambo ibau ya maghanga ndo yabheka Mucha kwenio ku Holebo, peniya Bhambo Chapanga pabheka Lilaghano na aka Ichilahele pibhakibha bhabhoka ku Michile.

10 Peniya, akapiya matambiko ngibhapitita Chehemo jhela jha Nyahinyahi, lihunde ngilitanda nu kuyekelela nyumba jhu kunnyinamila Bhambo Chapanga, 11 akapiya matambiko ngibhalepilila kuhenga mahengo ghabhe ghi upiya litambiko nhwalo gwa kung’ala kwa Bhambo Chapanga kukukibha mu nyumba jhake.

Kujhinamii Chapanga pannema na kujhinamii kunane

1 Lilaghano lililongalile likibha na ndela jhake jha kunnyinamii Chapanga na hele chehemo jhake jha nyahinyahi pannema. 2 Bhakalenganikiye lihema lya Chapanga na chumbi chake chikilongolile kikemitwe Mahale Panyahinyahi. Mwenio mukibha na kinala chukubheke kolobohi, kachangwale na mabumunda ghighapihitwa palonge jha Chapanga. 3 kuyeto jha lipanjiya lyuubhele, kukibha na chumbi chikikemitwa Panyahinyahi Hake. 4 Mwenio mukibha na kachangwale kanyahinyahi ka chaabo ka kututukiya ubane, na Lichanduko lya Lilaghano, likibha likilimwe lyoha na chaabo, na nkate jhake mukibha na kibhegha cha chaabo chichikibha na chakulya chikikemitwa mana, nkongocho gwa Halune ukibha lutundwila mahamba, na majhola mabhele ghajhandikwe lilaghalikilo. 5 Panane jha Lichanduko lyenio kukibha na ihumbi ibhele ibhii na mapapanilo ikemitwa makelube, makelube ndi ihumbi ibhii na ukolo gwa Chapanga, na mapapanilo ghabhe ghakayekelii chehemo jha kulekekewa uhakaho gwa bhando. Nambo ngohe tuhotojhe kulonge hotuhotu malobhe gha ilebhe henge.

19 Peniya, Nyumba jha Chapanga jha kunane idindulilwe na Lichanduko lya Lilaghano lyake likabhonikine nkate jhake. Ngalupitila lumule lwa mbamba na nnindimilo na mbamba na kulendemela kwa hula ngolongwa jha maghanga.