1 Mucha ngabhakonganicha Akaichilahele bhoha, na ngabhalobholila, "Henge ndi ilebhe Bhambo Chapanga yanaghalikiye kuhenga. 2 Nhenga mahengo ghino kwa machiko chita, nambo lichiko lya chaba libhaha Lichiko lya Kupomolela, lyenio libhekwitwe na Bhambo Chapanga. Mundo jhojhoha jwahenga lihengo lichiko lyenio nakomwa. 3 Mangakungana jhe ata mwotu munyumba hino Lichiko li Kupomolela."

4 Mucha ngabhalobholila bhando bhoha bhuku Ichilahele, "Chenje ndi kilebhe chanaghalikiye Bhambo Chapanga mukihenga. 5 Mpiya matambiko kubhoke mu ilebhe ino kwa kumpe Bhambo Chapanga. Kila mundo jwakwete mwojho gwaumbone apiya nchango gwa matambiko kwa Bhambo Chapanga, chaabo na madine gha feza na shaba, 6 luche lwa kibuluu na chambalau na ngele, ngobho nhuo ina kuhalala na ngobho ilokitwe kwa mangoma gha mbuhe, 7 na mambendela gha mambelele gha lipongo ghighakilimwe lange ngele na mambendela gha kinyama chamumache, na mbau ya nchita, 8 na mahuta gha mcheitune kwa nhwalo gwa mule, na ilebhe yukunungila mu mahuta ghukumiminila kwa nhwalo gwa ubane ghuningila petelele, 9 na maghanga gha selidoniki na maghanga ghange gha bei ngolongwa ghakulembekeya kichibao nu npuko gwa panganga.

10 "Kila mundo jwabhii punde jwa lihengo lyolyoha lela pakate jhino, aika kuhenga ilebhe yoha yanaghalikilwe na Bhambo Chapanga. 11 Ntendekeya Lihema li Nyahinyahi, kiyekelelo chake na itabhilo yake na mighomba na mbaghalo na itamilo yake, 12 lichanduko lya lilaghano pamonga na mikamulilo jhake, kiyekelelo hele kikemwa chehemo jhikulekekewa uhakaho, na lipanjiya lya Chehemo Jha Nyahinyahi hake, 13 mecha na mikamulilo jhake pamonga na yombo yake yoha na mabumunda ghighapihitwe kwa Bhambo Chapanga, 14 kinala chukubheke mule pamonga na yombo yake yoha, mule na mahuta ghake, 15 Lichanduko lya kututukiya ubane na mikamulilo jhake, na mahuta gha kumiminila na ubane ghu kunungilila petelele, lipanjiya lya panniango gwa Lihema li Nyahinyahi, 16 na chehemo jhikupiikiya matambiko gha kukomelekeya pamonga na lwaho lwa shaba, mikamulilo jhake pamonga na yombo yake yoha, libakule likolongwa na kitamilo chake, 17 mapanjiya gha lwane na heke yake na itamilo yake na lipanjiya lya pannyango gwa lwane, 18 Ighinge ya Lihema li Nyahinyahi na ya lwane pamonga na ngojhe yakwe, 19 na ngobho ipumitwe kukuhalala hake nhwalo gwa lihengo lya Chehemo Jha Nyahinyahi. Yenio ndi ngobho ya nyahinyahi kwa mpiya litambiko Alune na yana mundo, kunhwalo gwa lihengo lyabhe lya upiya litambiko."

20 Peniya bhando bhoha bhaku Ichilahele ngabhabhoka palonge jha Mucha nu kubhujha michimba yabhe. 21 Kila mundo jwakangitwe umwojho ghake ngampikiiya Bhambo Chapanga nchango gwake nhwalo gwa Lihema li Nyahinyahi, pamonga na mahengo ghoha na ngobho yake ya nyahinyahi. 22 Yene bhoha bhina mwojho gwaumbone ghukubhoha, akanalome na akakeghe, ngabhaleta ilebhe ya chaabo na pete na ndololo na mikupo na ilebhe henge ya chaabo, kila mundo ngampiikiya Bhambo Chapanga. 23 Kila mundo ngaleta kila kilebhe chakibha nacho ngita mangoma gha mambelele gha lange kibuluu na chambalau na ngele, pange jhe ngobho nhuo ya mbuuu amu mambendela gha kinyama cha mumache na mambendela ghighakilimwe lange ngele. 24 Kila mundo jwahotwi kupiya mbijha amu shaba ngaleta kwa Chapanga ngita litambiko lyake. Kabhele mundo jhojhoha jwakibha na mbau ya nkongo nchita ngaleta hele. 25 Akakeghe bhoha bhubhakibha na upunde gwa koloka ngabhaleta ngobho ibhapumite kwa mangoma gha lange jha kibuluu na chambalau na ngele kwa mangoma manhuo mbu. 26 Na akakeghe bhoha bhubhamanyii kuloka, ngabhalokita mangoma gha mbuhe. 27 Ilongoche ngabhaleta maghanga gha bei ngolongwa cha shohamo na maghanga ghange gha bei ngolongwa ghukulembekeya kichibao na npuko gwa panganga, 28 na hele ngabhaleta ilebhe inungila kunhwalo gwa mahuta gha mule na ubane ghuna kunungulila hake. 29 Akaichihele bhoha, na akanalome na akakeghe, kukupala kwabhe ngabhaletita ilebhe yenio ngita hupo kwa Bhambo Chapanga kunhwalo gwa lihengo lyolyoha lyanaghii Mucha lihengwe.

30 Peniya Mucha ngabhalobholila Akaichilahele, "Dolangana! Bhambo Chapanga ahagwii Bezaleli, mwana gwa Ule, yane nchokolo jwa Hule, kubhoka mu likabila lya Yuda. 31 Antwelii likakala lyake nu kumpe kumanya na malango na kuhenga kila lihengo lya upunde, 32 ahumbula lihengo lyukutumii malango nu kutendekeya ilebhe ya chaabo na madine gha feza na shaba, 33 abhache maghanga gha kulembekeya na mbau kwa nhwalo gwa mahengo ghange ghoha gha upunde. 34 Kabhele Chapanga ampii malango jwenio na Oliabo, mwana gwa Ahisamake, jwa likabila lya Dane, abhola bhando bhange. 35 Bhapii kumanya ghu kuhenga kila lihengo li upunde amu ghukulembelekeya gwa koluka kwa luche lange jha kibuluu na chambalau na ngele na ngobho nhuo mbuu ina kuhalala yukuloka, kukitumii upunde gwa kila mundo jhojhoha jwamanyii upunde.