1 Mundo anda ajhibhite ng'ombi amu limbelele na kuchinja amu kunchulucha, jwenio alepechwa ng'ombi nhwano kwa kila ng'ombi na mambelele ncheche kwa kila limbelele. 2 Mwiye anda bhankolii ajhibha munyumba, nu kummula ade kuwegha, jwakomite abhehe jhe na matakalilo. 3 Nambo mwiye jwenio anda akamwilwe lyobha likapitagha nu kukomwa, jwenio jwankomite nabhaha na matakalilo.

Mwiye jwenio ipalwa alepechwa. Anda akwetii jhe kilebhe chukulepa, jwene achuluchwa kughombola bwiye gwake. 4 "Anda kinyama chikijhibhitwe bhakikolii kwa jwajhibhite chamela ghome, peniya jwajhibhite alepechwa pabhele, ibhaha ng'ombi amu liponda amu limbelele.

5 "Mundo anda alekekii inyama yake mung'onda gwa michabibo, amu inyama yake alichikii munng'onda gwa nnyake, jwenio nalepa ilebhe yambone kulepechela ilyeghwitwe yumunghonda amu kulepa ng'onda gwake gwa michabibo."

6 Peniya anda mundo abhabhakii nng'onda gwake nu kujhendelela ade kutiniya ilebhe ya mundo jhonge ibhii munng'onda, anda jhe nng'onda gwoha utinike, jwabhabhakii mwoto jwenio ipalwa alepa malepo kwa ilebhe itinike.

7 "Mundo annekii nnyake mbijha amu ilebhe antunjile, anda kikwatulilwe unyumba jhake, jwakwatwile akamwilwe ipalwa alepa pabhele kwa ilebhe yakwatwile. 8 Nambo jwakwatwile amanyikine jhe, nkolo nyumba aheghelela chehemo jhuku nnyinamila Chapanga kupala kulangiya jwenio abhii jhe mulukwatulo lya ilebhe ya nnyake.

9 "Anda pabhii na mitaho kunhwalo gwa ng'ombi amu liponda amu limbelele amu ngobho amu kilebhe chochoha chikiobhite, na kila mundo ilonge chake, bheniya bhipalwa bhaletwa chehemo jha kunnyinamila Chapanga. Chapanga nanangiya jwalemwite, na jhonio nanepa nnyake pabhele.

10 "Mundo anda ampeki liponda nnyake amu ng'ombi amu limbelele amu kipugho chenge chochoha ankoleke, anda kiwile amu akochilwe amu atolitwe changabhona mundo, 11 ipalwa ajhenda chehemo pakunnyinamila Chapanga na kulapila kulangii abhii jhe mulukwatulo lwenio, anda nkolo kinyama chenie akajheketile kulapila kwenio, na nnyake jwenio nalepa jhe malepo ghoghoha. 12 Nambo anda kinyama kikibha kikwatulilwe kwa jwenio jwakwatwile, ipalwa anepa nkolo kinyama. 13 Anda kinyama chenie kikomitwe na kinyama chukujhoghoha chukumanyahe, mundo jwenio jwakolika ipalwa aleta nyama jhiighalike ngita uchaide. Nalepa jhe malepo ghoghoha ghala nhwalo kinyama chenio kilegwitwe na kinyama chukumanyahe.

14 "Mundo anda ajhaike kinyama kwa nnyake, na kinyama chenio anda kikocholilwe amu kiwile na nkolo kinyama abhii jhe, jwajhaike ipalwa annepa nkolo kinyama. 15 Nambo anda nkolo kinyama abhii papa, mmanya jwajhaike jhola nalepa jhe chochoha chela. Anda kinyama kikibha chukukodicha, jwenie nkolo kinyama napokela tugha mbijha yuku kodicha.

16 "Mundo anda annoite kamwale jwangakongana na munalome na jwangatolelwa, nu kugholoka nako, ipalwa annepela inyaghabhule nu kuntolela kamwale jwenio. 17 Nambo anda tate jwa kamwale jwenio akanite kuntolanikicha kamwale jwake, mundo jwenio ipalwa alepa inyaghabhule kwa kamwale jwangakongana na munalome.

18 "Manganneka jhe mwikeghe jhojhoha nhwabhe alame.

19 "Mundo jhojhoha jwaitenda ngongola na kinyama ipalwa akomwa.

20 "Mundo jhojhoha jwaipiikiya litambiko ichapanga henge kunneka kumbiikiya ne Bhambo Chapanga, jwenio ipalwa akomwa.

21 "Mangammone jhe nng'ene amu kung'aha, nhwalo mangota hele mikibha akaghene kukilambo chuku Michile. 22 Mangang'aha jhe nawela amu mundo nkebha. 23 Anda mabhonile bheniya na bheniya anda bhannelile nenga, chakaka kulela kwabhe nannyoha, 24 na lilaka lyango nalibhaha likolongwa, nankomwa kungondo, na akahana bhino nabhabha akanawela na yana ino naibhaha ikebha.

25 "Anda munyaikiche mbijha mundo jhojhoha pakate jha bhando bhango akanhocho, mangannongama jhe hilu mangantocha jhe mbijha yukujhonjekeya. 26 Anda ntoile ngobho ya nnyino ngita pone, mipalwa mmujhichila lyobha nukutipika jhe, 27 nhwalo ngobho jhake ndi jhejhe tugha, ndi jhapakukiyeka. Miwacha nakiyeka nike? Anda annelile kupala utangatilo, chakaka naninnyokanikiya nu kuntangatila nhwalo nenga mmii na kiya.

28 "Mangannigha jhe Chapanga, hilu kunnigha ntumiche gwino.

29 "Mangaleka jhe kupiya lipungu lyango kubhoke mujholoke gwa ilebhe na divaye jhino."

Umbela nenga yana hino inalome yalitibho.

30 Ntenda hele naha kwa inyama yalitibho lya ng'ombi na mambelele ghino gha nkambako. Mikileka kinyama cha litibho na majhe mundo kwa machiko chaba, na lichiko lya nane unetela nenga.

31 "Mangota namma ndi mabhando bhanhagwile. Yene, mangalye jhe nyama jha kinyama chikikomitwe na kinyama chukumanyahe. Nyama jwenio mitaghila ghimbwa.