1 Mucha ngannobholela Chapanga, "Nambo Akaichilahele nabhanyokanakiya jhe, nabhalongela, mwenga ampitii ng'o Bhambo Chapanga?"

2 Peniya Bhambo Chapanga ngankonya Mucha, "Nkamwii nike mulubhoko lwino?"

Mucha ngajhangwila, "Ngamwi nkongocho."

3 Bhambo Chapanga ngalongila, "Ntaghii pahe." Mucha ngatagha tepe, papa nkongocho ngalughalambwika kubhehe lijhoka, na jwene ngatila. 4 Pena Bhambo Chapanga ngannobholila, "Kamula nkela jwa lijhoka." Bhahe, Mucha ngakamula nkela gwa lijhoka lyene, papa lijhoka ngalighalambwika kabhele kubhehe nkongocho mulubhoko lwake. 5 Chapanga ngannobholila, "Chakaka Akaichilahele nabhanyokanakiya kubhehe nenga Bhambo Chapanga, Chapanga jwa tate gwino, Chapanga jwa Ulahimo, jwa Ichaka na jwa Yakobu, nimpitile."

6 Kabhele Bhambo Chapanga ngannobholela Mucha, "Ngohe bheka lubhoko lwino panganga." Mucha ngatenda yene. Palubhohita lubhoko lwake lujhakubhehe na malohe mahuo mbuu ngita cheluji. 7 Peniya Chapanga ngannobholila, "Bheka kabhele panganga." Mucha ngatenda yene, palubhohita lubhoko lwake lujhakubhehe njelembo ngita chiukibha. 8 Bhambo Chapanga ngannobholela, "Anda bhanyokanaki jhe amu kujheketela nginyililo jhela jhitumbwila, pange nabhajheketela nginyililo jha ubhele. 9 Nambo anda bhajheketii jhe nginyililo henge ibhele hilu kunnyokanakiya malobhe ghino, nteka mache gha mu lukemba Naile na kughajhitii kundumba. Mache ghimipa kunteka mu lukemba naghaghalambuka kubhehe miyahe pandumba."

10 Nambo Mucha ngannobholela Bhambo Chapanga, "Mabhambo gwango, ne kulonge kwene kumamatila kuhumii makacho, ata mwenga punnongila na nenga natumiche bhino. Nhwalo lulime lwango lutopao."

11 Bhambo Chapanga ngankonya Mucha, "Ghane jwaupangine nnomo? Ghane jwatei mundo alongele amu jwangalongela? Ghane jwampeki mundo kulola amu kubhehe jwangalola? Nei jhe Bhambo Chapanga? 12 Ngohe, nnyende! Nanintangatila na kummola kila kilebhe chakulongela."

13 Nambo Mucha ngalongila, "Mabhambo, chonde ne nihoto jhe, muntume mundo jhonge."

14 Peniya Chapanga nganchimwa Mucha, ngalongila, "Bho, chi abhii nnongo gwino Alune, Mlawe? Jwene ilonge maha. Kabhele abhii undela ihika kukongana na mwenga, pumpa kukongana nahangana hake ku mwojho gwake. 15 Mwenga nannongela nako na kunnobholela ghoha ghapakulongela. Nenga nanitangatila na kummolangana ilebhe ipakuhenga. 16 Alune nalongela na Akaichilahele kwa nhwalo gwino. Jwene nabhaha nnondole gwino, na mwenga namma ngita Chapanga kwa jwenio. 17 Nantola nkongocho ghongo mulubhoko lwino, ntumila kutende nginyililo yela."

18 Pena Mucha ngabhujhita kwa Yetulo, nkohano mundo, ngannobholila, "Chonde unekekeye nnyende ku Michile kwa akalongo bhango, nikamanye pange bhabhii ghome." Yetulo ngannobholela, "Nnyenda kwa uteeke." 19 Mucha pakibha ammela kukilambo chuku Mediane, Bhambo Chapanga ngannobholela, "Mmujhe ku Michile, nhwalo bhala bhoha bhibhapala kunkoma bhajhomwike." 20 Pena Mucha ngantoila nhwana mundo na yana yake, na kwahobhokela panane jha liponda na kutumbuu mwanja gwa kubhujha ku Michile. Mu lubhoko lwake akamwi nkongocho gwalobholilwa na Chapanga atole.

21 Kabhele, Chapanga ngannobholila Mucha, "Ngohe mibhuja ku Michile, chakaka henga ikangacho yoha yanimpekii uhotolo gwa kuihenga palonge jha munanhota nkolongwa Falao. Nambo nenga chaniutenda mwojho gwa Falao kubhehe unonoho, na jwene nabhalekekeya jhe Akaichilahele bhabhoka. 22 Na mwe namnnobholela Falao, Chapanga ilonge naha, ‘Ichilahele ndi mwanango jwa litibho munalome. 23 Nenga ninnobholela, munneke mwanango abhoke, kupala andumikile! Anda munnekiki jhe abhoke, naninkoma mwana gwino jwalitibho munalome.’ "

24 Mucha pakibha pa kighono cha akaghene kongo abhii undela kubhujha ku Michile, Chapanga ngakongina nako na kupala kunkoma. 25 Pena, Chipola ngatoila lighanga lilitema hake, ngahekita lindole lya mwana mundo munalome na kunkilimi Mucha mu magholo ghake. Na kulonge, "Chakaka mwenga ndi manyinamwale gwango gwa miyahe." 26 Yene, Bhambo Chapanga nganneka Mucha. Chipola alongila "Nnyinamwale gwa miyahe," nhwalo gwa kuheketa lindole lya mwana mundo munalome.

27 Chapanga ngannobholela Alune, "Nnyende kunjenga makakongane na Mucha." Pena Alune ngajhenda ngankongana na Mucha kukitombe cha Chapanga, ngankumbatila. 28 Mucha ngannobholila Alune hotuhotu ghala ghalaghilwa na Chapanga kughalonge, helehela nginyililo na ikangacho yoha yalaghilwa kuhenga.

29 Peniya, Mucha na Alune ngabhajhenda na kwakonganicha ighogholo yoha ya Akaichilahele. 30 Alune ngabhalobholila hotuhotu malobhe ghoha, ghalaghilwa Mucha na Bhambo Chapanga, na kuitenda ikangacho palonge jha bhando bhoha. 31 Bhando ngabhanyeketela. Na pibhajhohina kubhehe Bhambo Chapanga ahikita kwatangatila Akaichilahele na kubhehe aghabwene mang'ahe ghabhe, bhoha ngabhalita na kunyinamila.