6

1 Nambo Bhambo Chapanga ngannyangwila Mucha, "Ngohe nannola chimbakunhina Falao, naghaghalilwa kwalekekeya bhando bhango bhabhoke. Kwa makakala nabhabhenga bhabhoke mu kilambo chake."

2 Chapanga ngannobholila Mucha, "Ne, ndi Bhambo Chapanga. 3 Nikampitii Ulahimo na Ichaka na Yakobu manyikina ngita Chapanga Jhuna Makakala, nambo nakalobholii jhe liina lyango. 4 Kabhele nikalaghine nabho kwape kilambo chuku Kaanane, na kwenio bhatamita ngita akaghene. 5 Kupeta kwa gheniya, nyohine kulela kwa Akaichilahele bhighaghalilwa kuhenga mahengo gha kibhanda na Akamichile, yene ngombwike lilaghano lyango. 6 Yene, mwalobholele Akaichilahele naha, ‘Ne ndi Bhambo Chapanga! Nanimmoha kubhoke muubhanda gwino. Kwa makakala gha lubhoko lwango nanachwapula hake Akamichile nu konkombola mangota. 7 Nanintenda kubhehe mabhando bhango, na namma Chapanga gwino. Na mangota naumanya kubhehe ne ndi Bhambo Chapanga, Chapanga gwino, jhunimohite mulingolengole lyuubhanda lya Akamichile. 8 Nane nanimpeleka mukilambo chela chinaghila kumpe Ulaaimo na Ichaka na Yakobu. Nanapela kubhehe kilambo chino. Nenga ndi Bhambo Chapanga.’ " 9 Yene, Mucha ngabhalobholila Akaichilahele malobhe gheniya. Nambo bhakanyokanakii jhe nhwalo bhahengelike mwojho nhwalo gwa ubhanda utekuchocha.

10 Peniya Bhambo Chapanga ngannobholila Mucha, 11 "Nnyende kwa munanhota nkolongwa Falao jwaku Michile, abhalekeyeye Akaichilahele mu kilambo chake."

12 Nambo Mucha ngannobholela Bhambo Chapanga, "Anda Akaichilahele bhinnyokanikii jhe, kwa Falao naitenda kuchocha jhe? Ne lulime lwango lutopalo!"

13 Peniya Bhambo Chapanga ngalongela kabhele na Mucha na Alune, ngabhalaghila bhajhende kwa munahota nkolongwa jwaku Michile na jwenie ngalaghila bhabhohe Akaichilahele mu kilambo chenio.

14 Bhamba ndi bhakibha akanahota bha ngolo yabhe. Yana inalome ya Leubene jwakibha mwana jwa litibho jwa Ichilahele ikemitwa, Henoke na Palu na Hechilone na Kalomi. Henge ndi ikibha ibheluko ya ngolo ya Leubene. 15 Yana inalome ya Chimone ikemitwa, Yemeele na Yamine na Oade na Yakine na Sohale na Shaule, na Shaule ndi jwakampapii kwa mwikeghe Nkaanane. Bhamba ndi akahokolo bha lukolo lwa Chimone. 16 Ghanga ndi mahina gha yana ya Akalawe, Gechone na Koate na Melale. Lawe ngalama yaka miya jhimo na makome matato na chaba. 17 Yana inalome ya Gelichone ikemitwa Libune na Simei. Ngolo yabhe ikemitwa kwa mahina ghabhe. 18 Yana inalome ya Koate ikemitwa, Amulamo na Ishale na Hebulone na Uziele. Koate ngalama yaka miya jhimo na makome matato na mitato. 19 Yana inalome ya Melale ikemitwa, Male na Mushe. Henge ndi ngolo jha Akalawe na ibheluko yabhe.

20 Amulamo ngantolila Yokobedi nihenga mundo na jwenio ngampapila yana inalome ikemitwa, Halune na Mucha. Amulamo ngalama yaka miya jhimo na makome matato na chaba. 21 Na yana inalome ya Ishale ikemitwa, Kola na Nefege na Zikile. 22 Yana ya kilome ya Uziele ikemitwa, Mishaele na Elisafane na Sitile.

23 Alune ngantolila Elicheba, bite Aminadabo, nnombo mundo Nachone, jwenio ngampapila Nadabo na Abiu na Elezale na Itamale. 24 Yana inalome ya Kola ikemitwa, Asile na Elukana na Abisafu. Bhamba ndi akahokolo bha bhando bha Kola. 25 Eleazale mwana jwa Alune, ngantolila jhumo jwa mwana jwa Pituele, na jwenio ngampapila mwana jwakemwa, Finehase. Henge ndi ngolo ya Akalawe, kukengama na ngolo yabhe.

26 Alune na Mucha ndi bhibhalobholilwa na Bhambo Chapanga kubhehe, "Malongoche Akaichilahele kubhoka mu kilambo chuku Michile ntomontomo." 27 Ndi bhabha Mucha na Alune bhibhalongila na Falao munahota nkolongwa jwaku Michile, kupala bhalekekelwe Akaichilahele mu kilambo chenio.

28 Lichiko lela Bhambo Chapanga palongila na Mucha mu kilambo chuku Michile, 29 pannobholila, "Ne ndi Bhambo Chapanga. Munnobholela Falao hotuhotu ilebhe yoha inninobholila."

30 Nambo Mucha pannyangwila, "Ne lulime lwango lutopalo, Falao chakaka nanyokanikiya jhe?"