1 Bhambo Chapanga ngabhalobholila Mucha na Alune mu kilambo chuku Michile, 2 "Mwehe ghongo kwino ubhaha mwehe gwa kutumbula kwa chaka. 3 Mwalobholela Akaichilahele bhoha kubhehe lichiko lya kome lya mwehe ghongo, bhatola litohe lya limbelele lyakambako limo lyalihatite kwa kila nyumba. 4 Anda ibhii nyumba jhojhoha inabhando bhandina bhangahoto kujhomo limbelele lyene, nyumba jhene ipalwa kulombana na nyumba jhenge. Peniya nabhahaghula kinyama lenga na bhando bhakulye nyama na kujhomola. 5 Mihoto kuhaghula litohe lya limbelele amu mbuhe lyankambako na abha jwa chaka chimo, jwangalemala. 6 Kila nyumba itunja inyama yene ade lichiko lya kome na ncheche lya mwehe ghogho. Lichiko lyene Akaichilahele nabhachinja inyama yene kimiye. 7 Peniya nabhatola miyahe jha inyama yene na kukilima mu mihimbate na ikolomino ya kunane jha kila nyumba jhimpakulele mwana limbelele lyene. 8 Kilo jhejhe nabhamemena nyama jhakubanika. Nabhalya pamonga na mabumunda ghangalekelwa ngedule na likolo lya mahamba libhabha. 9 Mangalye jhe nyama bhehe amu jhukututuha, nambo ibhaha jhakubanika pa mwotu, mangadumu jhe muto gwake hilu magholo ghake, mbanika pamonga ibhende yake. 10 Mipalwa kulye nyama jhoha kilo hilu mangahighalajhe ade lukela. Nyama jhojhoha anda ihighilike ade lukela mipalwa kutiniya pa mwotu. 11 Yene ndi chimipalwa kulyegha nyama jhene, chimikikonga luhunga mu kibhuno, na kuwala maghubache ghino na mumabhoko nkamula nkongocho gwino. Na kulye kajhombe jhene ndi Pachaka jha Bhambo Chapanga.

12 "Kilo jhejhe nambeta mu kilambo choha chuku Michile na kuikoma yana ya litibho ya Akamichile na inyama. Na kuibula ichapanga yoha ya ku Michile. Nenga ndi Bhambo Chapanga. 13 Bhahe, miyahe jhenie naibha nginyililo jhino jha mu nyumba yimitama mangota. Na nenga pambakuibhona miyahe jhene naninhomba, peniya nalinkole jhe lilagho lyolyoha pimbakukibula kilambo chuku Michile. 14 Lichiko lende nalibha ukombochelo kwino, nabhatenda unyagho gwa Bhambo Chapanga mu ibheluko hino yoha. Nankamula nhwilo gwa machiko ghoha ghangapeta."

15 Bhambo Chapanga ngalongila, "Kwa machiko chaba mipalwa kulye mabumunda ghangalekelwa ngedule. Mu lichiko lya kutumbula lya machiko gheniya chaba, namoha ngedule mu nyumba hino. Mundo jhojhoha jwapakulye chikilekilwe ngedule mu machiko gheniya, jwenio nabhengwa kutale pakate jha Akaichilahele bhoha. 16 Mu lichiko lya kutumbula na lichiko lya chaba napabhaha na likonganiko lya nyahinyahi. Mu machiko ghene mipalwa jhe kuhenga lihengo lyolyoha, nambo kulenganiki chakulya cha kila mundo, lyene tugha ndi limipalwa kuhenga. 17 Na mangota nankomboka unyagho gwa mabumunda ghangalekelwa ngedule, nhwalo lichiko lyene lyanabhohita akakomana ngondo bhino kuhumi ku Michile. Unyagho gwenio nabhatenda ibheluko hino yoha, kubhehe minhilo jha machiko ghoha ghangapeta. 18 Yene, kimiye jha lichiko lya kome na ncheche lya mwehe gwa kutumbula nalyangana mabumunda ghangalekelwa ngedule, ade kimiye jha lichiko lya makome mabhele na limo lya mwehe ghogho. 19 Mu machiko gheniya chaba mangabheka jhe ngedule mu nyumba hino. Mundo jhojhoha abha nng'ene amu nkolo nyumba anda alile kilebhe chikilekilwe ngedule, jwenio nabhengwa kutale pakate jha Akaichilahele bhoha. 20 Popoha pumitama, mipalwa ng'o kulye kilebhe chochoha chikilekilwe ngedule. Mipalwa kulye mabumunda ghangalekelwa ngedule."

21 Bhahe, Mucha ngabhakema ighogholo bha Akaichilahele, na kwalobholela, "Kila mundo ahaghula litohe lya limbelele amu mbuhe na kuchinja kwa nhwalo gwa Pachaka tela na bhando bhake. 22 Ntola lituto lilikemwa hichopo na kulichwiya mu libakule jhibhii na miyahe, na nkilima mu ikolomino yoha ibhele na mu nnyango. Mundo jhojhoha angapita jhe panja ade lukela. 23 Nhwalo nenga Bhambo Chapanga nambeta mu kilambo choha na kwakoma Akamichile. Nambo pambakuibhona miyahe jhikilimwe mu ikolomino ya nnyango, nanhomba hilu nanineka jhe jwakoma ajhingii nkate, ankome. 24 Nkamula lilobhe lende mwenga na ibheluko hino, ngita nhwilo gwa machiko ghoha ghangapeta. 25 Na pumpakujhingii mu kilambo chalaghila Bhambo Chapanga kumpela, ntenda naha ngita chinnaghalikiya. 26 Yana hino pibhapala kunkonya, ‘Unyagho ghongo mana ghane nike kwino?’ 27 Mangota majhangula, ‘Lende ndi litambiko lya Pachaka kwa ichima jha Bhambo Chapanga, nhwalo akahombite nyumba ya Akaichilahele ku kilambo chuku Michile. Pibhakomitwa Akamichile nambo twenga ngatuleka ghome.’ "

Akaichilahele ngabhatamita makilikite na kunnyinamila Bhambo Chapanga.

28 Akaichilahele ngabhajhenda nukutenda tela ngita Bhambo Chapanga chabhalaghila Mucha na Alune.

29 Uwiko gwa kilo, Bhambo Chapanga ngakoma ibheluko yoha ya litibho ya ku Michile. Mwana jwa litibho jwa Falao jwapakubhe mmujhila jwa Falao na mwana jwa litibho jwapungwa. Na mwana jwa litibho jwa kila Mmichile. Yene ngankoma inyama yoha yukutumbula kubhelukwa. 30 Uwiko ghogho, Falao na akatumiche ajhake na bhando bhoha bhu ku Michile ngabhajhimwika, na kukibha na kilelo kikolongwa hake ku Michile, nhwalo pakibha jhe na nyumba ata jhimo jhanga malelo kwa mwana jwa litibho munalome. 31 Peniya, uwiko ghola Falao ngankema Mucha na Alune, na kwalobholela, "Jhimuka! Mmokengane mangota na bhando bhino Akaichilahele. Nnyendengane, makannyinami Bhambo Chapanga ngita channongila. 32 Mmokangana na malongo ghino gha mambelele na mbuhe na ng'ombi hino, ngita channongila, nnyendengane, na helahela unnyopela mota na nenga."

33 Akamichile ngabhaghaghalila Akaichilahele bhabhoke kajhombe, kongo bhakalongila, "Mmokengane anda naijhe natuwa tabhoha!" 34 Peniya, Akaichilahele ngabhatola lihunya lyabhe lilihunywitwe lya mabumunda gwangalekelwa ngedule, na yombo yakuhunyila ngabhakongita mu ngobho na kughegha mu mabhegha ghabhe. 35 Akaichilahele ngabhateila ngita chibhalobholilwa na Mucha pakutumbula, ngabhajhopita Akamichile ilebhe ya madine gha feza na chaabo na ngobho. 36 Bhahe, Bhambo Chapanga ngabhateila Akamichile bhabhe bhaumbone kwa Akaichilahele, ngabhapilwa kila kilebhe chibhajhopita kwa Akamichile. Yene ndi Akaichilahele chibhatoila ilebhe mbwe ya Akamichile.

37 Akaichilahele ngabhabhoka ku muche gwa Lamesesi nu kujhenda ku Sukosi kwa makongono. Akanalome bhakibha ngita lake chita, changabhalangila akakeghe na yana. 38 Ngabhalongohina na nchambe gwa bhando bhange. Helahela Akaichilahele ngabhabhokita na mipugho jhabhe jha mambelele na mbuhe na ng'ombi. 39 Ngabhalenganikiya lihunye lya mabumunda ghangalekelwa ngedule kwa uhembe ghola kuhumita ku Michile, bhakahotwi jhe kulenganikiya chukukomelela undela, nhwalo bhakabhengwitwe kajhombe.

40 Akaichilahele ngabhatamita ku kilambo chuku Michile kwa kipinde cha yaka miya ncheche na makome matato. 41 Mu lichiko lya kupehekeya lya chaka cha miya ncheche na makome matato, ndi lichiko lele makabila ghoha gha Bhambo Chapanga ngighabhabhokita mu kilambo chuku Michile. 42 Uwiko gwenio, Bhambo Chapanga ngakelwiya kwabhoha Akaichilahele mu kilambo chuku Michile, yene ipalwa ikombokwa na Akaichilahele bhoha na ibheluko yabhe yoha kwa uwiko gwenio, ngita ichima jha kukeluwa kwa Bhambo Chapanga.

43 Bhambo Chapanga ngannobholila Mucha na Alune, jhenje ndi mihilo jha Pachaka, nng'ene jhojhoha ipalwa jhe kulye chakulya cha Pachaka, 44 nambo mmanda jhojhoha jhumunhemile kwa mbijha, ahoto kulye anda ajhingi jando, 45 mundo jhojhoha jwabhii nng'ene amu ntumiche jhojhoha, angalye jhe chakulya chenie cha Pachaka, 46 nyama jha litohe lya limbelele ipalwa ilyegwa nkate jha nyumba jhejhe jhilenganikilwa. Nkoto kubhoha nyama jhojhoha mu nyumba jhene, hilu nkoto kukekechula kihupa chochoha. 47 Bhando bhoha bhuku Ichilahele bhipalwa bhahanganila unyagho gwenio, 48 Anda abhi nng'ene jwatama panakate jhino jwapala kukomboka kulye chakulya cha Pachaka, ipalwa akanalome bhoha bhubhabhii mu nyumba jhino, bhajhingila jando, ndi nabhahotola kulye ngita nkolo muche. Munalome jhojhoha jwangajhingi jando ipalwa jhe kulyegha chakulya cha Pachaka. 49 Nhwilo gwenio ubhaha kwa Mwichilahele na akaghene bhibhatama na mangota. 50 Akaichilahele bhoha ngabhakamwila mbone nhwilo gwenio ngita Bhambo Chapanga channaghila Mucha na Alune. 51 Lichiko lele, Bhambo Chapanga ngabhabhoita Akaichilahele mu kilambo chuku Michile ntomontomo.