1 "Ntendekeya lichanduko kwa mbau jha nkongo gwa nchita kupala ntutukiya ubane. 2 Lichanduko lyenio likututukiya ubane libhaha telatela pande yoha, kutandamala na upana gwake ibhaha sentimita makome ncheche nunhwano ukolo gwake ubhaha sentimita makome ticha. Imbokotole yoha yukunane ibhonekana kilebhe chimo jha chehemo jhenio chehemo jhukututukiya ubane. 3 Lichanduko lyenie yekelela chaabo pande yoha yukunane na pande yoha mumapamanda na manyelo ghake, mitindikiya miniko ya chaabo. 4 Mitengenechela michegha mibhele jha chaabo na kuibheka pahe jha miniko yake mupande yoha ibhele ilolekehana na ikamulilo yukugheghela. 5 Mighomba jhenio ntendekeya kwa nkongo gwa nchita nu kuyekelela chaabo. 6 Chehemo jhenio jha kupiikiya matambiko gheniya ubhekwa palonge jha lipanjiya muupele jha Lichanduko lya Lilaghano. Peniya ndi pimbakukongana na mwenga. 7 Kila lukela Alune pajhingila kulenganikiya mule lulubhii mwenio, jwenio ndi atutukiya ubane ghunungila petelele panane jhake. 8 Kabhele natutukiya ubane kimiye papamba mule. Hupo yenio jha ubane litendwa kila lichiko lyangalekwa jhe muibheluko ino yoha. 9 Mu lichanduko lyenio mangatutukii jhe ubane gwangabhe nyahinyahi na mangapiya hilu litambiko likukomeleya amu hupo ya mbonje hilu kujhitila panane jhake hupo ya kinywegho. 10 Mala jhimo kila chaka Alune ipalwa ajhelebhula chehemo jhikupiikiya hupo yenio kukupakaya myahe. Atenda ujhelenicho gwa kubhokeya uhakaho kwa myahe kwa kila chaka muibheluko ino yoha nhwalo chehemo jhenio jhikupiikiya ndi nyahinyahi hake kwa nenga Bhambo Chapanga."

11 Bhambo Chapanga ngannobholila Mucha, 12 "Kila pipakwabhalanga Akaichilahele, kila mundo ipalwa apiya nchango kunhwalo gwake jwenie kughombola ughome gwake, kupala pangabhejhe na malwalo mabhoho pakate jhabhe kukipinde chakwabhalanga. 13 Kila mundo jwapakubhalangwa ipalwa alepa mbijha tela na kipemo chikipangitwe mu lihema lya nyahinyahi. Lyenio ndi litambiko lyake lyapakunnepa. 14 Kila mundo jwapakubhalangwa, kuhumii jwa yaka makome mabhele nu kujhendelela, ipalwa ambiikiya litambiko lyenio. 15 Jhuna ilebhe mbwe angapiya jhe kupeta chiipalwa na nhwocho angalepele jhe kupiya nucho jhikipato chikipalwa kipinde chimimpiikiya hupo Bhambo Chapanga kunhwalo jha kughombola ughome gwake. 16 Mwenga nampokela mbijha yenio ya kughombola ughome gwabhe kubhoke kwa Akaichilahele na mwenga mitumila kwa mahengo gha lihema lya nyahinyahi, na kilebhe chenio kibhaha nangomboka kwalonda Akaichilahele nnonge jhango, gheniya ndi malepo gha ughome gwino."

17 Bhambo Chapanga ngannobholila Mucha, 18 "Ntendekeya libakule likolongwa lya shaba likukuhukiya lina kitamilo cha shaba, milibheka pakate jha lihema lya nyahinyahi na chehemo jhi kupiiikiya litambiko lyukukomelekeya nu mulitweleya mache. 19 Alune na yana mundo nabhagholola mabhoko na makongono ghabhe kutumii mache gheniya, 20 kabula jhukujhingii mu lihema lya nyahinyahi amu kubhandikila chehemo jhukumbiikiya litambiko lya kukomelekeya nenga Bhambo Chapanga, bhatenda yene kupala bhangawe jhe. 21 Bhipalwa kugholola mabhoko na makongono ghabhe kupala bhangaika kuwe jhe. Gheniya ghabhaha mihilo jha machiko ghoha ghangapeta kwabhe, kutumbulii Alune na kibheluko chake, kibheluko ade kibheluko."

22 Bhambo Chapanga ngannobholila Mucha, 23 "Nantola ilebhe henge inungilila petelele hake, malelalela ghighakemwa manemane kilo chita na mdalachine ghunungila kilo itato na ukobha gwa mimeya ghunungilila ghulandana na mikota kilo itato, 24 na jhenge aina jha mdalachine jhikemwa kida kilo chita, ipemo yenio yoha ibhaha lengalenga ngita ipemo ipangwitwe mu lihema lya nyahinyahi, helahela ntola lita ncheche ya mahuta gha micheitune. 25 Kubhoke muilebhe yenio mitendekeya mahuta gha nyahinyahi mighahangalana ngita chaitenda punde jwa manukatu, gheniya ghatumika kujhelebhulila ilebhe kunhwalo gwango. 26 Kwa mahuta gheniya mulimichila lihema lya nyahinyahi na Lichanduko lya Lilaghano, 27 na mecha na yombo yake yoha, kinala chakubheke mule na yombo yoha, lichanduko lya kututukiya ubane, 28 na chehemo jhukupiikiya matambiko ghu kukomelekeya na yombo yake yoha, libakule likolongwa na kitamilo chake. 29 Miitenda ilebhe yenio yoha ihenga lihengo lya Bhambo Chapanga na ibha nyahinyahi hake. Chochoha chimpakupapaya, nakibhaha nyahinyahi. 30 Peniya mupakaya mamiminila mahuta Alune na yana mundo na kwajhelebhula kupala bhatumika ngita akapiya matambiko bhango. 31 Malobholela Akaichilahele kubhehe ghanga naghabhaha mahuta ghango gha nyahinyahi gha kupakala naghatumika mulihengo lyango muibheluko hino yoha. 32 Chonde mahuta gheniya angamiminilwa jhe mundo jwangabhehe mpiya litambiko, hilu ghangatengenechwa jhe mahuta ghange ngita ghanga, gheniya ndi mahuta gha nyahinyahi ghapalwa ghabhaha machiko ghoha kwino. 33 Mundo jhojhoha jwapakutengenecha mahuta ngita gheniya amu kumiminila mundo jwangabhehe mpiya litambiko, mundo jwenio ipalwa abhekwa kutale na bhando bhango."

34 Bhambo Chapanga ngannobholila Mucha, "Nantola ilebhe henge yukuhangalana ina kunogha ipemo yake ibhaha lengalenga, malelalela gha nkongo natafi na malelalela gha nkongo shekelete na malelalela gha nkongo gwa kalibena na ubane ghunungilila petelele. 35 Ntumila ilebhe yenio kutengenechela ubane ngita punde patengenecha manukatu, nnekela mwinyo ubhaha gwambone na nyahinyahi. 36 Peniya nhyagha ubane gwenio nu kubhehe ukobha ghunakutema, utumika mu lihema lya Nyahinyahi nu kulipakaya Lichanduko lya Lilaghano, chehemo pimbakukongana na mwenga, gwenio ubhaha ubane gwa nyahinyahi hake kwino. 37 Pangabhehe jhe na mundo pakate jhino jwatengenecha ubane ngita gwenio, kwa nhwalo jhake jwenie. Nhwalo ubane gwenio ubhaha gwa nyahinyahi nnonge jhango. 38 Mundo jhojhoha jwapakukitengenechela ubane ngita gwenio nu kutumila ngita mahuta ghighanungulila petelele, nabhalangika jhe pakate jha bhando bhango."