1 Bhambo Chapanga ngannobholila Mucha, 2 "Nenga nihagwii Bezaleli mwana jwa Ule, na nchokolo jwa Ule, jwa likabila lya Yuda, 3 na kuntweleya uhuke gwango. Nimpii malango na umanye na upunde gwa kila namuna, 4 kupala kuumbula mahengo gha upunde na kutendekeya ilebhe ya chaabo na ilebhe ya madine gha feza na shaba. 5 Nimpile upunde kubhacha maghanga gha kulembelekeya nu kughabheka muibate na kuitumii mbau kwa mahengo gha kila namuna na kila umanye gwa upunde. 6 Hele nihagwii Olihabo mwana jwa Ahisamake, jwa likabila lya Dane, akamu mahengo pamonga na jwenio. Hele nimpilingine uhotolo nkolongwa bhange bhando nhwalo gwa mahengo ghange, kupala bhatendekeye ilebhe yoha yanalaghile itendwe. 7 Bhatengenecha Lihema li Nyahinyahi, na bhatengenecha Lichanduko lya Lilaghano na kiyekelelo chake, pamonga na ilebhe yake yoha, 8 na mecha na yombo yake na kinala kilahalanao cha chaabo chukubheke mule na yombo yake, lichanduko lya kututukiya ubane, 9 na lichanduko likupiikiya matambiko ghukukomelekeya na yombo yake yoha, libakule likolongwa lya mache na kitamilo chake, 10 pamonga na ngobho ilokitwe maha upiya litambiko Alune na yana mundo bhibhapakuhenga mahengo gha upiya litambiko, 11 na mahuta gha kupakala na ubane ghunungulila petelele hake nhwalo gwa chehemo Jha Nyahinyahi. Ilebhe yenie yoha itengenechwa tela na chinninaghalakiye."

12 Bhambo Chapanga ngannobholila Mucha, 13 Malobholela Akaichilahele naha, mangota milikomboka Lichiko lya Kupomolela, nhwalo lyenio ndi nginyililo panakate jhino na nenga ku ibheluko ino yoha kubhehe nenga ndi jhunihagwile mme mabhando bhango. 14 Mikamula mihilo jhango jha Lichiko lya Kupomolela na lyenio kwino libha lichiko lya nyahinyahi. Jhojhoha jwalihangabhana lichiko lyenio ikoto kujheketelwa nnonge jhango, ipalwa akomwa. Na mundo jwapakuhenga lihengo lyolyoha lichiko lyenio nabhalangilwa jhe mundo jwango. 15 Nhwenga mahengo kwa machiko chita, nambo lichiko lya chaba ndi Lichiko lya Kupomolela, ndi lichiko lyango lya nyahinyahi. Mundo jhojhoha jwahenga mahengo ghoghoha lichiko lyenie ipalwa akomwa. 16 Kuyene Akaichilahele bhalikomboka lichiko lya Kupomolela mu ibheluko yabhe yoha ngita nginyililo lya lilaghano lya machiko ghoha ghangapeta. 17 Chenio nakibhaha nginyililo jha machiko ghoha pakate jha Akaichilahele na nenga, nhwalo nenga Bhambo Chapanga ngambangina nnema kwa machiko chita, nambo lichiko lya chaba ngangotwika kuhenga mahengo, ngambomolila.

18 Bhambo Chapanga pajhomolila kulonge na Mucha pakitombe chuku Chinae, ngampila Mucha ibao ibhele ya maghanga, yenio ndi ngajhandika mihilo jwene Chapanga kwa lukonje lwake.