1 Lichiko lya kutumbula lya mwehe gwa utato Akaichilahele kuhumi pibhabhokita mu kilambo chuku Michile, ngabhahikita kunjenga jha Chinae. 2 Pubhabhokita ku Lefidimu kuhika kunjenga ku Chinae, ngabhabheka kighono palonge jha kitombe Chinae. 3 Bhahe, Mucha ngakwelita kukongana na kukilegheleghe cha kitombe cha Chapanga.

Kwenio Bhambo Chapanga ngakemita Mucha kuhumi ku kitombe chela ngannobholila, "Naha ndi namalobholela ibheluko ya Yakobu, bhena Akaichilahele."

4 Mabhene nnolite chinatendila Akamichile, nikankwapwii mangota ngita kingocho chikighegha yana yake kwa mapapanilo ghake, nganinnetita kwa nenga. 5 Ngohe anda nnyokanikiye lilobhe lyango na kulikamu lilaghano lyango, namma mabhando bhango bhukuhaghulilwa kupeta ilambo yoha, nhwalo nnema ghoha ndi gwango. 6 Mangota namma kwango unahota nkolongwa na upiya litambiko na kilambo cha nyahinyahi. Malobhe ghanga ndi mipalwa kwalobholela Akaichilahele. 7 Bhahe, Mucha ngahelila, nakwakema ighogholo bha Akaichilahele na kwalobholela malobhe ghoha ghalaghilwa na Bhambo Chapanga. 8 Bhando bhoha ngabhajhangwila kwa pamonga, "Natutenda kila kilebhe chalongile Bhambo Chapanga." Peniya, Mucha ngannobholila Bhambo Chapanga malobhe ghanga.

9 Bhambo Chapanga ngannobholila Mucha, "Nahika kwino mu lihunde tyoo, kupala bhando bhajhoha pinilonge na mwenga, na Akaichilahele bhahoto kunnyokanikiya na kunhobholela machiko ghoha."

Peniya Mucha ngannobholila Bhambo Chapanga ghibhalongila bhando.

10 Yene, Bhambo Chapanga ngannobholila Mucha, "Nnyenda kwa bhando ubhalobholelele bhakijhelebhule deleno na kilabho. Mwalobholela bhapula ngobho yabhe, 11 pamalabho bhakilenganikiya, nhwalo lichiko lyene ndi Bhambo Chapanga nahuluka kuhuma kitombe chaku Chinae na bhando bhoha nabhammona. 12 Kabhele mwabhekela bhando lulembo kutindii kitombe. Namalakalila bhakotoka kukwela kunane ku kitombe, hilu kupapaha muupele jha kitombe. Mundo jhojhoha jwapakupapaha kitombe chakaka nakomwa. 13 Mundo jhojhoha akoto kumpapaha mundo jweno, jweno nakomwa kwa maghanga amu mahonga abhaha mundo amu kinyama nalama jhe. Kipinde lipenenga palipakulela changapomolela, bhando bhoha nabhaheghelela pikitombe."

14 Bhahe, Mucha ngahelila na kwajhendela bhando, bhakijhelebhule, na bhene ngabhapulita ngobho yabhe. 15 Peniya, ngabhalobholila bhando bhoha, "Pamalabho mikilenganikiya na munalome jhojhoha angagholoka jhe na mwikeghe."

16 Bhahe, pamalabho lukela nakupitila nakumetameta na nnindimilo na mbamba na lihunde tyoo kunane ku kitombe. Helahela ngaijhokanikika lilobhe likolongwa lya lipenenga, lyene ngalyalendemecha kila mundo jwabhi pikighono. 17 Peniya, Mucha ngabhalongwiya bhando kuhumii ku kighono, ngabhajhawila kukongana na Chapanga, na bhene ngabhajhema muupele jha kitombe. 18 Kitombe ngakiyekelilwa na lyohe nhwalo gwa Chapanga ahuluka panane jhake mu mwotu. Lyohe lya mwotu gwenio ngaluukilila kunane ngita lyohe lilipita mulitanule likolongwa na kitombe choha ngakilendima hake, 19 lilobhe lya lipenenga ngalichochita hake, peniya Mucha ngalongila na Chapanga. Chapanga ngajhangwila kwa mbamba. 20 Bhambo Chapanga ngahulwike kukilegheleghe cha kitombe chenie, ngakemita Mucha ajhende kukitombe, Mucha ngakwelita kukitombe. 21 Peniya, Bhambo Chapanga ngannobholila Mucha, "Nhelela makahibhilikiye bhando bhangahomba jhe lulembo kumbala kummona, anda nahi jhe bhamahena, nabhawa. 22 Ata akapiya matambiko bhibhamandikila bhipalwa bhakijhelebhuha hote. Anda nahi jhe nenga Bhambo Chapanga chinimbula."

23 Mucha ngannobholila Bhambo Chapanga, "Bhando bhamba bhihoto ng'o kukwela kitombe Chinae, nhwalo mabhene ngamutulobholela kubhehe makatubhekii mupaka kutindii kitombe na kutubheka kutale ngita chehemo nyahinyahi."

24 Bhambo Chapanga ngannobholila Mucha, "Nhelele makantole Alune uhike nako. Nambo mahibhiliila akapiya matambiko na bhando bhange kuhika kongo, anda nahi jhe chinimbula." 25 Bhahe, Mucha ngahelila na kwalobholela Akaichilahele ilebhe yalaghilwa na Bhambo Chapanga.