1 Peniya, Mucha pamonga na Akaichilehele ngabhanyembe nhwambo ghongo Bhambo Chapanga,

Ninyembe nhwambo gwa kunnomba Bhambo Chapanga, nhwalo abhahotwi kwa kihindo Akamichile bhoha, Bhambo Chapanga abhakangii umbwane

falache na akakwela falache.

2 Bhambo Chapanga ndi makakala ghango na uhotolo gwango,

na jwene ndi jwangombwila,

ndi Chapanga gwango naninnomba,

na Chapanga jwa tate gwango naninnyinamila.

3 Bhambo Chapanga ijhoghopa jhe ku ngondo.

Na Bhambo Chapanga ndi liina lyake.

4 "Mutuka na akakomana ngondo bha Falao abhataghi umbwane,

akatumiche bhake bhakahagwile bhamilitwe mu mbwane jha Chamu.

5 Chehemo jhinyolike jhamilite,

bhamilitwe umbwane ngita lighanga."

6 Mwe ma Bhambo Chapanga lubhoko lwino lwalelo lumanyikina kwa makakala,

lwenio lwatimba akamakoko.

7 Kwa ukolo gwino gwamahele makomelekeya akamakoko bhino,

makalekekiye lilaka lino na lyene lyatiniya akamakoko bhino ngita mapepetahe.

8 Kwa uhuke gwa umbulo jhino mache ngaghalundikana,

matuhe gha mbwane ngaghajhema ngita lipamanda,

mache gha chehemo jhinyolike panakate jha mbwane ngaghaghanda.

9 Likoko ngalongila, Chanakengima na kwapukila,

chamaghana ilebhe yabhe nu kutola chochoha chinikipala.

Naholomola upanga gwango,

na kwakomelekeya kwa lubhoko lwango.

10 Nambo mwenga ngamupoghecha upepo gwino,

na mbwane ngajhamila ghina makakala,

ngabhadidimila ngita lighanga lina kutopa.

11 Mwe Bhambo Chapanga,

ghane panakate jha ichapanga jwabhii tela na mwenga?

Ndi ghane jwabhii ngita mwenga jwa nyahinyahi hake?

Jhumijhoghoha kwa itendwa ya nyahinyahi,

ghane jwaitenda ikangacho ngita mwenga? 12 Makatondobhii lubhoko lwino lwalelo,

na nnema ngagwamila akamakoko bhito.

13 "Kwa upalo gwino nkolo mwalongwiye bhando bhamakombwi,

kwa makakala ghino mwalongwiye ade pa kitamo chino cha nyahinyahi.

14 Bhando bha ilambo henge ngabhajhohine na kulendema,

Akafilichite ngabhabha na lipyanda hake.

15 Ilongoche yuku Edomu nabhajhoghopa,

akatumiche bhuku Moabo ngibhalendima kwa bwoghohe hake,

na bhando bhoha bhu ku Kaanane ngabhahengelika miyojho hake.

16 Iticho na mbwelelo yajhingilile.

Nhwalo gwa ukolo gwa makakala ghino,

bhabhii nuu ngita lighanga,

ade bhando bhino Mwe ma Bhambo Chapanga, bhapete,

hena, ade bhando bhino bhamwankombwile bhapete.

17 Mwenga namwaleta bhando bhino na kwabheka bhatame pa kitombe chino,

pala panhagwila mwe ma Bhambo Chapanga pabhe matamo ghino.

Chehemo jha nyahinyahi ma Bhambo Chapanga panchengita kwa mabhoko ghino.

18 Mwe ma Bhambo Chapanga,

milongocha machiko ghoha ghangapeta."

19 Falache yake Falao na mutuka yake ya ngondo na akakwela falache bhake ngabhakengima na kuhika chehemo nnyomo mu mbwane, Bhambo Chapanga ngaghaleka mache gha umbwane ghakongane na kwamila. Nambo Akaichilahele ngabhatyanga pajhomo umbwane.

20 Miliamo nnombo gwake Alune, jwakibha nnondole mwikeghe jwa Chapanga, ngatola kankole mu lubhoko lwake, na akakeghe bhoha ngabhakengima kongo bhihona ng'oma na kuhina. 21 Miliamo ngabhalongwiya kujhemba,

"Munnyembele Bhambo Chapanga, nhwalo ahotwi kwa ukolo,

falache na akakwela fachache bhake abhataghii umbwane."

22 Peniya, Mucha ngabhalongwiya Akaichilahele kubhoke ku mbwane jha ku Chamu ade kunjenga jha ku Chuli. Ngabhatyanga kwa machiko matato bhakaghabwe jhe mache.

23 Pabhahikita chehemo jhikemwa Mala, ngabhaghakolila mache nambo bhakahotwi jhe kunywe mache gheniya nhwalo ghakibha mabhabhaho. Yene chehemo jhenie ikemwa Mala, mana jhake, "Kubhabha." 24 Bhahe, bhando bhoha ngabhankokilekela Mucha kulonge, "Ngohe natunywa nike?" 25 Peniya, Mucha ngannelila Bhambo Chapanga, na Bhambo Chapanga ngannangiya kimbengembenge, Mucha ngakitumbukiya umache, papa mache ngaghabha ghambone.

Kwenio Bhambo Chapanga ngabhapela nhwilo na lilaghalikilo Akaichilahele, na kwajhigha, 26 na Bhambo Chapanga ngabhalobholila, "Anda nnyokanakii mbone lilobhe lyango nenga Bhambo Chapanga gwino, na kutenda ghighabhi tela palonge jhango, na kuechimu nhwilo na malaghilo ghango, bhahe naninnete jhe malwalo ghoghoha ghinaletila Akamichile. Nhwalo nenga ndi Bhambo Chapanga jwaninnamicha mangota."

27 Peniya Akaichilahele ngabhahika chehemo jhikemwa Elimu kwenio kukibha na yembwe kome na ibhele na mikongo makome chaba jha mitende. Ngabhabheka kighono chabhe pahina na mache.