1 Bezaleli ngatendikiya lichanduko likupiikiya matambiko gha kukomelekelwa. Lichanduko jhenio kutandamala kwake kukibha telatela, mita ibhele na lobo kwa mita ibhele na ukolo gwake mita jhimo na nucho. 2 Mu kila upande gwa lichanduko lya kupiikiya litambiko lyenio ngabheka kimbeketule pakibha na manyelo lilikibha kitenginichwe kubhoke mulichanduko lya kupiikiya litambiko lyenio na kubhehe kilebhe chimo. Lichanduko lya kupiikiya litambiko lyoha ngalipakiywa shaba. 3 Helehela ngatendikiya ilebhe yoha kwa shaba, kunhwalo jha lichanduko lya kupiikiya litambiko. Ngatendikiya ibhegha na lichepeto na mabakule na yoma yu kughalambukila nyama na ijhonjo yukujhipulii mwotu nu kujhole maliho. Yombo yake yoha ngatenginicha kwa shaba. 4 Peniya, ngalenganikiya lwaho lwa shaba ngalubheka pahe jha luminiko pakate jha lichanduko lyenie. 5 Mu imbokotole ncheche ngatendekeya pete ncheche ya shaba yukugheghe lichanduko lyenio. 6 Ngatendekeya mighomba jha nkongo nchita jhu kugheghe kichanduko chenio nu kupakaya shaba. 7 Ngabhekita mighomba jhenio mu pete mu kila kimbokotole cha lichanduko lyenio. Lichanduko lyenio likatengenichwe kwa mbau nkate jhake pakibha napwache.

8 Peniya Bezaleli ngatendekiya libakule likolongwa lya shaba na kitamilo chake chkikibha cha shaba, libakule lyenio likatenganichwe kwa ipande ya lindala lya shaba itumika na akakeghe bhibhahengita lihengo mu lihema lya nyahinyahi.

9 Peniya ngatendikiya lwane. Na mapanjiya gha upande gwa kuchine mwa Lihema lya lwane ikibha ngobho nhuo jha mbuu na kutandamala kwake mita makome ncheche na ncheche, 10 na yenie ikamulilwa na heke makome mabhele ya shaba na itamilo makome mabhele gha shaba. Nambo ikobhekelo yake na ngenge yake ikibha jha madine gha feza. 11 Lipanjiya lya upandi gwa kachikachine kutandamala kwake kukibha mita makome ncheche na ncheche, na heke yake makome mabhele ya shaba, nambo ikobhekelo ya heke yenio na ngenge ikibha ya madine gha feza. 12 Na upande gwa kulitipikii lyobha kukibha na lipanjiya kutandamala kwake mita makome mabhele niibhele na heke yake kome na itamilo yake kome. Ikobhekelo ya heke na ngenge yake ikibha ya madine gha feza. 13 Upandi gwa ghulipitii lyobha, kukibha na nnyango, na upana gwake ukibha mita makome mabhele niibhele. 14 Lipanjiya lya kila upandi gwa nnyango lyakibha upana gwake mita chita na nucho, pamonga na heke itato na itamilo yake itato. 15 Na upande ghonge hele ukibha na lipanjiya ujhanuko gwake mita chita na nucho, pamonga na heke itato na itamilo yake itato. 16 Mapanjiya ghoha kutindii lwane ghakibha gha ngobho nhuo gha mbuu ghukulokwa maha. 17 Itako yake yoha ya heke ikibha ya shaba, nambo ikobhekelo ya heke yenio ikibha ya madine gha feza. Heke yake yoha na ikobhakelo ikibha ya madine gha feza. 18 Lipanjiya lya nnyango gwa lwane likatengenichwe kwa ngobho nhuo jha mbuu na kulembelekeya kwa luche ya lange jha kibuluu na chambalau na ngele. Na lyenio kutandamala kwake mita ticha na ukola kwake mita ibhele, tela na mapanjiya gha lwane. 19 Hele heke yake ikibha ncheche na itamilo ncheche ya shaba, kunane jha heke yenio kukabhekitwe madine gha feza, ikamulilo yake ikibha ya madine gha feza. 20 Ighinge yake yoha ya Lihema na ya lwane ikibha ya shaba.

21 Henge ndi ilebhe itumika kutendeke Lihema li Nyahinyahi, mwenio likabhekwitwe Lichanduko lya Lilaghano na lilikibha na ibao ibhele ya maghanga ikajhandikwe mihilo jha Chapanga. Ichabo yenio ipangitwe na Akalawe kwa mihilo jha Mucha, kakatumiche gwa Isamale, mwana jwa mpiya litambiko Alune.

22 Bezaleli, mwana gwa Ule, nchokolo jwa Hule, jwa likabila lya Yuda, ngateila kila kilebhe Bhambo Chapanga channaghila Mucha. 23 Ngatangatilwa na Oliabo mwana jwa Ahisamiki, jwa likabila lya Dane, punde jhukutendeke ngobho nhuo nu kulembeke nyuche ya buluu na chambalau na ngele na punde jhukubhacha maghanga nu kulemba mumaghanga.

24 Chaabo yoha jhibhampiikiya Bhambo Chapanga kunhwalo gwa kutendekeya Lihema li Nyahinyahi ikibha kilo miya nane na chabine na chaba na ghilamo miya itato, tela na ipemo ipangitwa mu Lihema li Nyahinyahi. 25 Madine gha feza ghibhachangita Akaichilahele bhibhabhalwingwe ikibha kilo elufo itato na kome na chaba na ghilamo miya chaba na amuchine, tela na ipemo ipangitwa mu Lihema li Nyahinyahi. 26 Kila mundo munalome ngabhalangilwa kutumbuli yaka makome mabhele na jhimo nu kujhendelela ngapiita nchango gwaake gwa madine gha feza ghilamo nhwano, na akanalome bhoha bhibhabhalingwe bhakibha lake chita na elufo itato na miya nhwano na amuchine. 27 Kilo elufo itato ya madine gha feza ngaitumika kutendekeya itamilo miya jhimo ya Lihema li Nyahinyahi na lipanjiya, tela na kilo makome matato kila kitamilo chimo. 28 Kilo kome na chaba na ghilamo makome chaba nu nhwano jhiighalike, ngaitumika kutengenechela ikobhekelo ya heke na iyekelelo ya heke yenio. 29 Shaba jhoha Akaichilahele jhibhampiikiya Bhambo Chapanga, ikibha kilo elufo ibhele miya jhimo na ichiline na ncheche. 30 Bezaleli ngatumila shaba jhenio kutengenechela itamilo ya nnyango gwa Lihema li Nyahinyahi, lichanduko lya kupiikiya litambiko cha shaba pamonga na lwaho lwake lwa shaba na yombo yoha ya lichanduko lya kupiikiya litambiko, 31 pamonga na itamilo ya lwane itendikwii Lihema li Nyahinyahi na ya nnyango gwa lwane, na ighinge yoha ya Lihema lya nyahinyahi na ya lwane.