1 Peniya Bhambo Chapanga ngannobholila Mucha, "Dola, ngohe nintei ngita ma Chapanga kwa Falao, na nnongo gwino Alune nabhaha nnondole gwino. 2 Munnobholela nnongo gwino Alune kila kilebhe chinipa kunnaghalikiya, na Alune nannobholela Falao, abhalekekeya Akaichilahele bhabhoke mu kilambo chake. 3 Nambo naniutenda mwojho gwa Falao kubhehe unonoho. Ata nikachochite kuhenga nginyililo na ikangacho yango mu Michile, 4 Falao nanyokanakiya jhe mangota, peniya nahatambula lubhoko lwango lulubhii na makakala na kuchwapula kilambo cha ku Michile, na kwabhoha bhando bhango, makabila gha Akaichilahele kubhoka ku Michile. Nandenda yene kwa itendwa yabhe ikolo ya luhadabulo kwa Akamichile. 5 Akamichile nabhamanya kubhehe nenga ndi Bhambo Chapanga, pimbakuhatambu lubhoko lwango na kwabhoha Akaichilahele mwenio. 6 Mucha na Alune ngabhateila telatela, ngita chibhalaghilwa na Bhambo Chapanga. 7 Pibhalongila na munahota nkolongwa Falao, Mucha akibha muughohe gwa yaka makome nane na Alune akibha mughohe gwa yaka makome nane na itato."

8 Bhambo Chapanga ngannobholila Mucha na Alune, 9 "Falao papakunnobhole, ntende ikangacho, pena munnobholela Alune akamula nkongocho gwake na autaghila pahe palonge jha Falao, nkongocho gwenio naughalambuka kubhehe lijhoka." 10 Yene Mucha na alune ngabhanyendila Falao na kuhenga ngita chibhalaghilwa na Bhambo Chapanga. Alune ngautagha nkongocho gwake pahe palonge jha Falao na palonge jha akatumiche ajhake, na nkongocho papa ngaughalambwika kubhehe lijhoka. 11 Nambo Falao ngabhakema bhando bhina malango na akahabhe bha ku Michile, na bhene ngabhateila uhabhe gwabhe helahela. 12 Kila mundo ngautaghila nkongocho gwake pahe, yene ngaighalambwika nukubhehe majhoka. Nambo nkongocho gwa Alune ngaimila mikongocho jhoha. 13 Pamonga na gheniya, mwojho gwa Falao ngauhighilika unonoho, hilu akannyokaniki jhe Mucha na Alune, ngita chalongila Bhambo Chapanga.

14 Peniya, Bhambo Chapanga ngannobholila Mucha, "Mwojho gwa Falao unonoho hake, apaijhe kwalekekeya Akaichilahele bhabhoke. 15 Bhahe, nnyenda makakongane nako lukela, pajhenda kulukemba Naile. Na mulubhoko lwino nkamula nkongocho ghola ghughalambwika nukubhehe lijhoka. Makannendela paupele jha lukemba. 16 Peniya, munnobholela, Bhambo Chapanga, Chapanga jwa Akaebulaniya andumite kwino, kunnobholela, ‘Malekekeye bhando bhango bhajhende kunjenga bhakanyinamile, nambo mwe nkanite mbe kunyokanikiya. 17 Bhambo Chapanga ilonge kubhehe, kwa lende naumanya ne ndi Bhambo Chapanga. Dola nakumbughana mache gha lukemba Naile kwa nkongocho ghongo, na ghene naghaghalambuka kubhehe miyahe. 18 Na homba yoha yabhii mwenio mulukemba Naile naiwa na mache ghoha naghanunga njii, na Akamichile nabhanywe ng'o mache gheniya.’ "

19 Bhambo Chapanga ngannobholila Mucha, "Munnobholela Alune, atola nkongocho gwake na kujhinuu panane jha mache ghaku Michile na ngemba yoha na michinge na ilibha na mu matanda ghoha, yene naighambwika kubhehe miyahe. Miyahe ngaijhenila kila chehemo mu Michile na mu yombo yoha ya mikongo na ya undope."

20 Mucha na Alune ngabhateila ngita chabhalaghilwa na Bhambo Chapanga. Alune ngatondobhiya nkongocho gwake palonge jha Falao na akatumiche bhake, ngaghabula mache gha lukemba Naile, papa ngaghalambwika kubhehe miyahe pyuu. 21 Homba yoha ngaiwila na lukemba ngalununga hake na Akamichile bhakahotwi ng'o kunywe mache gheniya. Miyahe ngaijhenila kila chehemo mu kilambo chaku Michile. 22 Nambo akahabhe bhaku Michile kwa uhabhe gwabhe ngabhateila hele. Yene mwojho gwa Falao ngauhighilika kubhehe unonoho, ngakanita mbe kunnyokaniki Mucha na Alune ngita chalongila Bhambo Chapanga. 23 Bhahe, Falao ngabhujha mu ukajhake, ata ghighapitii akaghakamwii ndeka umwojho gwake. 24 Akamichile ngabhahemba ilibha pahina jha lukemba Naile, kupala mache gha kunywegha, nhwalo bhakahotwi ng'o kunywe mache gha mu lukemba lwenio.

25 Libulo lyene lya lukemba Naile likatamikii kwa machiko chaba.