1 Bezaleli ngatendekeya lichanduko lya Lilaghano kwa mbau ya nkongo nchita miya jhimo na likome limo, kutandamala kwake kukibha chetimita chitine na chita na kubhoka pahe ade kunane chetimita chitine na chita. 2 Ngalipakiya chaabo jhamaha nkate na panja, nu kutendekeya lubiniko lwa chaabo kutindila pande yoha. 3 Peniya ngatendekiya pete ncheche ya chaabo kunhwalo gwa kupetechela nchegha yukugheghela Lichanduko, ngabheka ijhemeleo yake, kila kijhemo pete jhimo. 4 Ngatendekeya minchegha jha nkongo gwa nchita nu kupakaya chaabo. 5 Ngaiwalicha pete mighomba jhenio ibhii mu pande ibhele ya lichanduko, kwa nhwalo ghu kugheghela. 6 Ngatenginicha kiyekelelo cha chaabo jhamaha hele pakemitwa chehemo jhuku lekekeya uhakaho, kutandamala kwake chentimita miya jhimo na likome limo nu upana gwake chentimita chitine na chita. 7 Helahela ngatendekeya ihumbe ina mapapanilo ibhele kukuyana chaabo nukubheka upande ghumo na upande ghonge panane jha kiyekelelo chake, 8 kihumbe chimo kumwicho kongo na chenge kongo. Ihumbe yenio ina mapapanilo ngibhujhila mu kiyekelelo chenio, ibhii telatela na kiyekelelo. 9 Ihumbe yenie ikibha mwiye na mwiye, mapapanilo ghabhe ghaatambulwe kukiyekele kiyekelelo cha lichanduko, na kumiho jhabhe iliti kiyekelelo cha lichanduko.

10 Kabhele Bezaleli ngatendekeya mecha jha mbau jha nkongo gwa nchita kutandamala kwake makome nane na nane na upana gwake chentimita makome ncheche na ncheche na ukolo gwake chentimita chitine na chita. 11 Peniya ngapakiya chaabo jhamaha na kuitendikiya lubiniko lwa chaabo. 12 Ngaitindikiya mbau ukolo gwake milimeta makome chaba nunhwano kubheka lubiniko lwa chaabo. 13 Ngaitendekeye pete ncheche ya chaabo na kuibheka mu pande yake ncheche mu makongono. 14 Pete yenie yu kukamulila michegha jhakugheghela jhibhii pahina na ghola miniko gwa mbau. 15 Ngatengenicha michegha mibhele jha nkongo gwa nchita gwa kugheghela Lichanduko, ngapakiya chaabo. 16 Ngatendikiya yombo ya chaabo jhamaha jhu kubheka panane jha mecha, yane yukulelela na ikombe na komiche nabakule kwa nhwalo gwa matambiko ghukunyegha.

17 Peniya Bezaleli ngatendekeya kilana chukubheke mule kwa chaabo jhamaha. Kitamilo chake na kijhemo chikinala chenio kikibha chimo pamonga na ikombe yake, ndumbache yake na malobha ghake. 18 Mandabhe chita ghakibha mukinala chenio, mandabhe matato upande ghumo na mandabhe matato upandi ghonge. 19 Mu kila lindabhe kukibha na ikombe itato ilandana na malobha gha mloze, kila limo na ndumbache jhake na lilobha lyake. 20 Na muminiko kukibha na ikombe ncheche ilandana na malobha gha mloze, pamonga na ndumbache yake na malobha ghake. 21 Chehemo jhela jhipitii ndabhe itato jha pahe kwa kila upande, pakibha na ndumbache jhimo. 22 Ndumbache yenie na ndabhe ikibha kilebhe chimo na kinala chenio, na yoha ngiiyanitwa kwa chaabo jhamaha. 23 Hele ngatendekeya mule chaba, mikache na yahane yake kwa chaabo jhamaha. 24 Kinala chenio na ilebhe yake yoha, akatumii kilo makome matato nu nhwano ya chaabo jhambone kutengenechela.

25 Bhahe, Bezaleli ngatenginicha lichanduko likututukii ubane kwa mbau ya nkongo gwa nchita. Kichanduko chenio kikibha pande yoha ncheche ilengana kwa chentimita makome ncheche nunhwano na upana gwake na utandamalo na ukolo gwake chentimita makome ticha. Imbetule ya kichanduko chenio ikibha kilebhe chimo na chehemo jhenio jhukupiikiya. 26 Kichanduko choha ngakipakiya chaabo jhamaha, chehemo jhukunane, hele chehemo ilipamanda na imbetuli yake, ngatendikiya miniko ya chaabo. 27 Ngatendekeya pete ibhele ya chaabo pahe jha miniko mu pande ibhele ilolekeyana. Pete yenie ngaitumika kukamuli michegha jhu kugheghela. 28 Peniya ngatendekeya michegha mibhele jha nkongo gwa nchita nu kupakaya chaabo.

29 Ngatendekiya mahuta ghamaha ghukupaka, na ubane gwamaha ghunhangalwinwe maha ghigha tengenichwe na punde jwatengenecha manukatu.