1 "Kuyene, Bezaleli na Oliabo, pamonga na kila mundo Bhambo Chapanga jwampii uhotolo na malango ghu kumanya kuhenga mahengo ghoha mu kutendekeya Lihema lya nyahinyahi, nahenga mahengo kulengana na Bhambo Chapanga ghalaghalikile."

2 Bhahe, Mucha ngankema Bezaleli na Oliabo na kila mundo jwapatite umanye kubhoke kwa Bhambo Chapanga na kila mundo jwahenga lihengo jwapalita jwene. 3 Bheniya ngabhapokela ilebhe yoha kubhoke kwa Mucha yaipiitwa na Akaichilahele kwa nhwalo gwa lihengo lya Lihema li Nyahinyahi. Yene bhando ngibhajhendelila kunnete michangu Mucha kila lukela. 4 Bhando bhibhakibha bhahengita lihengo lya kutendekeya Lihema li Nyahinyahi, ngabhajhenda, 5 nu kunnobholela Mucha, "Bhando bhaletite ilebhe mbwe hake kopeta hela yalaghila Bhambo Chapanga."

6 Bhahe, Mucha ngalaghila, "Mundo jhojhoha, abhe munalome amu mwikeghe angaleta kabhele jhe michangu kunhwalo jha Lihema li Nyahinyahi." Bhando ngabhaleka kuleta ilebhe, 7 nhwalo yaye ibhakaletite ngikwela ku lihengo lyenie nu kuhighila!

8 Akanalome bhoha bhukumanya ngabhatendikiya Lihema li Nyahinyahi kwa mapanjiya kome ghikitambala chambone kihuo, ghighatenganichwe kukoloka na mangoma gha mambelele gha lange jha kibuluu na chambalau na ngele, nu kulembelekeya ihumbe ina mapapanilo ikemwa makelube. 9 Kutandamala kwa kila lipanjiya ikibha mita kome niibhele na upana gwake mita ibhele. Mapanjiya ghoha ghakibha kipemo chimo. 10 Bhando bheniya ngabhalombanicha mapanjiya nhwano kubhehe limo, na kutenda hele naha kwa ghange nhwano. 11 Ngabhatendekeya lipogholo ya lange jha kibuluu mulilombolo lya lipanjiya li kujhomolela li kipande chukutumbula, na lipogholo longe mu lipanjiya li kujhomolela li kipande chu ubhele. 12 Ngabhabheka mapogholo makome nhwano mu lipanjiya li kutumbula li kipande chukutumbula, na mapogholo makome nhwano muminiko jha lipanjiya lya ubhele, mapogholo yoha ngalolikihine. 13 Kubhoke peniya ngabhatendekeya ikobhekelo makome nhwano ya chaabo kupala kulombe ipande ibhele yela ya mapanjiya, yene Lihema ngibhila kilebhe chimo.

14 Peniya ngabhatendekeya kiyekelelo chi Lihema kwa mapanjiya kome na limo jha mangoma gha mbuhe. 15 Kila lipanjiya lyakibha kutandamala kwake mita kome niitato, na upana gwake mita ibhele. Mapanjiya ghoha kome na limo ghakibha ndi kipemo chimo. 16 Bhahe, ngabhalombanicha mapanjiya nhwano pamonga, na mapanjiya chita pamonga. 17 Kubhoke peniya ngabhabheka miniko makome nhwano muluminiko lwa lipanjiya li kujhomolela li kipande chu kutumbula, na ngojhe makome nhwano muluminiko lwa kipande cha ubhele. 18 Peniya ngabhatenginicha mapogholo makome nhwano gha shaba kupala kulombe ipande ibhele ya mapanjiya, na yenio ngiibhila lipanjiya limo lya kiyekelelo. 19 Pubhajhomolila ghene, ngabhatendekeya iyekelelo ibhele, chimo cha limbendela lileghelao li limbelele lipongo lina lange ngele, na chenge chi limbendela lya kinyama cha mumache.

20 Kubhoke peniya ngatendekeya felemo kwa mbau jha nkongo gwa nchita gwa kujhemekela Lihema li Nyahinyahi. 21 Kila lifelemo likibha kutandamala kwake mita ncheche na upana gwake chentimita chitine na chita. 22 Kila lifelemo ikibha napande ibhele yu kulombela. Felemo yoha ya Lihema ngaitendeke mbanda ibhele. 23 Felemo yenio ya Lihema ngitenginichwa yene, kwa makome mabhele upande gwa kuchine, 24 ngabhatengenicha na itamilo makome ncheche gha madine gha feza pahe jha mafelemo makome mabhele na itamilo pahe jha kila lifelemo kupala ikamulila mbanda yake ibhele. 25 Na upande gwa ubhele, yane kachikachine ghu Lihema ngabhatendekeya mafelemo makome mabhele, 26 na itamilo yake makome ncheche ya madine gha feza, itamilo ibhele pahe jha kila lifelemo. 27 Upande gwa kunyuma, yane ghulitipikii lyobha mu Lihema, ngabhatendekeya mafelemo chita. 28 Ngabhatendekeya mafelemo mabhele nhwalo gwa imbokotole ya lihema ibhele ya kunyuma. 29 Mafelemo mabhele gha imbokotole ngaikamulila kubhoke pahe ade kunane mupete yu kutumbula. Mafelemo mabhele gheniya ghatengenichwe kwa ndela jhenio. 30 Yene pakibha na mafelemo nane na itamilo yake, ya madine gha feza kome na chita, itamilo ibhele pahe jha kila lifelemo.

31 Hele ngabhatendekeya mighomba nhwano jha nkongo nchita, nhwalo gwa mafelemo gha upande ghumo gwa Lihema, 32 mighomba nhwano kwa nhwalo upande ghonge gwa Lihema, na mighomba nhwano kwa nhwalo jha mafelemo gha upande gwa kunyuma gwa Lihema, chikibhii ghulitipikii lyobha. 33 Ngabhatendekeya nghomba gwa panakate ghuikii panakate jha Lihema lyenio, ngaikongina panakate kubhoke kumwicho ade kumwicho. 34 Mafelemo ghoha ngabhapakiya chaabo, ngabhatendekeya napete ya chaabo yu ukamulila mbaghalo yenio, hele ngabhapakiya chaabo.

35 Ngabhatendekeya lipanjiya lya ngobho nhuo nu kulembelekeya kwa nyuche ya lange jha kibuluu na chambalau na ngele. Lipanjiya lyenio ngililembelekiwa ihumbe ilandana na makelube ina mapapanilo kwa upunde hake. 36 Kubhoka peniya ngabhatendekeya heke ncheche ya nkongo gwa nchita, ngabhapakiya chaabo na kubheka ikobhekelo ya chaabo. Hele ngabhatendekeya itamilo ncheche kwa madine gha feza. 37 Kabhele, kwa nhwalo gwa nnyango gwa Lihema, ngabhatendekeya lipanjiya kwa ngobho nhuo nu kukulokwa kwa upunde kwa nyuche ya lange jha kibuluu na chambalao na ngele, 38 na heke yake nhwano ikibha na ikobhekelo yake, yikakilimwe chaabo kuhuma kunane ade pahe. Nambo itamilo yake ikibha ya shaba, na heke yoha ngipakwitwa shaba.