1 Peniya pakibha na munalome jwa likabila lya Lawe na jwenio ngantole mwikeghe jhumo jwa likabila lya Lawe, 2 na mwikeghe jwenio ngapatita ndumbo na kupapa mwana munalome. Palola kubhehe king'enya jhuna kuhalala, yene ngakiita nkate kwa miyehe mitato. 3 Nambo pamanyita anhoto ng'o kunhiya kabhele, bhahe, ngatenganicha kitandabhala kamatete, ngakilima lange jha lame. Mwenio ngakibheka king'enya chela na kukinhiya na mu matete muupele jha lukemba Naile. 4 Nnombo jwa mwana jhonio ngajhobha pahina na lukemba lweno kupala kulola chikipa kumpitii mwana jhono.

5 Yene, kamwale jwa Falao ngahelela ku lukemba kujhogha na akatumiche bhake, ngabhatyanga tyanga muupele mu lukemba. Kamwale jwa Falao ngakibhona kitandabhala chela panakate jha matete, ajhakuntuma ntumiche gwake akakitole. 6 Payekwila, ngamwena mwana king'enya chela kilela, ngammonila kiya, ngalongila, "Chenje ndi king'enya pakate jha Akaebulaniya."

7 Papa ngapitila nnombo jwa mwana jhola, ngannobholela kamwale jhola, "Bho, nyende nikampalaye yaya jwakunnela mwana jhonjo pakate jha akakeghe bha Akaebulaniya?"

8 Kamwale jwa Falao nganyangwila, "Hena kanetela." Peniya nchikana jhola ngajhawila nganetita majhe jwa mwana. 9 Yene, kamwale gwa Falao ngannobholela majhe jhola, "Munnele mwana jhone, nenga nanipela malepo ghino." Yene, majhe jhola ngantoila mwana na kunnela. 10 Mwana pakolita, majhe mundo ajhakumpeleka kwa kamwale gwa Falao, na jwene ngantoila na kuntenda mwana mundo. Ankemita liina lya Mucha, ngalongila "Ninhohwi umache."

11 Lichiko limo Mucha pabhila kangombo, ngajhenda kwatyangii Akaebulaniya ajhake kupala amanye mang'ahe ghabhe. Peniya ngammona mu Michile jhumo ibula Mwibulaniya, pakate jha akalongo mundo Mucha. 12 Mucha ngalola oko na oko, akabhwe jhe mundo, bhahe ngakomita Mmichile jhola na kunhwininka muncheke. 13 Lichiko lilikengema, Mucha ngabhokita kabhele, na ngabhona Akaebulaniya chika bhibulana. Yene Mucha ngakonyita jhola jwa lemwite, "Kilebhe ghane chamibuli nnyino?"

14 Na jwene ngajhangwila, "Ghane jwamekite kubhehe mwatemula pakate jhito? Bho, mipala kungoma ngita chamunkomita Mmichile jhola? Peniya Mucha ngajhogwipa hake na kuhole kubhehe, lijambu lyandei limanyikine!" 15 Falao pajhohina kilebhe chene, ngapala kunkoma Mucha. Nambo Mucha ngantilila kukilambo chuku Mediane.

Lichiko limo Mucha ngatamita pahina jha kilibha. 16 Bhahe, akachikabhale chaba bha Yetulo mpiya litambiko jwa ku Mediane, ngabhajhenda kuteka mache gha kuinkenga mbuhe na mambelele gha tate gwabhe.

17 Akalucha bhange bhajhakuhika na kwabhenga akachikabhale bhena. Nambo Mucha ngajhema na kwatangatii kuikenga inyama jhabhe. 18 Ngabhujhita ukajha kwa tate gwabhe, Yetulo ngabhakonyita, "Mboni nnyombotike kubhujha?"

19 Na bhene ngabhanyangwila, "Mmichile jhumo atughombwi mumabhoko gha akalucha. Jwene ndi jwatekita mache na kuinkenga inyama hito."

20 Tate gwabhe ajhakwakonya, "Munnekite ko? Nhwalo gwa nike nhikite nako jhe? Nnyendengane, munkeme ahike alyeghe."

21 Mucha ngajheketela kutama kwa mundo jhono. Peniya mundo jwenio ngampeila Mucha kamwale gwake jwakemitwa Chipola abhehe nhwana mundo. 22 Chipola ngabhila na ndumbo, ngapapa mwana munalome. Mucha ngankemita Gelichomu, ngalongila, "Mutukile mu kilambo chakighene."

23 Puipetita yaka yamahele, munahota nkolongwa jwa ku Michile ngajhomwika. Akaichilahele ngabhajhendelila kulela na kukokoleka kwa nhwalo gwa ubhanda na kulela kwabhe Chapanga ngajhoha. 24 Chapanga ngajhohina kukokoleka kweno, na jwene ngakombwika lilaghano lyateila kwa Ulahimo na kwa Ichaka na kwa Yakobu. 25 Kwa yene, Chapanga ngabhalolokeya Akaichilahele chibhalaghita na ngabhabhone kiya.