1 Akaichilahele ngabhabhoka ku Elimu, ngabhahika kunjenga jha Chini lyalibhi panakate jha Elimu na Chinae, lyene lyakibha lichiko lya kome nu nhwano mwehe gwa ubhele kubhoke lichiko lyabhabhokita ku kilambo chuku Michile. 2 Bhahe, Akaichilahele bhoha ngabhankokelekela Mucha na Alune kwenio kunjenga. 3 Ngabhalongila, "Mbaha Bhambo Chapanga ngatukomele ku kilambo chuku Michile kutukibha tutama, ngatulya nyama na mabumunda nu kujhukuta. Nambo mangota mutuletite twe twabhoha kunjenga kone kutukoma kwa njala!"

4 Peniya, Bhambo Chapanga ngannobholila Mucha, "Nyokanikiya, nenga naponekeya mabumunda ngita hula kuhumi kunane kumahunde. Kila lichiko bhando nabhabhoka na kulokota chakulye cha lichiko limo. Kwa ndela jhenie mbakwalola anda nabhakengema lilaghakilo lyango amu jhe. 5 Nambo lichiko lya chita bhalokota chakulye cha machiko mabhele nu kuteleka."

6 Peniya, Mucha na Alune ngabhalobholila Akaichilahele bhoha, "Kimiye cheno, ndi namanya kubhe Bhambo Chapanga ndi jwammohita ku Michile. 7 Kabhele kilabho lukela namuubhona ung'alicho gwa Bhambo Chapanga ajhohine makokoleko ghino ghamikokoleka. Twe ndi ghane ade mutukokolekele?" 8 Mucha ngajhendelila kulonge, "Kimiye, Bhambo Chapanga nampela nyama na lukela nampela mabumunda nnyeghe nnyukute, nhwalo jwene ajhohine makokoleko ghimikokolekela. Twe meneke ade mitukokolekele? Nkoto kutukokoleke twenga mukokelekela Chapanga."

9 Peniya Mucha ngannobholila Alune, "Malobholele Akaichilahele bhoha bhakonganike pamonga palonge jha Bhambo Chapanga nhwalo ajhohine chibhikokoleka."

10 Kipinde Alune palongila na Akaichilahele, bhando bhoha ngabhalola kwenio kunjenga, papa ung'alicho gwa Bhambo Chapanga ngaubhonikina kunane kumahunde.

11 Bhambo Chapanga ngannobholila Mucha, 12 "Nighajhohine makokoleko gha Akaichilahele. Bhahe, malobholela kimiye nabhalya nyama, na lukela nabhalya mabumunda ghibhapala. Peniya namanya kubhehe ne ndi Bhambo Chapanga gwino."

13 Bhahe, paihikita kimiye malongo gha ngwale ngaghahika, ngaiyekelila ighono ya Akaichilahele. Lukela mangame ngaghapitila nghatindila kighono chabhe choha. 14 Mangame gheniya pighakupwika, pahe kunjenga ngaihighilika ilebhe inying'inyaho na majhojhoho. 15 Akaichilahele pibhalolita kilebhe chenie ngabhakangicha nu kukonyana, "Chenje ndi kilebhe ghane?" Bhakamanyii jhe chene ndi nike.

Bhahe, Mucha ngabhalobholila, "Lende ndi libumunda lyampekii Bhambo Chapanga nlyeghe."

16 Bhambo Chapanga alaghalikii naha, kila mundo alokota chikikwela kulyegha, nalokota ibaba ibhele kila mundo kwa nhwalo ya yana mundo.

17 Akaichilahele ngabhateila yene, bhange ngabhalokwita twe na bhange yapengwa. 18 Nambo bhoha pubhapemita chibhalokwita, ngabhamanya kubhehe kila jwalokwita twe akibha tela na jwalokwita yapengwa, kila jhumo akalokwite chikinkwela kulyegha.

19 Mucha ngabhalobholila bhando, "Mundo jhojhoha angahighaya jhe chochoha ade lukela."

20 Nambo bhando bhange bhakannyokanikii jhe Mucha, bhange ngabhakihighakiya ade lukela. Nambo lukela ngakibhokina kihundite nu kubhoha mbeko. Mucha ngabhayomela hake. 21 Bhahe, lukela kila mundo ngalokwita chikinkwela kulyegha. Lyobha palibhalita ngilii chakulya chikihighala ngakimung'unyuka.

22 Lichiko lya chita, Akaichilahele ngabhalokwita chakulya pabhele kwa chela chibhalobholilwa, kila mundo ibaba incheche. Na ighogholo ya Akaichilahele ngabhanyendela Mucha, na kunnobholela kilebhe chene. 23 Mucha ngabhalobholila, "Ghongo ndi nhwilo gwa Bhambo Chapanga. Kilabho ndi Lichiko lya Kupomolela lya nyahinyahi lya Bhambo Chapanga. Yene makatutu amu kujhocha chakulya cha deleno na chikihighala mmeka nnyangana kilabho." 24 Bhahe, ngabhatenda yene ngabhahighiya chenge ade kilabho ngita chalaghila Mucha. Lukela bhaikolii jhe mbeko hilu kununga. 25 Peniya Mucha ngabhalobholila "Nnyengane chikihighilike nhwalo deleno ndi Lichiko lya Kupomolela lya Bhambo Chapanga. Dele nampata jhe chakulyegha panja jha kighono. 26 Kwa machiko chita nannokota chakulya chenie, nambo lichiko lya chaba, yane Lichiko lya Kupomolela, nakubhehe jhe na chochoha."

27 Lichiko lya chaba bhange bhakajhahwi kupalaha chakulyegha, nambo kibhii jhe chabhajhambuli. 28 Peniya, Bhambo Chapanga ngannobholila Mucha, "Ngohe nankana, ade ligha kujhokaniki nhwilo na malaghalikilo ghango? 29 Nkomboka nenga ndi Bhambo Chapanga jwanimpekii Lichiko lya Kupomolela, ndi nhwalo mu lichiko lya chita nimpekii mabumunda gha machiko mabhele. Kila mundo ahighilika pakajhake mulichiko lyene lya chaba na apalwa jhe kubhoka pakajhabhe." 30 Yene, lichiko lya chaba bhando bhakahengite jhe lihengo.

31 Akaichilahele ngabhakema mabumunda gheniya "Mana." Yakibha mijhebhejhaho ngita mbejho ya mapemba mahuo mbu na kunogha kwake ngita libumunda lijhebhejhaho lililenganikilwe kwa bhuche. 32 Mucha ngalongila, "Lende ndi lilaghalikilo lya Bhambo Chapanga, ntola kibaba chimo cha mana kibhekwa ku nhwalo gwa kibhelukwa chikipakuhika, kupala bhaghabhona mabumunda ghinimpila kunjenga kipinde chinimmohita ku kilambo chuku Michile." 33 Mucha ngannobholila Alune, "Ntola ligudiliya na nnekela kibaba chimo ya mana na kuibheka palonge jha Bhambo Chapanga, ibhekwa kwa nhwalo gwa ibheluko hito ihika." 34 Ngita Bhambo Chapanga channaghila Mucha, ndi Alune pahikita na kubheka mu Lichanduko lya Lilaghano. 35 Akaichilahele ngabhalila mana kwa yaka makome ncheche, ade pabhahikita mupakane mwa Kaanane mu kilambo chibhatama bhando. 36 Chakulya cha mana kipemo cha ibaba nane, kikibha kipemo chikilengana na kipemo chikiyobhakile cha Efa.